ខណៈការធ្វើដំណើរកម្សាន្តនៅក្នុងស្រុកកំពុងកើនឡើងនោះ រមណីយដ្ឋាន ថ្ងៃបាំងឆត្រដែលស្ថិតនៅក្នុងខេត្តកែប គឺជារមណីយដ្ឋានដ៏ល្អឥតខ្ចោះ សម្រាប់អ្នកដែលស្វែងរកកន្លែងសម្រាកលម្ហែ ថ្ងៃឈប់សម្រាកក្នុងស្រុកដែលពោរពេញទេសភាពដ៏ស្រស់ត្រកាលគួរជាទីមនោរម្យ។
លោក Jef Moons ដែលជាម្ចាស់រមណីយដ្ឋានថ្ងៃបាំងឆត្របានឲ្យកាសែតភ្នំពេញប៉ុស្តិ៍ដឹងថា ខណៈការរីករាលដាលជំងឺកូវីដ១៩ ធ្វើឲ្យទេសចរអន្តរជាតិធ្លាក់ចុះនោះ រមណីយដ្ឋានថ្ងៃបាំងឆត្រដ៏ប្រណីតបានបើកទទួលស្វាគមន៍ភ្ញៀវសាជាថ្មី និងប្រកបដោយសុវត្ថិភាព សម្រាប់ភ្ញៀវទេសចរដែលមកកម្សាន្តនៅរមណីយដ្ឋានដ៏ស្រស់បំព្រងមួយនេះ។
«វាតែងតែមានរឿងល្អ សូម្បីតែនៅក្នុងស្ថានភាពមិនល្អបំផុត។ បច្ចុប្បន្ន យើងកំពុងមើលឃើញកំណើនការធ្វើដំណើររបស់ភ្ញៀវទេសចរក្នុងស្រុកជាពិសេសការធ្វើដំណើរកម្សាន្ត និងទស្សនាសម្រស់ធម្មជាតិដ៏សម្បូរបែប និងស្រស់ស្អាតរបស់ប្រទេសកម្ពុជា»។
លោក Moons ថ្លែងថា« រមណីយដ្ឋានថ្ងៃបាំងឆត្របានចាប់ផ្តើមពេញលេញឡើងវិញហើយ។ នៅឯរមណីយដ្ឋានថ្ងៃបាំងឆត្រ យើងខិតខំធ្វើឲ្យកាន់តែប្រសើរឡើងជារៀងរាល់ថ្ងៃ ហើយយើងពិតជាមោទនភាពដែលយើងនៅតែអាចបម្រើអតិថិជនបានល្អបំផុត។ ពេលនេះ រមណីយដ្ឋានថ្ងៃបាំងឆត្រសូមស្វាគមន៍ទេសចរក្នុងស្រុក ដើម្បីចែករំលែកចំណងមិត្តភាពរបស់យើងតាមវិធីដ៏បរិសុទ្ធបំផុតដោយការចែករំលែកផ្អែកលើទស្សនវិទ្យាជប៉ុន «wabi sabi» និងសម្រស់ដ៏ស្រស់ស្អាតនៃខេត្តកែប»។
រមណីយដ្ឋានថ្ងៃបាំងឆត្រមានវីឡាដ៏ប្រណីត និងស្រស់ស្អាតដែលត្រូវបានរចនាដោយលោក វណ្ណ ម៉ូលីវណ្ណ ដែលជាស្ថាបត្យករដ៏ល្បីល្បាញរបស់កម្ពុជា ក្នុងទសវត្សរ៍ឆ្នាំ ១៩៦០ ដោយភ្ញៀវអាចគយគន់ទេសភាពផ្ទៃសមុទ្រខៀវស្រងាត់ និងមានចម្ងាយដើរតែ ៥ នាទីប៉ុណ្ណោះពីផ្សារក្តាមដ៏ល្បីល្បាញរបស់ក្រុងកែប។
លោក Moons ជឿជាក់ថា ភាពស្ងប់ស្ងាត់ និងសម្រស់ដ៏អស្ចារ្យរបស់ខេត្តកែបនឹងបន្តទាក់ទាញភ្ញៀវទេសចរទាំងអស់ដែលរស់នៅក្នុងព្រះរាជាណាចក្រកម្ពុជាឲ្យមកទស្សនាខេត្តជាប់ឆ្នេរសមុទ្រមួយនេះកាន់តែច្រើន។
«កាន់តែពិសេសទៀតនោះ ខ្ញុំជឿជាក់ថា ខេត្តកែបគឺជាតារាដែលកំពុងតែរះ ហើយនឹងក្លាយជាផ្នែកមួយនៃចំណុចកណ្តាលនៃវិស័យទេសចរណ៍ប្រកបដោយចីរភាព និងលំដាប់ខ្ពស់។ តំបន់របស់យើងនឹងកាន់តែមានភាពទាក់ទាញនៅប៉ុន្មានឆ្នាំខាងមុខ»។
