ដោយការចូលរួមជាមួយយុទ្ធនាការសកលក្នុងការដាំដើមឈើ សម្រាប់ការពារបរិស្ថានប្រកបដោយចីរភាព និងដើម្បីទប់ស្កាត់ការបម្រែបម្រួលអាកាសធាតុផងនោះ ដើមឈើចំនួន ១០ ០០០ ដើម នឹងត្រូវដាំនៅក្នុងខេត្តសៀមរាប នៅថ្ងៃទី ៣ ខែ សីហា ខាងមុខ។
យុទ្ធនាការដាំដើមឈើនេះកើតឡើង ស្របពេលដែលប្រទេស កម្ពុជា និងប្រទេសដទៃទៀតនៅក្នុងពិភពលោកកំពុងប្រឈមនឹងហានិភ័យពីការប្រែប្រួលអាកាសធាតុ ការកើនឡើងកម្តៅ ដែលធ្វើឲ្យប៉ះពាល់ដល់ជីវិតមនុស្ស សត្វ និងរុក្ខជាតិយ៉ាងខ្លាំង។
យុទ្ធនាការដាំដើមឈើនេះ ស្ថិតក្រោមប្រធានបទ «យើងរួមគ្នាព្យាបាលដំបៅផែនដី» ដែលផ្តួចផ្តើមដោយសកម្មជនសង្គម លោក តាន់ គឹមសួរ និងគាំទ្រដោយសមាគមក្លឹបទេសចរណ៏សៀមរាប (STC)។ ការជួបជុំស្តីពីការចាប់ផ្តើមយុទ្ធនាការនេះត្រូវបានធ្វើឡើងកាលពីថ្ងៃទី ១០ ខែ កក្កដា នៅក្នុងខេត្តសៀមរាប។
លោក តាន់ គឹមសួរ ថ្លែងថា៖ «ការដាំដើមឈើនេះ គឺដើម្បីការពារផែនដីរបស់យើង ពីព្រោះផែនដីនេះមិនមែនជារបស់អ្នកណាម្នាក់ទេ ប៉ុន្តែជារបស់ពួកយើងទាំងអស់គ្នា ដូច្នេះពួកយើងមានកាតព្វកិច្ចមួយ គឺចូលរួមថែរក្សា»។
ជាសរុប ដើមឈើចំនួន ១០ ម៉ឺនដើម នឹងត្រូវដាំនៅទូទាំងប្រទេសជាដំណាក់កាលៗក្នុងរយៈពេល ៥ ឆ្នាំ។ ប្រភេទដើមឈើដែលត្រូវដាំ គឺជាប្រភេទឈើប្រណិត ដូចជា ផ្ចឹក បេង នាងនួន និងគ្រញូង ជាដើម។
ការចាប់ផ្តើមដាំដំបូងនឹងប្រព្រឹត្តទៅនៅព្រៃទទឹងថ្ងៃ ភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប។ លោក Philip Kao ប្រធាន STC ថ្លែងថា យុទ្ធនាការនេះ គឺមានសារៈសំខាន់ណាស់សម្រាប់ប្រទេសជាតិហើយភាគីពាក់ព័ន្ធទាំងអស់ត្រូវសហការគ្នា ដើម្បីធ្វើឱ្យគំនិតផ្តួចផ្តើមនេះទទួលបានជោគជ័យដើម្បីការពារបរិស្ថាន។
លោក Philip បន្ថែមថា៖ «រដ្ឋាភិបាលបានដាំដើមឈើតាមរយៈខេត្តនីមួយៗ មន្ទីរនីមួយៗ ក្រសួងនីមួយៗ។ ដូច្នេះសកម្មភាពនេះ គឺយើងចង់បញ្ជាក់ថាជាការចូលរួម ទាំងរដ្ឋាភិបាល ទាំងវិស័យឯកជន ក្នុងគោលបំណងមួយធ្វើយ៉ាងណាធ្វើឲ្យប្រទេសយើងបានដើមឈើច្រើនត្រឡប់មកវិញ»។
