.jpg)
រោងចក្រផលិតម្រេចដែលមានទីតាំងស្ថិតនៅក្នុងស្រុកមេមត់ ខេត្តត្បូងឃ្មុំ។
បើនិយាយពីម្រេចគ្រប់គ្នាភាគច្រើនស្គាល់តែម្រេចដែលដាំដុះក្នុងទឹកដីខេត្តកំពត ដោយសារមានរសជាតិឈ្ងុយឆ្ងាញ់ គុណភាពខ្ពស់ និងជាទំនិញម៉ាកសម្គាល់ភូមិសាស្ត្រ GI ដែលត្រូវបានចុះបញ្ជីទទួលស្គាល់ជោគជ័យដោយសហភាពអឺរ៉ុប។ តែជាក់ស្តែងម្រេចកម្ពុជា មិនមែនដាំបានតែក្នុងខេត្តកំពតនោះទេពោលគឺអាចដាំបាននៅតាមបណ្តាខេត្តមួយចំនួនក្នុងប្រទេសកម្ពុជា។
ដើម្បីលើកកម្ពស់គុណភាពម្រេចនៅតំបន់ផ្សេងទៀតឱ្យសាធារណជនទាំងក្នុង និងក្រៅស្រុកបានស្គាល់ សហគ្រិនស្ត្រីឆ្នើម ១ រូប កញ្ញា ស៊ឹង សុផា ខិតខំជម្នះគ្រប់បញ្ហាប្រឈមនានាដើម្បីបញ្ជាក់ថា ម្រេចខ្មៅមកពីខេត្តត្បូងឃ្មុំ គឺល្អដូចម្រេចដែលផលិតនៅតំបន់ផ្សេងទៀតនៃព្រះរាជាណាចក្រកម្ពុជា។
ប៉ុន្តែវាមិនងាយស្រួលដូចការនិយាយនោះទេ សហគ្រិនវ័យក្មេងរូបនេះត្រូវប្រកួតប្រជែងជាមួយផលិតផលម្រេចគ្រួសារ គឺម្រេចកំពតដែលត្រូវបានគេស្គាល់យ៉ាងទូលំទូលាយ ដោយសាររសជាតិ និងគុណភាពហើយវាត្រូវបានលក់នៅទូទាំងប្រទេស។ ប្រហែលជា ៥ ឆ្នាំមកនេះ ដោយមានជំនួយពីវិនិយោគិនបរទេស និងការប្តេជ្ញាចិត្តខ្ពស់ សុផា ដែលជានិស្សិតបញ្ចប់ការសិក្សាផ្នែកគ្រប់គ្រងអាជីវកម្មពីសាកលវិទ្យាល័យបញ្ញាសាស្ត្រនៃកម្ពុជា បានសម្រេចគោលដៅរបស់នាង។
សិលា ផិបភើរ មានឈ្មោះល្បីល្បាញនៅលើទីផ្សារ។
ដោយក្នុងឆ្នាំ ២០១៥ កញ្ញា សុផា បានបង្កើតក្រុមហ៊ុន សិលា ផិបភើរ ខូអិលធីឌី ខេមបូឌា ក្នុងស្រុកមេមត់ខេត្តត្បូងឃ្មុំដែលសព្វថ្ងៃផលិតម្រេចខ្មៅប្រមាណ ១០០ តោនជារៀងរាល់ឆ្នាំ។
កញ្ញា ស៊ឹង សុផា នាយិកាក្រុមហ៊ុន សិលា ផិបភើរ ខូអិលធីឌី ខេមបូឌា បានប្រាប់ភ្នំពេញ-ប៉ុស្តិ៍ថា៖ “ មូលហេតុដែលបង្កើតរោងចក្រកែច្នៃម្រេចនៅស្រុកមេមត់ គឺដោយសារតែដីមានជីជាតិ និងមានសំណើមដូចខេត្តកំពត និងមានផ្ទៃដីធំសម្រាប់ដាំម្រេច ហើយម្រេចប្រហែល ៧៥ ភាគរយដែលប្រើនៅក្នុងប្រទេសនេះគឺមកពីមេមត់” ។
កម្ពុជាមានអាកាសធាតុត្រូពិក ដែលងាយស្រួលឱ្យចម្ការម្រេចមានការរីកលូតលាស់ពេញ ១ ឆ្នាំ និងអាចដាំម្រេចបាននៅក្នុងខេត្តមួយចំនួនលើដីមានជីជាតិដូចជា ខេត្តកំពង់ចាម កែប និងរតនគិរី ជាដើម ដែលជាកន្លែងឱ្យអ្នកដាំដុះម្រេចអាចផលិតម្រេចដែលមានគុណភាព និងហឹរសម្រាប់ទៅលក់ទីផ្សារក្នុងស្រុក និងនាំចេញក្រៅស្រុក។
ម្រេចច្រកដាក់ក្នុងដបដ៏គួរឱ្យទាក់ទាញសម្រាប់លក់។
ដោយសារអាកាសធាតុ អំណោយផល កសិករនៅកម្ពុជា ផលិតបានម្រេច GI (ទំនិញម៉ាកសម្គាល់ភូមិសាស្ត្រ) ជាម្រេចដែលមានគុណភាពខ្ពស់ និងទទួលស្គាល់ដោយសហគមន៍អឺរ៉ុប។
