.jpg)
អ្នកសារព័ត៌មានអន្តរជាតិត្រូវបានអញ្ជើញឲ្យផ្សព្វផ្សាយទេសចរណ៍ម៉ាឡេស៊ី ។
ដើម្បីសម្រេចបានតាមគោលដៅក្នុងការទាក់ទាញទេសចរឲ្យបានចំនួន ៣០ លាននាក់នៅឆ្នាំក្រោយ ប្រទេសម៉ាឡេស៊ីបានចាប់ផ្តើមផ្សព្វផ្សាយតាមប្រព័ន្ធផ្សព្វផ្សាយសង្គមដើម្បីទាក់ទាញភ្ញៀវទេសចរជំនាន់ថ្មីដែលចូលចិត្តដំណើរកម្សាន្តបែបផ្សងព្រេង អ្នកចូលចិត្តថតរូបបែបសែលហ្វ៊ី និងអ្នកចូលចិត្តទទួលទានអាហារដ៏សម្បូរបែប។
ប្រទេសម៉ាឡេស៊ីហាក់ងាកចេញពីយុទ្ធសាស្ត្រទីផ្សារបែបប្រពៃណីមករៀបចំយុទ្ធសាស្ត្ររបស់ខ្លួនតាមរយៈបណ្តាញទំនាក់ទំនងសង្គមដ៏មានសក្តានុពលដើម្បីធ្វើឲ្យយុទ្ធនាការទស្សនាប្រទេសម៉ាឡេស៊ីឆ្នាំ ២០២០ សម្រេចបានជោគជ័យ ហើយសង្ឃឹមថានឹងទទួលបានចំណូលប្រមាណ ២៥ ពាន់លានដុល្លារពីវិស័យទេសចរណ៍នៅឆ្នាំក្រោយ។
«នៅក្នុងយុទ្ធនាការនេះ យើងកំពុងផ្សព្វផ្សាយបែបឌីជីថល។ យើងនឹងផ្សព្វផ្សាយយ៉ាងសកម្មលើប្រព័ន្ធអនឡាញ គេហទំព័រ ឬហ្វេសប៊ុក។ យើងកំពុងធ្វើការយ៉ាងជិតស្និទ្ធជាមួយក្រុមហ៊ុនអាកាសចរណ៍ ភ្នាក់ងារ ទេសចរណ៍ មកពីគ្រប់ទីផ្សារ ដើម្បីឱ្យពួកគេអាចនាំភ្ញៀវទេសចរមកកាន់ប្រទេសម៉ាឡេស៊ីកាន់តែច្រើន»។
លោក Iskandar Miraza Mohd Yusof ប្រធានផ្នែកទំនាក់ទំនងសាជីវកម្មទេសចរណ៍ម៉ាឡេស៊ីបានប្រាប់ភ្នំពេញប៉ុស្តិ៍នៅទីក្រុងគូឡាឡាំពួថា៖ «យើងក៏បានផ្សព្វផ្សាយគោលដៅទេសចរណ៍ថ្មីៗផងដែរ ដើម្បីឲ្យទេសចរ ជំនាន់ថ្មីទទួលបាននូវបទពិសោធបដិសណ្ឋារកិច្ចរបស់ម៉ាឡេស៊ី»។
ភ្នាក់ងារនេះបានភ្ជាប់ទំនាក់ទំនងជាមួយក្រុមហ៊ុន Expedia Group ដើម្បីទាក់ទាញទេសចរមកពីប្រទេសជប៉ុន អូស្ត្រាលី និងសហរដ្ឋអាមេរិក ហើយថែមទាំងបានចាប់ដៃគូយុទ្ធសាស្ត្រជាមួយក្រុមហ៊ុន Sharp ដើម្បីពង្រីកវីដេអូផ្សព្វផ្សាយពីទេសចរណ៍ម៉ាឡេស៊ី ជាមួយនឹងអេក្រង់បច្ចេកវិទ្យាខ្ពស់កម្រិត 8k ចំនួន ២០០,០០០ ដែលមានគុណភាពខ្ពស់ រូបភាពច្បាស់ដាក់បង្ហាញនៅទូទាំងប្រទេសអាស៊ាន ចិន ឥណ្ឌា ជប៉ុន និងតៃវ៉ាន់។
ប្រទេសម៉ាឡេស៊ីកំពុងស្ថិតក្នុងការផ្សព្វផ្សាយយុទ្ធនាការទស្សនាប្រទេស ម៉ាឡេស៊ី ឆ្នាំ ២០២០ ក្រោមពាក្យស្លោក «Truly Asia Malaysia 2020» ដើម្បីប្រកួតប្រជែងជាមួយប្រទេស អាស៊ានដទៃទៀតដូចជាថៃ និងហ្វីលីពីនដែលវិស័យទេសចរណ៍កំពុងកើនឡើង។
លោក Musa៖ គំនិតផ្តួចផ្តើមយុទ្ធសាស្ត្រគឺដើម្បីជំរុញវិស័យទេសចរណ៍។
