Voltra គឺជាក្រុមហ៊ុនផលិតម៉ូតូអគ្គិសនីដំបូងគេបង្អស់របស់ប្រទេសកម្ពុជា។
ស្ថាបនិកក្រុមហ៊ុន លោក Yann Vaudin បានឲ្យភ្នំពេញប៉ុស្តិ៍ដឹងថាចាប់តាំងពីចាប់ផ្តើមប្រតិបត្តិការនៅខែធ្នូ ក្រុមហ៊ុនលក់ម៉ូតូអគ្គិសនី (e-bikes) បានចំនួន ៧០ គ្រឿងរួចហើយ និងរំពឹងថានឹងលក់បានយ៉ាងហោចណាស់ ១ ០០០ គ្រឿងគិតត្រឹមចុងឆ្នាំនេះ។ ក្រុមហ៊ុនក៏បានសាងសង់សាលតាំងបង្ហាញទី ២ រួចហើយដែរនៅក្នុងខេត្តសៀមរាប។
រហូតមកដល់ពេលនេះក្រុមហ៊ុនមានអតិថិជនជាច្រើនមកពីស្ថាប័នផ្សេងៗ ដូចជាមកពីអង្គការសហប្រជាជាតិប្រចាំកម្ពុជា ស្ថានទូតស៊ុយអែត ស្ថានទូតបារាំង ទីភ្នាក់ងារអភិវឌ្ឍន៍បារាំង ក្រសួងសេដ្ឋកិច្ច និងហិរញ្ញវត្ថុក៏ដូចជាក្រុមហ៊ុនទូរគមនាគមន៍ម៉ាឡេស៊ី Smart ជាដើម។
ក្រុមហ៊ុនមានបុគ្គលិក ៦ នាក់ក្នុងនោះមានវិស្វករខ្មែរ ២ រូបដែលដំឡើងគ្រឿងផ្គុំនីមួយៗដោយដៃ។
បច្ចុប្បន្នក្រុមហ៊ុន Voltra មានម៉ូតូ ២ ម៉ូដែលហើយទាំង ២ ម៉ូដែលនេះផលិតនៅក្នុងប្រទេសកម្ពុជា។ ម៉ូដែល Off-road សាកថ្មម្តងអាចធ្វើដំណើរបាន ៥០ គីឡូម៉ែត្រ និងបើកបរបានក្នុងល្បឿន ៣៨ គីឡូម៉ែត្រក្នុង ១ ម៉ោង។
ចំពោះម៉ូដែល Matrix ត្រូវបានដាក់លក់នៅក្នុងខែមករាអាចធ្វើដំណើរក្នុងល្បឿនរហូតដល់ ៦០ គីឡូម៉ែត្រក្នុង ១ ម៉ោងហើយសាកថ្មម្តងអាចធ្វើដំណើរបានចម្ងាយ ១០០ គីឡូម៉ែត្រ។
អតិថិជននៃម៉ូដែលទាំងពីរអាចដកថ្មសាក (lithiumion) ដែលដាក់នៅខាងក្រោមកែបទៅសាកនៅក្នុងការិយាល័យ ឬគេហដ្ឋានរបស់ពួកគេបានយ៉ាងងាយស្រួល។
«ម៉ូដែល Off-road ចំណាយត្រឹមតែ ១៥ រៀលប៉ុណ្ណោះក្នុងការបើកបរលើចម្ងាយផ្លូវ ១ គីឡូម៉ែត្រ ហើយម៉ូដែល Matrix ចំណាយតែ ១២,៤ រៀលប៉ុណ្ណោះក្នុងចម្ងាយផ្លូវ ១ គីឡូម៉ែត្រ។ វាស៊ីថាមពលអស់ត្រឹមតែ ១ គីឡូវ៉ាត់ម៉ោងប៉ុណ្ណោះសម្រាប់ធ្វើដំណើរចម្ងាយផ្លូវ ៥០ គីឡូម៉ែត្រដូច្នេះម៉ូតូអគ្គិសនីរបស់យើងមានតម្លៃថោកជាងម៉ូតូប្រើសាំង ៦ ទៅ ៧ ដង។
លោក Vaudin ថ្លែងនៅឯការិយាល័យរបស់លោកក្នុងរាជធានីភ្នំពេញថា៖ «អាគុយប្រើជាមួយម៉ូតូនេះមានសុពលភាពរយៈពេល ៤ ឆ្នាំ ហើយវាសន្សំសំចៃបានច្រើន បើប្រៀបធៀបទៅនឹងម៉ូតូប្រើសាំង»។
