.jpg)
លោក ចាន់ សារឹម ម្ចាស់ហាងកាត់សក់មីសស្ទ័រង៉ោលកំពុងកាត់សក់ជូនអតិថិជន។
អាជីពកាត់សក់ ២ ជំនាន់ដែលតពីឪពុករហូតដល់កូន កំពុងទទួលបានការគាំទ្រយ៉ាងខ្លាំងនៅក្នុងរាជធានី-ភ្នំពេញ ខណៈអាជីវកម្មគ្រួសារ ១ នេះត្រូវបានកូនប្រុសនាំយកមកបម្រើអតិថិជននៅក្នុងរាជធានីភ្នំពេញជាមួយនឹងជំនាញកាត់សក់ដ៏ប៉ិនប្រសប់ និងប្រកបដោយវិជ្ជាជីវៈ។
ហាងកាត់សក់មីសស្ទ័រង៉ោលដែលមានទីតាំងស្ថិតនៅតាមបណ្តោយផ្លូវ ៤៥៦ ក្នុងសង្កាត់ទួលទំពូង ១ គឺជានិមិត្តរូបនៃកេរដំណែលកាត់សក់តពីឪពុកដល់កូន ហើយអាជីវកម្ម ១ នេះកំពុងមានការរីកចម្រើនជាលំដាប់ ដែលក៏ជាការរួមចំណែកដល់ការរីកចម្រើនរបស់ប្រទេសជាតិផងដែរ។
សហគ្រិនវ័យក្មេងដែលបានជម្នះឧបសគ្គ ពេលនេះកំពុងបន្ថែមកម្លាំងដល់សេដ្ឋកិច្ចកម្ពុជា ខណៈបច្ចុប្បន្នសេដ្ឋកិច្ចកម្ពុជាកំពុងមានកំណើនលឿនបំផុតមួយនៅក្នុងតំបន់អាស៊ាន។ លោក ចាន់ សារឹម អាយុ ៣៨ ឆ្នាំមានស្រុកកំណើតនៅខេត្តកំពតដែលជាម្ចាស់ហាងកាត់សក់មីសស្ទ័រង៉ោលគឺជាឧទាហរណ៍មួយដែលបង្ហាញពីការតស៊ូ និងជម្នះរាល់ឧបសគ្គដើម្បីក្លាយជាសហគ្រិន ១ រូបដ៏ជោគជ័យ។
ដូចយុវជនកម្ពុជាដទៃទៀតដែរ លោក ចាន់ សារឹម បានខិតខំយ៉ាងខ្លាំងដើម្បីក្លាយជាអ្នកប្រកបអាជីវកម្មឯករាជ្យម្នាក់ ហើយក្តីសុបិនរបស់លោកបានក្លាយជាការពិត ខណៈកាលពី ៦ ឆ្នាំមុនគាត់គ្រាន់តែជាជាងកាត់សក់ធម្មតាម្នាក់ដែលធ្វើការនៅហាងកាត់សក់របស់មិត្តភក្តិគាត់នៅម្តុំទួលទំពូងប៉ុណ្ណោះ។ បន្ទាប់ពីទទួលបានបទពិសោធ ជំនាញច្បាស់លាស់ និងភាពជឿជាក់មក លោក សារឹម ក៏សម្រេចបើកហាងកាត់សក់មីសស្ទ័រង៉ោលនេះឡើង។
ក្រៅពីកាត់សក់ក៏មានសេវាកក់ និងលាបថ្នាំសក់គ្រប់ពណ៌ផងដែរ។
លោក សារឹម ថ្លែងថា៖ «ខ្ញុំទទួលបានការបំផុសគំនិតពីអាជីពរបស់ឪពុកខ្ញុំមួយនេះកាលពីខ្ញុំនៅក្មេង ហើយក៏ចង់ឃើញអាជីវកម្មរបស់គាត់នៅបន្តរីកចម្រើន។ ដោយចង់មានអាជីវកម្ម ១ ផ្ទាល់ខ្លួនផង ខ្ញុំក៏សម្រេចចិត្តបើកហាងកាត់សក់នេះឡើង»។ លោកក៏បានឲ្យដឹងថា លោកមានគម្រោងបើកហាងកាត់សក់លំដាប់ខ្ពស់ ១ នៅឆ្នាំក្រោយ។
ហាងកាត់សក់ដ៏ល្បីល្បាញនេះមានបុគ្គលិកចំនួន ៦ នាក់ក្នុងនោះបុគ្គលិកប្រុសដែលជាជាងកាត់សក់ចំនួន ៤ នាក់ ហើយបុគ្គលិកជាស្ត្រីចំនួន ២ នាក់ ដែលទទួលខុសត្រូវចំពោះការម៉ាស្សាមុខ កក់សក់ កាត់ក្រចក និងលាបថ្នាំសក់ជាដើម។
