កំណើនគ្រោះថ្នាក់ចរាចរណ៍កំពុងបង្កឲ្យមានការព្រួយបារម្ភយ៉ាងខ្លាំងនៅក្នុងប្រទេស កម្ពុជា ខណៈចំនួនយានយន្តនៅលើដងផ្លូវក៏កំពុងតែកើនឡើងផងដែរ។ ដូច្នេះទាំងវិស័យសាធារណៈ និងវិស័យឯកជនគឺមានតួនាទីសំខាន់ណាស់នៅក្នុងការទប់ស្កាត់គ្រោះថ្នាក់ចរាចរណ៍នេះ។
កិច្ចសហការភាពជាដៃគូរវាងវិស័យសាធារណៈ និងឯកជនមានកម្រិតផ្សេងៗគ្នានៅក្នុងប្រទេស កម្ពុជា។ ប្រទេសជាច្រើនបានយកចិត្តទុកដាក់ខ្ពស់ទៅលើបណ្តាញដឹកជញ្ជូន និងការកសាងផ្លូវហាយវ៉េ ហើយសុវត្ថិភាពចរាចរណ៍បានក្លាយជារឿងដ៏សំខាន់មួយទៀតនៅក្នុងភាពជាដៃគូពហុវិស័យ។
បច្ចុប្បន្នអាជ្ញាធរកំពុងសហការជាមួយវិស័យឯកជនដើម្បីបង្កើនសុវត្ថិភាពចរាចរណ៍ ដោយកាលពីថ្ងៃទី ២១ ដល់ថ្ងៃទី ២២ ខែ តុលា ឆ្នាំ ២០១៩ កន្លងទៅ នៅឯសាលប្រជុំនៃសាលាខេត្តព្រះសីហនុមានវគ្គបណ្តុះបណ្តាលបំប៉នស្តីពីបច្ចេកទេសបង្កើនប្រសិទ្ធភាពការរឹតបន្ដឹងច្បាប់ចរាចរណ៍លើការបើកបរក្រោមឥទ្ធិពលនៃគ្រឿងស្រវឹង វិធានសម្រួលចរាចរណ៍ពេលកកស្ទះ និងកិច្ចជួយសង្គ្រោះជនរងគ្រោះ។
វគ្គបណ្តុះបណ្តាលនេះរៀបចំដោយនាយកដ្ឋាននគរបាលចរាចរណ៍ និងសណ្ដាប់ធ្នាបសាធារណៈនៃអគ្គស្នងការដ្ឋាននគរបាលជាតិ សហការជាមួយអង្គការខេមសេហ្វ (CaMSafe) ដោយមានកិច្ចគាំទ្រពីសាលាខេត្តព្រះសីហនុ តាមរយៈជំនួយឧបត្ថម្ភ APIWSA និងសមាជិកដៃគូស្ថាប័ន។ ក្នុងនោះមានមន្ត្រីនគរបាលចរាចរណ៍ និងភាគីពាក់ព័ន្ធជុំវិញខេត្តផ្ទាល់សរុបចំនួន ៦០ រូប ដែលចូលរួមក្នុងវគ្គនេះ។
វគ្គដូចគ្នានេះក៏ត្រូវបានរៀបចំកាលពីថ្ងៃទី ២៣ តុលា ឆ្នាំ ២០១៩ នាសាលខេត្តព្រះសីហនុដដែលដល់មន្ត្រីនគរបាលចរាចរណ៍ និងភាគីពាក់ព័ន្ធចំនួន ៦០ រូបបន្ថែមទៀត ដើម្បីរួមចំណែកលើកកម្ពស់សុវត្ថិភាពចរាចរណ៍ និងជំរុញឱ្យអ្នកប្រើប្រាស់ផ្លូវគ្រប់រូបចូលរួមគោរពច្បាប់ចរាចរណ៍ពេលធ្វើដំណើរលើដងផ្លូវនៅក្នុងទូទាំងព្រះរាជាណាចក្រកម្ពុជា។
វគ្គបណ្តុះបណ្តាលរយៈពេល ២ ថ្ងៃនេះ មានគោលបំណងបង្កើនចំណេះដឹងអំពីទិដ្ឋភាពទូទៅនៃស្ថានភាពចរាចរណ៍ និងឥរិយាបថហានិភ័យ និងផលប៉ះពាល់នៃការបើកបរក្រោមឥទ្ធិពលនៃគ្រឿងស្រវឹង។ បង្កើនចំណេះដឹងអំពីការធ្វើផែនការប្រតិបត្តិការ និងវិធានដោះស្រាយរាល់បញ្ហាប្រឈមលើការរឹតបន្តឹងអនុវត្តច្បាប់ចរាចរណ៍ និងកាយវិការសម្រួលដល់ការកកស្ទះចរាចរណ៍។