លោកក៏សំណូមពរដល់រដ្ឋាភិបាលជួយជំរុញឲ្យមានការដាំដើមឈើឲ្យបានច្រើនបន្ថែមទៀត ជំរុញឲ្យអាជ្ញាធរមូលដ្ឋានជួយថែរក្សាដើមឈើដែលបានផ្តួចផ្តើមដាំថ្មីនេះ ក៏ដូចជាទប់ស្កាត់ការកាប់ព្រៃឈើដែលគ្មានការអនុញ្ញាត។
លើសពីនេះទៀត លោក Philip សង្កត់ធ្ងន់ថា យុទ្ធនាការដាំដើមឈើនេះគួរតែជាផ្នែកមួយដែលត្រូវដាក់បញ្ចូលនៅក្នុងកម្មវិធីសិក្សាចាប់ពីថ្នាក់បឋមសិក្សារហូតដល់ថ្នាក់ឧត្តមសិក្សាដើម្បីលើកកម្ពស់ការយល់ដឹងអំពីបរិស្ថាន និងហានិភ័យនៃការប្រែប្រួលអាកាសធាតុ។
លោកបន្ថែមថា៖ «ដូច្នេះដើម្បីទ្រទ្រង់ដល់ប្រព័ន្ធអេកូចាំបាច់ គឺត្រូវឲ្យមានការចូលរួមពីមនុស្សគ្រប់គ្នា។ បើមានការចូលរួមពីប្រជាពលរដ្ឋបន្ថែមនោះ ការងារដែលយើងធ្វើនេះនឹងកាន់តែមានប្រសិទ្ធភាព»។
យោងតាមក្រុមអ្នកជំនាញបានឲ្យដឹងថាព្រៃឈើបានដើរតួនាទីយ៉ាងសំខាន់នៅក្នុងប្រព័ន្ធអេកូ។ ព្រៃឈើជួយស្រូបកាបូនឌីអុកស៊ីតពីខ្យល់អាកាស និងបញ្ចេញអុកស៊ីហ៊្សែន កាត់បន្ថយផលប៉ះពាល់នៃការប្រែប្រួលអាកាសធាតុ និងកាត់បន្ថយកម្តៅ។
លោក ប៉ាត បូរី នាយកគ្រប់គ្រងប្រចាំតំបន់នៃក្រុមហ៊ុន Booking.com យល់ឃើញថា បងប្អូនយើងបានទទួលស្គាល់ថា ព្រៃឈើរបស់យើង ឬព្រៃឈើនៅលើពិភពលោកបានថមថយចុះ។ ដូច្នេះហើយដល់ពេលដែលប្រជាពលរដ្ឋគ្រប់រូបត្រូវយកចិត្តទុកដាក់ឲ្យបានខ្លាំងក្លាអំពីផលប៉ះពាល់ដល់បរិស្ថាន។
លោក បូរី ថ្លែងថា៖ «យើងមានគោលដៅ ២ ច្បាស់លាស់។ ទី១ គឺយើងដាំដើមឈើទុកជាកេរដំណែលសម្រាប់កូនចៅយើងក្នុងជំនាន់នេះ និងជំនាន់ក្រោយ។ ទី២ គឺយើងចង់បណ្តុះ និងបំផុសគំនិត ឲ្យបងប្អូនយើងចេះស្រឡាញ់ ថែរក្សា និងដាំដើមឈើ»។
ការដាំដើមឈើនេះនឹងត្រូវធ្វើឡើងនៅតាមទីសាធារណៈផ្សេងៗ ដូចជានៅតាមសាលារៀន ឬវត្តអារាមជាដើម ពីព្រោះទីកន្លែងទាំងនោះនឹងមានការថែទាំបានល្អ។
លោកបន្តថា៖ «យើងចង់ដាំដើមឈើឲ្យបាននៅគ្រប់វត្ត និងគ្រប់សាលារៀន ដើម្បីបញ្ចូលភាពស្រឡាញ់ដើមឈើ និងពន្យល់ប្រជាពលរដ្ឋអំពីសារៈសំខាន់ និងអត្ថប្រយោជន៍នៃដើមឈើចំពោះមនុស្សលោក»។
លោក បូរី បន្ថែមថា៖ «រហូតមកដល់ពេលនេះ យើងទទួលបានការគាំទ្រច្រើនពីមន្ត្រីនៅថ្នាក់មូលដ្ឋានពីមន្ទីរ និងពីក្រសួងបរិស្ថាន»៕