ក្រៅពីមានសេវាកម្មកាត់សក់ ហាងកាត់សក់មីសស្ទ័រង៉ោល ក៏មានសេវាកម្មកក់សក់ ព្យាបាលសក់សម្រាប់សក់ខូច លាបពណ៌សក់ កាត់ក្រចកដៃ ក្រចកជើង សម្អាតត្រចៀក ម៉ាស្សាផ្ទៃមុខ និងលាបពណ៌សក់គ្រប់ប្រភេទផងដែរ។
មិនខុសពីអាជីវកម្មផ្សេងទៀតទេ ការរីករាលដាលជំងឺកូវីដ១៩ ក៏បានជះឥទ្ធិពលដល់អាជីវកម្មកាត់សក់របស់លោក សារឹម ផងដែរ។ ធ្លាប់តែទទួលបានអតិថិជនជាមធ្យម ៨០ នាក់ក្នុង ១ ថ្ងៃកាលពីមុនជំងឺកូវីដ១៩ផ្ទុះឡើង បានធ្លាក់មកត្រឹមប្រមាណ ៣០ នាក់ប៉ុណ្ណោះក្នុង ១ ថ្ងៃ។
ប៉ុន្តែទោះយ៉ាងណា ចាប់តាំងពីចុងខែមិថុនាមក អតិថិជនចាប់ផ្តើមកើនឡើងវិញសន្សឹមៗគឺទទួលបានអតិថិជនប្រមាណពី ៥០ ទៅ ៦០ នាក់ក្នុង ១ ថ្ងៃដោយភាគច្រើនជាជនជាតិខ្មែរ ហើយអតិថិជនដែលជាជនបរទេសមានប្រមាណ ២០ ភាគរយ។
សម្ភារ និងកន្រៃ្តច្រើនប្រភេទសម្រាប់កាត់សក់។
«វិធានការទប់ស្កាត់ជំងឺកូវីដ១៩ត្រូវបានអនុវត្តយ៉ាងខ្ជាប់ខ្ជួន។ នៅពេលអតិថិជនមកដល់យើងបាញ់ទឹកអាល់កុលលាងដៃ និងឲ្យម៉ាស់ពាក់។ យើងដែលជាជាងកាត់សក់គឺត្រូវពាក់ម៉ាស់ និងពាក់ស្រោមដៃ។ យើងរក្សាអនាម័យខ្ពស់ ហាងយើងត្រូវបានសម្អាតជាប្រចាំ បន្ទាប់ពីកាត់សក់រួចគឺយើងសម្អាតភ្លាមៗមិនទុកឲ្យមានសក់ជ្រុះនៅលើឥដ្ឋយូរទេ»។ លោក សារឹម ថ្លែង។
«កាលពីបើកដំបូងតម្លៃកាត់សក់តែ ២ ដុល្លារប៉ុណ្ណោះ ហើយច្រើនឆ្នាំមកនេះ ខ្ញុំដំឡើងថ្លៃពី ២ ដុល្លារមក ២,៥ ដុល្លារ ហើយឥឡូវខ្ញុំឡើងថ្លៃដល់ ៣ ដុល្លារសម្រាប់ការកាត់សក់ ពោលគឺខ្ញុំឡើងថ្លៃតិចតួចបំផុត។ ចំពោះតម្លៃម៉ាស្សាមុខ កក់សក់ និងបកមុនគឺមានតម្លៃ ១០ ដុល្លារ ហើយបើកាត់ក្រចកដៃក្រចកជើង ៥ ដុល្លារ»។
លោក សារឹម បន្តថា៖ ««ចំពោះអតិថិជនខ្មែរ និងបរទេសគឺខ្ញុំគិតតម្លៃដូចគ្នា។ មូលហេតុដែលខ្ញុំគិតតម្លៃសម្រាប់អតិថិជនខ្មែរ និងបរទេសស្មើគ្នា ដោយសារខ្ញុំយល់ថា ខ្ញុំមិនចង់ឲ្យពួកគាត់គិតថាយើងមិនមានស្មើភាពគ្នា និងដើម្បីកុំឲ្យពួកគាត់មិនសប្បាយចិត្ត។ ខ្ញុំឲ្យតម្លៃអតិថិជនរបស់ខ្ញុំស្មើៗគ្នាមិនថាអតិថិជនជាខ្មែរ ឬបរទេសនោះទេ»៕
ហាងកាត់សក់មីសស្ទ័រង៉ោលមានទីតាំងស្ថិតនៅសង្កាត់ទួលទំពូង១។