ក្រុមហ៊ុន Voltra គ្រោងនឹងចាប់ផ្តើមផលិតគ្រឿងបន្លាស់ប្លាស្ទិកសម្រាប់ម៉ូតូនៅកម្ពុជា។ ហើយឆាប់ៗនេះក្រុមហ៊ុនក៏នឹងពង្រីកសមត្ថភាពផលិតកម្មរបស់ខ្លួនផងដែរ។
បច្ចុប្បន្នម៉ូដែលទាំងនេះត្រូវបានផលិតនៅអគារមួយជិតព្រលានយន្តហោះប៉ុន្តែលោក Vaudin មានបំណងចង់មានរោងចក្រ និងបណ្តាញដំឡើងឲ្យបានត្រឹមត្រូវនៅក្នុងឆ្នាំ ២០២១។
សម្រាប់លោក Vaudin ប្រទេសកម្ពុជាគឺជាចំណុចចាប់ផ្តើមសម្រាប់ក្រុមហ៊ុន Voltra មុនពេលពង្រីកទៅតំបន់ផ្សេងទៀត និងនៅទូទាំងពិភពលោក។
ដើម្បីសម្រេចគោលដៅនេះក្រុមហ៊ុន Voltra ទទួលបានវិញ្ញាបនបត្រ "CE" (European Conformity) ដែលធ្វើឱ្យវាមានភាពសមស្របសម្រាប់ទីផ្សារអឺរ៉ុប។
លោក Vaudin ដែលជាវិស្វករផ្នែកថាមពលកកើតឡើងវិញថ្លែងថាលោកបានខិតខំយ៉ាងខ្លាំងដើម្បីធានាថា ម៉ូតូរបស់លោកមិនត្រឹមតែបំពេញតាមស្តង់ដាសុវត្ថិភាព និងមិនប៉ះពាល់បរិស្ថានប៉ុណ្ណោះទេ ប៉ុន្តែថែមទាំងតម្រូវតាមតម្រូវការរបស់អតិថិជនកម្ពុជាផងដែរ។
«ចាប់តាំងពីដំបូងនៅពេលដែលយើងចាប់ផ្តើមក្រុមហ៊ុន Voltra យើងមិនត្រឹមតែគិតអំពីទីផ្សារក្នុងស្រុកប៉ុណ្ណោះទេ យើងថែមទាំងបានគិតអំពីការនាំចេញម៉ូតូនេះទៅដល់អតិថិជនអន្តរជាតិទៀតផង។ យើងបានចំណាយពេលជាង ២ ឆ្នាំដើម្បីធ្វើឱ្យប្រាកដថា ផលិតផលនេះនឹងត្រូវបានទទួលស្គាល់នៅទូទាំងពិភពលោក»។
លោកបន្ថែមថា លោកបានសាកល្បងម៉ូដែល Off-road នៅលើចម្ងាយផ្លូវ ១២ ០០០ គីឡូម៉ែត្រនៅពាសពេញផ្ទៃប្រទេសកម្ពុជារាប់ចាប់ពីផ្លូវកកស្ទះក្នុងរាជធានីភ្នំពេញរហូតដល់ផ្លូវក្រាលក្រួសក្រហមនៃតំបន់ជនបទក្នុងខេត្តសៀមរាប។
ម៉ូដែល Off-road ត្រូវបានរចនាឡើងយ៉ាងពិសេសជាមួយនឹងផ្នត់គំនិតគិតពីអតិថិជនក្នុងស្រុកដោយមិនត្រឹមតែយកចិត្តទុកដាក់លើស្ថានភាពផ្លូវប៉ុណ្ណោះទេ ប៉ុន្តែថែមទាំងគិតអំពីតម្លៃផលិតផលផងដែរ។
ចំពោះម៉ូដែល Off-road មានតម្លៃ ៨៩៩ ដុល្លារក្នុង ១ គ្រឿងចំណែកឯម៉ូដែល Matrix មានតម្លៃ ១៣៩០ ដុល្លារ។ ក្រុមហ៊ុន Voltra ក៏គ្រោងនឹងដាក់បង្ហាញម៉ូដែល 3W Matrix នៅក្នុងរយៈពេល ២ ខែខាងមុខផងដែរ៕