នៅក្នុងទីក្រុងភ្នំពេញមនុស្ស ១ ក្រុមតូចកំពុងផលិតសូកូឡាដែលមានគុណភាពខ្ពស់ជាមួយការច្នៃប្រឌិតតាមស្តង់ដាបែលហ្ស៊ិក ដែលកើតចេញពីក្តីស្រឡាញ់ចំពោះអាជីវកម្មមួយនេះ។
នៅក្នុងហាងសូកូឡា The Chocolate Shop ស្ថិតនៅតាមបណ្តោយផ្លូវលេខ ៦៣ ស្រីមុំ អាលី និងសុភ័ក្រ កំពុងផលិត និងរចនាស្ករសូកូឡាដ៏ឈ្ងុយឆ្ងាញ់ជាច្រើនប្រភេទរាប់ចាប់ពីការផលិតលក្ខណៈដើមរហូតដល់ការផលិតដោយប្រើគ្រឿងផ្សំរបស់ខ្មែរគុណភាពខ្ពស់ និងរៀបជាឈុតដាក់ក្នុងប្រអប់សូកូឡាដ៏ស្រស់ស្អាត។
អ្នកនាង ស្រីមុំ គឺជាអ្នកគ្រប់គ្រង ហើយអ្នកនាងបានធ្វើការនៅហាងផលិតសូកូឡានេះអស់រយៈពេលជាង ១០ ឆ្នាំមកហើយ។
អ្នកនាង ស្រីមុំ ថ្លែងថា៖ «ខ្ញុំពិតជារីករាយណាស់ដែលបានធ្វើការនៅហាងផលិតសូកូឡានេះដែលជាកន្លែងផលិតស្ករសូកូឡាពិតប្រាកដតែ ១ គត់នៅក្នុងប្រទេសកម្ពុជា។
អ្នកស្រី Griet Lorre ដែលបានបើកហាងសូកូឡានេះដំបូងក្នុងឆ្នាំ ២០០៧ បានឲ្យដឹងថា បុគ្គលិករបស់លោកស្រីគឺពិតជាសំខាន់ណាស់ចំពោះភាពជោគជ័យរបស់ក្រុមហ៊ុន។
«ពិតណាស់អតិថិជនរបស់យើងគឺសំខាន់ប៉ុន្តែបុគ្គលិករបស់យើងក៏សំខាន់ដូចគ្នា។ ការស្រាវជ្រាវ ការរៀនសូត្រពីរៀបផលិត សូកូឡាដើម ការអនុវត្ត និងការច្នៃប្រឌិត និងការលះបង់ជាច្រើនឆ្នាំមកនេះបានធ្វើឱ្យក្រុមផលិតកម្មរបស់យើងមានជំនាញយ៉ាងពិតប្រាកដ»។
«ខ្ញុំបានបើកហាងនំ និងហាងកាហ្វេនៅឆ្នាំ ២០០១។ បន្ទាប់មកនៅឆ្នាំ ២០០៧ ខ្ញុំបានបន្ថែមហាងសូកូឡាដែលនៅជាប់ហាង The Shop 240។ នេះគឺជាផលិតកម្មផលិតស្ករសូកូឡាពិតប្រាកដដំបូងគេបង្អស់នៅកម្ពុជា»។
អ្នកស្រីបានឲ្យភ្នំពេញប៉ុស្តិ៍ដឹងថា៖ «បន្ទាប់ពីបើកដំណើរការហាងនំ និងហាងកាហ្វេអស់រយៈពេល ២-៣ ឆ្នាំមក ខ្ញុំមានអារម្មណ៍ថា ចង់បន្ថែមហាងសូកូឡាមួយទៀតនៅក្នុងផលិតកម្មរបស់យើង។ ដោយមានផលិតផលល្អៗជាច្រើននៅកម្ពុជាដូចជាម្រេចកំពត ទឹកឃ្មុំមណ្ឌលគិរី និងស្ករត្នោតកំពង់ស្ពឺ យើងបានធ្វើពិសោធន៍ និងទទួលបានជោគជ័យក្នុងការនាំមកនូវរសជាតិថ្មី»។
សូកូឡាគឺជាផលិតផលសម្រាប់ការចែករំលែក និងក្តីរីករាយ ហើយការទិញសូកូឡាដាក់ប្រអប់ជាកាដូពីសំណាក់ប្រជាជនកម្ពុជាកំពុងកើនឡើងជាលំដាប់។