លោក Moons មានសុទិដ្ឋិនិយមខ្ពស់ចំពោះអនាគតនៃរមណីយដ្ឋានរបស់លោកដោយថ្លែងថា៖« រមណីយដ្ឋានថ្ងៃបាំងឆត្របានត្រៀមខ្លួនរួចជាស្រេចដើម្បីប្រឈមនឹងបរិបទថ្មីជាពិសេស នៅពេលទីផ្សារក្នុងស្រុកមានភាពចម្រុះកាន់តែច្រើន ហើយទេសចរកំពុងស្វែងរកការលម្ហែកម្សាន្តនៅរមណីយដ្ឋានរបស់យើងកាន់តែច្រើន។ យើងតែងតែផ្តល់នូវគុណតម្លៃ យើងនឹងមិនមែនគ្រាន់តែលក់បន្ទប់នោះទេ។ យើងកំពុងបង្កើតអ្វីដែលថ្មីដើម្បីបំពេញគ្រប់តម្រូវការទាំងអស់»។
«ពេលនេះគឺផ្តោតបន្ថែមលើភាពរ៉ូមែនទិក និងសុវត្ថិភាពសម្រាប់គ្រប់គ្នា ខណៈមានអាហារសមុទ្រស្រស់ៗ និងរបៀបរស់នៅខាងក្រៅប្រកបដោយផាសុកភាពតាមរយៈការបោះតង់រដូវក្តៅ និងការជិះទូកកម្សាន្ត។ យើងបន្តផ្តោតលើប្រវត្តិសាស្ត្រ សិល្បៈ ស្ថាបត្យកម្ម និងតម្លៃ [ការទទួលខុសត្រូវសង្គមរបស់ក្រុមហ៊ុន] ខណៈកំពុងអភិវឌ្ឍគោលដៅដំណើរផ្សងព្រេងសម្រាប់ទេសចរក្នុងស្រុក»។
ខណៈពេលដែលរមណីយដ្ឋាននេះផ្តល់ជូនកញ្ចប់រដូវបៃតង (Green Season) និងការផ្តល់ជូនកញ្ចប់ពាក់កណ្តាលសប្តាហ៍ គេក៏កំពុងបើកវគ្គបង្រៀនរបៀបជិះទូកកម្សាន្តនៅរៀងរាល់ថ្ងៃសៅរ៍ផងដែរ។ ហើយក៏មានដំណើរកម្សាន្តតាមសួនប្រកបដោយចីរភាពដែលមានទំហំ ៣,៥ ហិកតាក្នុងនោះរួមមានអាងហែលទឹកដ៏ទំនើប ទីធ្លាសួនច្បារធម្មជាតិ និងក្លិបជិះទូកកម្សាន្ត។
«សាររបស់យើងគឺ «ភាពត្រឹមត្រូវ និងស្មោះត្រង់»។ យើងបានកែសម្រួលមិនត្រឹមតែតម្លៃរបស់យើងប៉ុណ្ណោះទេ យើងក៏បានបង្កើតកញ្ចប់ផ្សេងៗដើម្បីបំពេញតម្រូវការរបស់បុគ្គលម្នាក់ៗ។ កញ្ចប់ស្នាក់នៅពាក់កណ្តាលសប្តាហ៍និងកញ្ចប់រដូវកាលបៃតង គឺដើម្បីគាំទ្រដល់ចំណូលចិត្តរបស់បុគ្គលនីមួយៗ។ ការផ្តល់ជូនចំពោះកញ្ចប់ស្នាក់នៅពាក់កណ្តាលសប្តាហ៍របស់យើងឥឡូវនេះក៏មានភាពងាយស្រួល ដែលភ្ជាប់ជាមួយការបោះតង់រដូវក្តៅ និងការជិះទូកកម្សាន្តផងដែរ។
«ខ្ញុំពេញចិត្តគំនិតដែលថានៅពេលភ្ញៀវកក់កញ្ចប់កម្សាន្តពាក់កណ្តាលសប្តាហ៍ គឺយើងអាចមើលថែរក្សាកូនៗរបស់ពួកគេបាន។ វាពិតជាការផ្តល់នូវដំណោះស្រាយដ៏ល្អសម្រាប់គ្រួសារទាំងមូលដែលបំពេញតាមតម្រូវការទីផ្សារក្នុងស្រុកសព្វថ្ងៃ»។
បុរសជនជាតិបែលហ្ស៊ិករូបនេះបន្ត ថា ខណៈឧស្សាហកម្មទេសចរណ៍កំពុងប្រឈមនឹងការផ្លាស់ប្តូរខ្លាំង ការសម្របខ្លួនគឺមានសារៈសំខាន់បំផុត។
«នេះជាពេលវេលាផ្លាស់ប្តូរ។ ខ្ញុំជឿជាក់ថាមនុស្សកាន់តែច្រើននឹងស្វែងរកបទពិសោធពិតប្រាកដ និងបរិបទដែលអាចទុកចិត្តបានសម្រាប់ការធ្វើដំណើរកម្សាន្ត ឬការធ្វើដំណើរលក្ខណៈអាជីវកម្ម»។
លោក Moons បន្តថា៖ «សព្វថ្ងៃយើងកំពុងមើលឃើញការផ្លាស់ប្តូរយ៉ាងខ្លាំង នៅក្នុងគំរូនៃការធ្វើដំណើរក៏ដូចជានៅក្នុងទីផ្សារទេសចរណ៍។ នៅក្នុងពេលវេលាដែលមិនច្បាស់លាស់ «សូមស្តាប់អ្វីៗដែលកំពុងកើតឡើងនៅជុំវិញ ហើយធ្វើការផ្លាស់ប្តូរ» នេះគឺជាសារសម្រាប់យើងទាំងអស់គ្នា»៕