តាមរយៈកិច្ចខិតខំប្រឹងប្រែងរួមគ្នាជាមួយក្រសួងអប់រំ យុវជន និងកីឡាវិទ្យាស្ថានបើកទូលាយ និងក្រុមហ៊ុន Smart Axiata Co Ltd បានប្រកាសពីការចាប់ផ្ដើមផ្សព្វផ្សាយវីដេអូមេរៀនអនឡាញពីកម្មវិធី «Smart 1,000 Grade 12 Video Collection» ដើម្បីជួយដល់សិស្សានុសិស្ស អាចបន្តការសិក្សាពីចម្ងាយ និងដើម្បីរៀបចំខ្លួនសម្រាប់ការប្រឡងមធ្យមសិក្សាទុតិយភូមិនៅក្នុងឆ្នាំនេះ។
គំនិតផ្តួចផ្តើមនេះទទួលបានការគាំទ្រពីមូលនិធិទឹកប្រាក់ ១ លានដុល្លាររបស់ក្រុមហ៊ុន Smart Axiata ដើម្បីប្រឆាំងជំងឺកូវីដ១៩ ខណៈមកដល់ពេលនេះ សាលារៀននៅទូទាំងប្រទេសមិនទាន់បើកឡើងវិញទូលំទូលាយនៅឡើយ។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានមានប្រសាសន៍ថា៖ «ខណៈដែលក្រសួងអប់រំ យុវជន និងកីឡាកំពុងតែពង្រីកកាលានុវត្តភាពនៃការសិក្សាពីចម្ងាយ ដូច្នេះមូលនិធិរបស់ក្រុមហ៊ុន Smart Axiata គឺជាជំនួយយ៉ាងធំធេងដល់កិច្ចខិតខំប្រឹងប្រែងរបស់ក្រសួង ដោយបានជួយទ្រទ្រង់ដល់ប្រព័ន្ធអប់រំរបស់កម្ពុជាតាមរយៈបច្ចេកវិទ្យាឌីជីថល»។
គំនិតផ្ដួចផ្ដើមនេះផ្ដោតលើសិស្សថ្នាក់ទី ១២ ពីព្រោះសិស្សដែលកំពុងរៀនឆ្នាំចុងក្រោយ សម្រាប់មធ្យមសិក្សាចាំបាច់ត្រូវត្រៀម លក្ខណៈសម្រាប់ការប្រឡងបញ្ចប់ហើយបន្តចូលទៅរៀននៅសាកលវិទ្យាល័យ។
ក្រុមហ៊ុន Smart Axiata បាននិយាយនៅក្នុងសេចក្តីប្រកាសព័ត៌មានថា៖ «កម្មវិធី Smart 1,000 Grade 12 Video Collection នឹងក្លាយជាធនធានដ៏សំខាន់សម្រាប់សិស្សថ្នាក់ទី ១២ នាឆ្នាំនេះក៏ដូចជាពេលអនាគត ហើយបណ្ណាល័យឌីជីថលដែលមានផ្ទុកវីដេអូអនឡាញនេះក៏នឹងជួយដល់ការត្រៀមខ្លួនជាស្រេចរបស់ក្រសួងអប់រំ សម្រាប់ពេលអនាគតផងដែរ»។
មូលនិធិនេះបានជួយគុណតម្លៃយ៉ាងច្រើនបន្ថែមទៀត ដល់កិច្ចសហការ និងភាពជាដៃគូយូរអង្វែងរវាងក្រុមហ៊ុន Smart Axiata ក្រសួងអប់រំ យុវជន និងកីឡា និងវិទ្យាស្ថានបើកទូលាយ។
រហូតមកទល់នឹងពេលនេះមានវីដេអូចំនួនជាង ៤០០ ហើយដែលបានផលិតឡើង។ ខណៈដែលមានវីដេអូជាច្រើនទៀតកំពុងស្ថិតក្នុងដំណើរការផលិតក្នុងពេលនេះដែរ ក្រសួងអប់រំ នឹងចាប់ផ្ដើមសម្ពោធឲ្យប្រើប្រាស់វីដេអូដែលបានរៀបចំយ៉ាងមានរបៀបរៀបរយ។ វីដេអូទាំងនោះនឹងត្រូវបានចាក់ផ្សាយនៅលើទំព័របណ្ដាញសង្គមរបស់ក្រសួងរួមមាននៅលើទំព័រ Facebook និងទំព័រ YouTube របស់ក្រសួងផ្ទាល់ ក៏ដូចជានៅលើប៉ុស្តិ៍ទូរទស្សន៍កម្ពុជា ២ ( ប៉ុស្តិ៍អប់រំ TVK 2) ផងដែរ។