«សូកូឡារបស់យើងកំពុងពេញនិយមទាំងពីសំណាក់ជនបរទេស និងប្រជាជនកម្ពុជាពីព្រោះមនុស្សគ្រប់គ្នាចូលចិត្តសូកូឡា ហើយវាកាន់តែពេញនិយមក្នុងចំណោមប្រជាជនកម្ពុជាដែលមានចំនួន ៦០ ទៅ ៧០ ភាគរយនៃការលក់របស់យើង»។
ស្ត្រីជនជាតិបែលហ្ស៊ិករូបនេះបន្ថែមថា៖ «សូកូឡាគឺជាអំណោយដ៏ល្អ ឥតខ្ចោះសម្រាប់ឱកាសពិសេសៗដូចជាថ្ងៃខួបកំណើត បុណ្យណូអែល ឬទិវានៃក្តីស្រឡាញ់ជាដើម។ ការបង្កើត និងច្នៃប្រឌិតប្រអប់កាដូស្រស់ស្អាត និងគួរឱ្យទាក់ទាញ ហើយមើលឃើញស្នាមញញឹម និងក្តីរីករាយនៅពេលគេទទួលអំណោយទាំងនេះធ្វើឱ្យកិច្ចខិតខំប្រឹងប្រែងរបស់យើងកាន់តែមានសម្ទុះទឹកចិត្ត»។
«ជាមួយការប្តេជ្ញាចិត្តក្នុងការបង្កើតក្តីរីករាយបានធ្វើឱ្យយើងមានកំណើនពីមួយឆ្នាំទៅមួយឆ្នាំ យើងពិតជារីកចម្រើនជារៀងរាល់ឆ្នាំពិតមែន» ។
ចំពោះសូកូឡាទម្ងន់ ១០០ ក្រាមមានតម្លៃ ៦ ដុល្លារ អតិថិជនអាចទិញទទួលទានធម្មតា ឬទិញខ្ចប់ដាក់ក្នុងប្រអប់កាដូ។
«ប្រជាជននៅក្នុងទីក្រុងភ្នំពេញដែលស្គាល់សូកូឡាតែងណែនាំឲ្យទៅហាង The Shop ព្រោះនៅទីនេះគ្មានកន្លែងណាផលិតសូកូឡាគុណភាពខ្ពស់ និងតម្លៃសមរម្យដូចហាងនេះទេ។ គ្រាប់កាកាវរបស់យើងគឺត្រូវបានកែច្នៃដោយក្រុមហ៊ុនបែលហ្ស៊ិក និងប្រើប្រាស់បច្ចេកវិទ្យារបស់បែលហ្ស៊ិក»។
អ្នកស្រី Lorre បន្តថា៖ «ខ្ញុំនិយាយដោយមោទនភាពថា ផលិតផលរបស់យើងដែលលក់នៅហាង The Chocolate Shop នេះគឺអាចប្រៀបធៀបជាមួយផលិតផលល្បីៗរបស់បែលហ្ស៊ិកបានដូចជាម៉ាក Godiva និង Neuhaus ជាដើម។
អ្នកស្រីបន្តថា ជោគជ័យរបស់ហាងសូកូឡា The Chocolate Shop ចាប់ផ្តើមពីការងារដែលស្រឡាញ់ពិតប្រាកដ ហើយអ្នកស្រីដឹងពីអ្វីដែលធ្វើឱ្យអតិថិជនរីករាយ។
«ពេលបើកហាងសូកូឡាដំបូង ខ្ញុំដឹងថា ខ្ញុំមិនទាន់យល់ច្រើនអំពីចំណង់ចំណូលចិត្តរបស់អតិថិជនគោលដៅរបស់យើងទេ។ ប៉ុន្តែវាក្លាយជារឿងល្អសម្រាប់អតិថិជនរបស់ The Shop 240 ដែលនៅជាប់ហាងសូកូឡា The Chocolate Shop ពីព្រោះមុនបើកហាងសូកូឡា ៦ ខែ យើងតែងតែយកគំរូសូកូឡាឲ្យពួកគាត់ភ្លក្សរសជាតិ និងផ្តល់ជាមតិយោបល់»។
អ្នកស្រីថ្លែងថា៖ «នេះបង្កើតបានបរិយាកាសដ៏រីករាយនៅក្នុងហាង The Shop 240 ហើយឥឡូវនេះយើងអាចនិយាយបានថា រសជាតិរបស់យើងជាច្រើនកើតឡើងពីទំនាក់ទំនងរបស់យើងជាមួយអតិថិជន»៕