Sela Pepper ជាក្រុមហ៊ុនម្រេចដំបូងគេដែលបានសង់រោងចក្រផលិតម្រេច និងមានឧបករណ៍ទំនើបៗជាច្រើនរួមមាន ម៉ាស៊ីន សម្ងួត សម្លាប់មេរោគ កិន វេចខ្ចប់ និងមានបន្ទប់ពិសោធន៍ផងដែរ។ បច្ចុប្បន្នក្រុមហ៊ុនបានធ្វើការដោយផ្ទាល់ជាមួយ ៦០០ គ្រួសារនៅក្នុងស្រុក។
រោងចក្រនេះអាចផលិតបានផលិតផលចំនួន ២៥ មុខផ្សេងៗគ្នារាប់ពីម្រេចខ្មៅ ម្រេចស ម្រេចក្រហម និង រហូតដល់ផលិតទឹកជ្រលក់អាហារពិសេសថែមទៀតផង។
ផលិតផលរបស់ Sela Pepper ត្រូវបាននាំចេញទៅក្រៅប្រទេសជាច្រើនរួមមានអ៊ឺរ៉ុប អាមេរិក កូរ៉េ ជប៉ុន តៃវ៉ាន់ អាល្លឺម៉ង់ និងត្រៀមនាំចេញទៅប្រទេសហូឡង់ ទៀតផង។
កញ្ញា សុផា បាននិយាយថា៖ "គ្រប់គ្នាតែងសួរខ្ញុំថា ហេតុអ្វីមិនបង្កើតរោងចក្រកែច្នៃនៅខេត្តកំពតបែរជាទៅបង្កើតនៅស្រុកមេមត់ កញ្ញាថា ម្រេចកំពតមានទីផ្សាររួចទៅហើយ នៅឡើយតែម្រេចដែលដាំនៅតំបន់ផ្សេងទៀតពុំទាន់មានទីផ្សារ"។ សូម្បីតែនៅស្រុកខ្មែរ ប្រជាជនមួយចំនួនរាល់ថ្ងៃមិនទាន់ដឹងថាម្រេចមាននៅមេមត់ទេ សូម្បីតែបុគ្គលិករបស់ខ្ញុំដែលចូលធ្វើការមិនដឹងថាមានម្រេចនៅមេមត់ផង ភាគច្រើនគាត់ដឹងតែម្រេចមកពីខេត្តកំពត។ ម្រេចកំពតទទួលស្គាល់ដោយ GI ទំនិញម៉ាកសម្គាល់ភូមិសាស្ត្រមានរសជាតិឆ្ងាញ់ តែម្រេចស្រុកមេមត់ក៏មានរសជាតិឆ្ងាញ់របស់វា និងហឹរខ្លាំង"។
កញ្ញា ស៊ឹង សុផា នាយិកាក្រុមហ៊ុន។
ម្រេចគឺជាគ្រឿងទេសដែលលក់ដាច់ជាងគេបំផុតនៅលើទីផ្សារពិភពលោកដោយសារតែមានតម្រូវការខ្លាំងសម្រាប់គ្រឿងទេសដែលត្រូវបានប្រើជាប្រចាំដើម្បីបង្កើនរសជាតិនៅក្នុងម្ហូបស្ទើរតែទូទាំងពិភពលោក។
យោងតាមការចុះផ្សាយរបស់ Global Trade នៅថ្ងៃទី ២៥ ខែធ្នូ ឆ្នាំ ២០១៩ វៀតណាមនៅតែជាប្រទេសផលិតម្រេចលំដាប់លេខមួយលើពិភពលោកដោយមានម្រេចចំនួន ២៧៣ ០០០ តោន បន្ទាប់មកប្រទេសឥណ្ឌូនេស៊ីមានចំនួន ៨៨ ០០០ តោន និងប្រទេសប្រេស៊ីលឈរនៅលំដាប់លេខ ៣ ដែលមាន ៨០ ០០០ តោន។
អ្នកជំនាញនិយាយថា ដោយសារតម្រូវការម្រេចកើនឡើងនៅក្នុងផលិតកម្មស្បៀងអាហារ និងទទួលបានផលចំណេញមកវិញនោះ កសិករក្នុងតំបន់ជាច្រើនបានងាកមកដាំដុះម្រេចដោយផ្លាស់ប្តូរពីដំណាំប្រពៃណីដូចជាដំឡូងមី និងស្វាយចន្ទី។
ក្រុមហ៊ុន Sela Pepper បានដំឡើងឧបករណ៍ទំនើបដើម្បីបង្កើនប្រសិទ្ធភាពផលិតកម្ម។ រោងចក្រកែច្នៃទំនើបរបស់ខ្លួនមានសមត្ថភាពផលិតម្រេចបាន ១,៥ តោនក្នុង ១ ម៉ោង, ម៉ាស៊ីនចំហុយម្រេចមានសមត្ថភាពផលិត ៦០០ គីឡូក្រាមក្នុង ១ ម៉ោង និងកែច្នៃកិនម្រេចដែលមានសមត្ថភាពផលិត ៥០០ គីឡូក្រាមក្នុង ១ ម៉ោង។
ក្រុមហ៊ុន Sela Pepper ក៏បានបង្កើតមជ្ឈមណ្ឌលវិទ្យាសាស្ត្រ និងបច្ចេកវិទ្យា ម្រេចខ្នាតធំនៅក្នុងស្រុកមេមត់ដើម្បីធ្វើការស្រាវជ្រាវ និងអភិវឌ្ឍទំនិញរបស់ខ្លួន។ មជ្ឈមណ្ឌលផលិតម្រេចដ៏ធំមួយនេះក៏បានជួយក្នុងការលើកកម្ពស់បច្ចេកទេសធ្វើកសិកម្មប្រកបដោយនិរន្តរភាព និងធន់នឹងអាកាសធាតុផងដែរ៕
