.jpg)
អ្នកចូលរួមរៀនអំពីរបៀបប្រើប្រាស់បំពង់ពន្លត់អគ្គិភ័យឲ្យបានត្រឹមត្រូវ។
វិទ្យាស្ថានជាតិ សុវត្ថិភាព និងពន្លត់ អគ្គិភ័យ (NFAC) បានចាត់វិធានការដ៏សំខាន់មួយទៀតដើម្បីលើកកម្ពស់ការយល់ដឹងសុវត្ថិភាពអគ្គិភ័យ បន្ទាប់ពីបានបើកដំណើរការជិត ២ ខែតាមរយៈការបើកវគ្គបណ្តុះបណ្តាលរយៈពេលពេញ ១ ថ្ងៃ សម្រាប់សិក្ខាកាមមកពីវិស័យផ្សេងៗអំពីវិធីសាស្ត្របង្ការ និងពន្លត់អគ្គិភ័យ។
នៅក្នុងវគ្គបណ្តុះបណ្តាលរយៈពេលពេញ ១ ថ្ងៃដែលរៀបចំឡើងដោយវិទ្យាស្ថានជាតិ សុវត្ថិភាព និងពន្លត់អគ្គិភ័យ (NFAC)នេះ សិក្ខាកាមទទួលបានការបណ្តុះបណ្តាល និងអនុវត្តផ្ទាល់ស្តីពីការប្រើប្រាស់ឧបករណ៍ពន្លត់អគ្គិភ័យ ពួកគេទទួលបានចំណេះដឹងផ្នែកទ្រឹស្តីក្នុងប្រតិបត្តិការពន្លត់អគ្គិភ័យ និងវិធីសាស្ត្រជួយសង្គ្រោះក្នុងពេលមានអាសន្ន។
លោក Gary Kidd អនុប្រធានមជ្ឈមណ្ឌលជាតិត្រួតពិនិត្យគុណភាពប្រព័ន្ធបង្ការ និងពន្លត់អគ្គិភ័យ (NICS) ថ្លែងថា៖ «ផ្នែកសំខាន់នៃយុទ្ធសាស្ត្របង្ការ និងពន្លត់អគ្គិភ័យគឺបុគ្គលិកដែលនៅក្នុងអគារ ឬតំបន់ដែលមានហានិភ័យពីអគ្គិភ័យក៏ដូចជាជំនាញ និងចំណេះដឹងរបស់ពួកគេ។
អ្នកពន្លត់អគ្គិភ័យអាចជាបុគ្គលិកធ្វើការធម្មតា ប៉ុន្តែពួកគេទទួលបានការបណ្តុះបណ្តាលបន្ថែមដើម្បីការពារអំពីគ្រោះថ្នាក់ និងហានិភ័យនៃអគ្គិភ័យជួយអង្កេតមើលផ្លូវរត់គេចដែលអាចមានអ្វីរាំងស្ទះដល់ផ្លូវរត់គេចចេញពីអគារក្នុងករណីមានអគ្គិភ័យ ពួកគេអាចជូនដំណឹងក្នុងករណីមានអគ្គិភ័យកើតឡើង ពួកគេចេះពីរបៀបជួយជម្លៀសមនុស្សចេញពីអគារក្នុងករណីមានអាសន្ន ឬជួយពន្លត់អគ្គិភ័យ ប្រសិនបើមានសុវត្ថិភាពសម្រាប់ពួកគេក្នុងការធ្វើដូច្នេះ»។
អនុវត្តការជម្លៀសចេញក្នុងករណីមានអគ្គិភ័យកើតឡើង។
NFAC ប្រតិបត្តិការដោយក្រុមហ៊ុនខេមបូឌាន ហ្វែរវីន អ៊ីនធើប្រាយ ខមភេនី លីមីធីត (CFE) ដែលស្ថិតនៅក្រោមការគ្រប់គ្រងរបស់អគ្គស្នងការដ្ឋាននគរបាលជាតិ និងក្រសួងមហាផ្ទៃ។
វគ្គបណ្តុះបណ្តាលអ្នកពន្លត់អគ្គិភ័យនេះត្រូវបានធ្វើឡើងដោយមានកិច្ចសហការយ៉ាងជិតស្និទ្ធរវាងក្រុមហ៊ុន ខេមបូឌាន ហ្វែរវីន និងអគ្គស្នងការដ្ឋាននគរបាលជាតិ។ វិទ្យាស្ថានជាតិ សុវត្ថិភាព និងពន្លត់អគ្គិភ័យ (NFAC) នេះត្រូវបានបើកសម្ពោធជាផ្លូវការកាលពីថ្ងៃទី ១៧ ខែមករា។