លោក Thomas Hundt នាយកប្រតិបត្តិក្រុមហ៊ុន Smart Axiata បានមានប្រសាសន៍ថា៖ «យើងមានបំណងចង់ធានាថាការបិទទ្វារសាលាមិនមែនជាឧបសគ្គឡើយសម្រាប់ការអប់រំសិស្សនៅកម្ពុជា។ ក្រុមហ៊ុន Smart តែងមានការប្ដេជ្ញាចិត្តក្នុងការជួយទ្រទ្រង់ដល់វិស័យអប់រំនៅក្នុងប្រទេសកម្ពុជានេះ។ យើងមានជំនឿចិត្តលើការធ្វើការជាដៃគូ និងកិច្ចសហប្រតិបត្តិការ ដូច្នេះហើយទើបមូលនិធិទឹកប្រាក់ ១ លានដុល្លាររបស់ ក្រុមហ៊ុន Smart Axiata ត្រូវបានបង្កើតឡើងដើម្បីជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងជួយដល់សហគមន៍ដែលទទួលរងផលប៉ះពាល់ពីវិបត្តិជំងឺរាតត្បាតសកល»។
មូលនិធិនេះផ្ដោតលើគំនិតផ្ដួចផ្ដើមនានាដោយផ្អែកលើគោលដៅចំនួនបួនរួមមាន៖ បច្ចេកវិទ្យាព័ត៌មានវិទ្យាសម្រាប់ការអប់រំ ការគ្រប់គ្រងវិបត្តិគម្លាតសង្គម និងអនាម័យផ្ទាល់ខ្លួន។ កម្មវិធីកិច្ចសហការជាដៃគូ រវាងស្ថាប័នឯកជន និងរដ្ឋត្រូវបានជំរុញលើក ទឹកចិត្តឲ្យដាក់សំណើមកកាន់មូលនិធិនេះ ដើម្បីទទួលបានជំនួយមូលនិធិរហូតដល់ទៅ ២០ ម៉ឺនដុល្លារសហរដ្ឋអាមេរិកសម្រាប់កម្មវិធីនីមួយៗ ។
ថ្លែងនៅក្នុងព្រឹត្តិការណ៍នោះលោក Javier Sola នាយកប្រតិបត្តិនៃវិទ្យាស្ថានបើកទូលាយបានថ្លែងថា៖ «ការគាំទ្រផ្នែកហិរញ្ញវត្ថុដែលទទួលបានពីមូលនិធិសង្គ្រោះនេះបានផ្ដល់លទ្ធភាពឲ្យវិទ្យាស្ថានយើងខ្ញុំក្នុងការកសាងស្ទូឌីយោថតដ៏ទំនើបចំនួន ២ យ៉ាងឆាប់រហ័សដែលសុទ្ធតែជាស្ទូឌីយោការពារសំឡេង និងបំពាក់ទៅដោយក្ដារខៀនវៃឆ្លាត ឧបករណ៍ថតសំឡេង និងម៉ាស៊ីនថតវីដេអូលំដាប់ខ្ពស់។ នៅពេលនេះស្ទូឌីយោទាំងពីរនេះកំពុងដំណើរការប្រកបដោយភាពពេញលេញ ដូច្នេះយើងអាចផលិតវីដេអូបានចំនួនរហូតដល់ទៅ ៨០ វីដេអូ បង្រៀនក្នុងមួយថ្ងៃ។
ក្រុមការងារត្រួតពិនិត្យគុណភាពបានធ្វើការយ៉ាងហ្មត់ចត់ ដើម្បីធានាថារាល់វីដេអូដែលបានថតគោរពតាមបទដ្ឋានរបស់ក្រសួង និងមានគុណភាពខ្ពស់សម្រាប់ការចាក់ផ្សាយ។ យើងពិតជាមានសេចក្ដីរំភើបរីករាយក្នុងការធ្វើការជាមួយនឹងលោកគ្រូអ្នកគ្រូដ៏ចំណាន និងក្រុមការងារដែលឧស្សាហ៍ព្យាយាមក្នុងការផលិតវីដេអូទាំងអស់នេះ»។
កាលពីខែមីនា គ្រប់សាលារៀនទាំងអស់ត្រូវបានតម្រូវឲ្យបិទទ្វារដើម្បីរារាំងការរាតត្បាតនៃជំងឺកូវីដ-១៩។ ដោយមើលឃើញពីតម្រូវការបន្ទាន់ក្នុងការជួយគាំទ្រសម្ភារសិក្សាពីចម្ងាយសម្រាប់សិស្សថ្នាក់ទី ១២ ក្នុងការត្រៀមប្រឡង វិទ្យាស្ថានបើកទូលាយបានដាក់សំណើមកកាន់មូលនិធិ ដើម្បីអនុវត្តគម្រោងរួមគ្នាជាមួយក្រសួង អប់រំ យុវជន និងកីឡា និងក្រុមហ៊ុន Smart Axiata៕