ពង្រឹងសមត្ថភាពជំនាញដាក់គោលដៅរឹតបន្តឹង និងប្រើប្រាស់ម៉ាស៊ីនវាស់ជាតិអាល់កុល ប្រកបដោយប្រសិទ្ធភាព គុណភាព និងសុវត្ថិភាព។ បង្កើនសមត្ថភាពដោះស្រាយ គ្រប់គ្រង និងធានាសុវត្ថិភាពគោលដៅ រឹតបន្តឹងច្បាប់ ក៏ដូចជាការអង្កេត កត់ត្រា ប្រមូលភ័ស្តុតាង និងធ្វើរបាយការណ៍។ ផ្ដល់ឲ្យនគរបាលចរាចរណ៍ទទួលបាននូវចំណេះដឹង ជំនាញ និងសម្ភារជួយសង្គ្រោះដល់ជនរងគ្រោះនៅនឹងកន្លែងកើតហេតុមុនពេលបញ្ជូនទៅកាន់មន្ទីរពេទ្យ។ ព្រមទាំងបង្កើនសមត្ថភាពជំនាញដើម្បីបណ្តុះបណ្តាលបន្ត រួមជាមួយនឹងសមត្ថភាពអប់រំផ្សព្វផ្សាយជូនដល់ប្រជាពលរដ្ឋអ្នកប្រើប្រាស់ ផ្លូវឱ្យចូលរួមគោរពច្បាប់ចរាចរណ៍គ្រប់ៗគ្នា។
លោក ថី វិសាល អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិបានឱ្យដឹងថា យោងតាមរបាយការណ៍ឆ្នាំ ២០១៨ គ្រោះថ្នាក់ចរាចរណ៍កើតឡើង ៣ ២៦៧ ករណី លើ ៣ ៥៣១ លើក ថយចុះ ៧ ភាគរយ បើធៀបនឹងឆ្នាំ ២០១៧។
ក្នុងត្រីមាសទី ៣ ឆ្នាំ ២០១៩ នេះគ្រោះថ្នាក់ចរាចរណ៍កើតឡើងចំនួន ៩៨៨ លើក បណ្តាលឱ្យមានអ្នកស្លាប់ចំនួន ៤៨៨ នាក់ និងរបួសចំនួន ១ ៤៩៤ នាក់ ដែលក្នុងនោះខេត្តព្រះសីហនុស្លាប់ចំនួន ៣៧ នាក់។ ជាមធ្យមក្នុងក្នុង ១ ថ្ងៃមនុស្សស្លាប់ ១១ នាក់ និងរបួសចំនួន ១៧ នាក់។
មូលហេតុដែលបង្កឲ្យមានគ្រោះថ្នាក់គឺនៅតែបណ្តាលមកពីការបើកបរល្មើសល្បឿនកំណត់ ៣៣% ការមិនគោរពសិទ្ធិអាទិភាព ២៧% ការមិនប្រកាន់ស្តាំ ១៣% ការវ៉ាជែង ១០% ការបត់ ៩%, ស្រវឹង ៤%, កត្តាយានយន្ត ៣% និងងងុយ ១%។ ប្រៀបធៀបឆមាសទី ៣ ឆ្នាំ ២០១៨ គ្រោះថ្នាក់ចរាចរណ៍កើនចំនួន ២៣៨ លើក (៩៨៨/៧៥០ លើក) ស្មើ ៣២% ស្លាប់កើនឡើងចំនួន ១០៥ នាក់ (៤៨៨/៣៨៣ នាក់) ស្មើ ២៧% និងរបួសកើន ៤៤៦ នាក់ (១៤៩៤/ ១០២៨) ស្មើ ៤៥%។
សូមបញ្ជាក់ថា អង្គការ CaMSafe ក្រោមកិច្ចគាំទ្រពីស្ថាប័ន APIWSA នឹងបន្តសហការជាមួយអគ្គស្នងការដ្ឋាននគរបាលជាតិ កាកបាទក្រហមកម្ពុជា និងដៃគូពាក់ព័ន្ធ ដើម្បីរៀបចំយុទ្ធនាការអបរំផ្សព្វផ្សាយនានានៅពេលខាងមុខនេះជាបន្តទៀត៕