លោក Gary Kidd បានបន្ថែមថា៖ «មានប្រធានបទសំខាន់ៗជាច្រើននៅក្នុងវគ្គបណ្តុះបណ្តាលនេះក្នុងនោះមានដូចជាការបង្រៀនអំពីតួនាទី និងការទទួលខុសត្រូវរបស់អ្នកពន្លត់អគ្គិភ័យ ការស្វែងយល់អំពីគោលការណ៍នៃអគ្គិភ័យថ្នាក់គ្រោះនៃអគ្គិភ័យ ការសង្កេតស្ថានភាពអាសន្ន ការគ្រប់គ្រងហានិភ័យ ការអនុវត្ត ការជម្លៀសចេញ ត្រូតពិនិត្យឧបករណ៍ប្រកាស អាសន្ន ប្រតិបត្ដិការជាក់ស្តែងនានា និងរៀនពីវិធីប្រើប្រាស់បំពង់ពន្លត់អគ្គិភ័យជាដើម»។
លោក អេង សុផា អ្នកត្រួតពិនិត្យផ្នែកគុណភាព និងសុវត្ថិភាពនៅអាកាសយានដា្ឋនអន្តរជាតិភ្នំពេញដែលលោកជាសិក្ខាកាមម្នាក់បានចូលរួមនៅក្នុងវគ្គបណ្តុះបណ្តាលនេះដែរ បានឲ្យភ្នំពេញប៉ុស្តិ៍ដឹងថា៖ «វគ្គបណ្តុះបណ្តាលនេះមានអត្ថប្រយោជន៍ខ្លាំងណាស់ ពីព្រោះវាបានផ្តល់ចំណេះដឹងបន្ថែមទាក់ទងនឹងការបង្ការ និងពន្លត់អគ្គិភ័យ ដែលវាទាក់ទងនឹងការងារប្រចាំថ្ងៃរបស់ខ្ញុំ។
តាមរយៈវគ្គបណ្តុះបណ្តាលនេះខ្ញុំទទួលបានចំណេះដឹងច្រើនអំពីការប្រើប្រាស់ឧបករណ៍ពន្លត់អគ្គិភ័យកាន់តែច្បាស់។ ដូច្នេះខ្ញុំសង្ឃឹមថាតាមរយៈវគ្គបណ្តុះបណ្តាលនេះវានឹងជួយការងារបស់ខ្ញុំឲ្យកាន់តែប្រសើរ»។
សិក្ខាកាមទទួលវិញ្ញាបនបត្របញ្ជាក់ការសិក្សាពីលោក Gary Kidd។
សិក្ខាកាមជិត ៦០ នាក់ បានចូលរួមក្នុងវគ្គបណ្តុះបណ្តាលនេះ។ ពួកគេក៏ទទួលបានវិញ្ញាបនបត្របញ្ជាក់ការសិក្សាផងដែរ ដែលចេញដោយ NFAC តាមរយៈការប្រឡងនៅពេលបញ្ចប់វគ្គបណ្តុះបណ្តាលនេះ។
សិក្ខាកាមម្នាក់ទៀតឈ្មោះ វ៉ែន ស៊ូយ៉ាណា ប្រធានវិស្វករនៅសណ្ឋាគារអូឡាំព្យាស៊ីធី បានថ្លែងថា៖ «វគ្គបណ្តុះបណ្តាលនេះបានបង្រៀនឲ្យយើងយល់ដឹងអំពីរបៀបជម្លៀសមនុស្សចេញពីអគាររបៀបប្រើប្រាស់បំពង់ពន្លត់អគ្គិភ័យឲ្យបានត្រឹមត្រូវ។
ខ្ញុំទទួលបានចំណេះដឹងច្រើនអំពីការបង្ការអគ្គិភ័យ ហើយខ្ញុំនឹងយកចំណេះដឹងទាំងនេះទៅអនុវត្តនៅស្ថាប័នដែលខ្ញុំធ្វើការ ដើម្បីបង្ការអគ្គិភ័យឲ្យកាន់តែមានប្រសិទ្ធភាព»។
យោងតាមនាយកដ្ឋានអគ្គិភ័យនៃក្រសួងមហាផ្ទៃបានឲ្យដឹងថាក្នុងឆ្នាំ ២០១៩ ករណីអគ្គិភ័យមានចំនួន ៧១៧ ករណី ពោលគឺកើនឡើងចំនួន ១៨៣ ករណី បើធៀបនឹងឆ្នាំ ២០១៨ ដែលមានចំនួន ៥៣៤ ករណី។ ដោយឡែកនៅក្នុងខែមករាដើមឆ្នាំ ២០២០ នេះអគ្គិភ័យមានចំនួន ៧៧ ករណី៕