នៅឆ្នាំក្រោយអាចជាឆ្នាំដែលមានភាពតានតឹងសម្រាប់វិស័យទេសចរណ៍។ ចំនួនទេសចរចិនដែលជាទេសចរអន្តរជាតិដ៏សំខាន់នៅទូទាំងពិភពលោក អាចធ្លាក់ចុះដោយសារតែសង្គ្រាមពាណិជ្ជកម្មចិន-អាមេរិក និងតម្លៃរូបិយវត្ថុចិនធ្លាក់ចុះ។ ទេសចរចិនប្រមាណ ១,៥៦ លាននាក់បានទៅទស្សនាប្រទេសម៉ាឡេស៊ីនៅឆមាសទី ១ ក្នុងឆ្នាំនេះ។
ក្នុងរយៈពេល ៦ ខែដំបូងនៃឆ្នាំនេះទេសចរចំនួន ១៣,៣៥ លាននាក់បានទៅទស្សនាប្រទេសម៉ាឡេស៊ីពោលគឺកើនឡើង ៤,៩ ភាគរយធៀបនឹងរយៈពេលដូចគ្នាកាលពីឆ្នាំមុនដែលមាន ១២,៧៣ លាននាក់ និងទទួលបានចំណូលប្រមាណ ១០ ពាន់លានដុល្លារនៅក្នុងរយៈពេល ៦ ខែដើមឆ្នាំនេះ។
ថ្លែងទៅកាន់សមាជិកប្រព័ន្ធផ្សព្វផ្សាយអន្តរជាតិនៅទីក្រុងគូឡាឡាំពួកាលពីសប្តាហ៍មុន លោក Musa Yusof អគ្គនាយកទេសចរណ៍ម៉ាឡេស៊ីបានថ្លែងថា៖ «គំនិតផ្តួចផ្តើមយុទ្ធសាស្ត្រនេះត្រូវបានដាក់ចេញដើម្បីលើកកម្ពស់ យុទ្ធនាការទស្សនាប្រទេសម៉ាឡេស៊ី ឆ្នាំ ២០២០»។
ទីក្រុងគូឡាឡាំពួជាគោលដៅទេសចរណ៍ដ៏ទាក់ទាញសម្រាប់ភ្ញៀវទេសចរ។
«ដើម្បីសម្រេចបានគោលដៅរបស់យើង ទេសចរណ៍ម៉ាឡេស៊ីកំពុងបង្កើនកិច្ចខិតខំប្រឹងប្រែងទ្វេដងសម្រាប់ការផ្សព្វផ្សាយទាំងនៅក្នុងស្រុក និងអន្តរជាតិដែលយើងបានធ្វើតាំងពីដើមឆ្នាំ ២០១៨ មកម្ល៉េះ។ យុទ្ធសាស្ត្រថ្មីនេះត្រូវបានអនុវត្តដើម្បីជំរុញឧស្សាហកម្មទេសចរណ៍របស់ប្រទេសម៉ាឡេស៊ីដែលជាប្រភពចំណូលដ៏ធំមួយរបស់ប្រទេស និងបានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គម»។
លោក Musa បន្ថែមថា៖ «ជាលទ្ធផលនៃការផ្តួចផ្តើមយុទ្ធសាស្ត្រ និងកិច្ចខិតខំប្រឹងប្រែងផ្សព្វផ្សាយនានា យើងទទួលបានទេសចរអន្តរជាតិចំនួន ២៥,៨ លាននាក់ និងទទួលបានចំណូលចំនួន ៨៤,១ ពាន់លានរីងហ្គីត (កាលពីឆ្នាំមុន)»។
ប្រទេស ម៉ាឡេស៊ី នឹងផ្សព្វផ្សាយគោលដៅទេសចរណ៍ថ្មីៗដើម្បីទាក់ទាញទេសចរជំនាន់ថ្មី។
ដំណើរ Mega Fam សម្រាប់ប្រព័ន្ធផ្សព្វផ្សាយនេះត្រូវបានរៀបចំ ឡើងដោយទេសចរណ៍ម៉ាឡេស៊ីពីថ្ងៃទី ២-៧ ខែកញ្ញា។
ចំនួនភ្ញៀវទេសចរអន្តរជាតិកំពូលទាំង ១០ មកទស្សនាប្រទេសម៉ាឡេស៊ីសម្រាប់ឆមាសទី ១ នៃឆ្នាំ ២០១៩ គឺមកពីប្រទេសសិង្ហបុរី ឥណ្ឌូនេស៊ី ចិន ថៃ ប្រ៊ុយណេ ឥណ្ឌា កូរ៉េខាងត្បូង ហ្វីលីពីន វៀតណាម និងជប៉ុន។
លោក Musa Yusof លើកឡើងថាម៉ាឡេស៊ីមានអាកាសធាតុដ៏អំណោយផលពេញមួយឆ្នាំ។ ទេសចរនឹងទទួលបាននូវបទពិសោធដ៏អស្ទារ្យ ហើយពាក្យ Malaysia Turly Asia មិនមែនគ្រាន់តែជាការផ្សព្វផ្សាយប៉ុណ្ណោះទេ ប៉ុន្តែវាបង្ហាញពីតថភាពជាក់ស្តែងនៃជីវភាពរស់នៅប្រចាំថ្ងៃរបស់ប្រជាជនម៉ាឡេស៊ីដ៏សម្បូរបែប៕
