អ្នកជំនាញខាងវិទ្យាសាស្រ្តម្ហូបអាហារវ័យក្មេងកម្ពុជាមានគំនិតច្នៃប្រឌិតស្ករគ្រាប់រសជាតិប្លែកៗ សម្រាប់ទីផ្សារក្នុងស្រុក និងពិភពលោក។ ក្រុមអ្នកជំនាញទាំងនេះបានផលិតស្ករគ្រាប់មានរសជាតិពិសេសជាច្រើនប្រភេទ ដាក់ដាក់លក់នៅទីផ្សារក្នុងស្រុក និងអន្តរជាតិ ខណៈតម្រូវការស្ករគ្រាប់កំពុងកើនឡើង។
នៅក្នុងបន្ទប់ពិសោធន៍របស់ពួកគេ ពួកគេបានធ្វើការសាកល្បងបង្កើតនូវស្ករគ្រាប់ដែលមាននៅទីជនបទ ដូចជាផ្លែអម្ពិល ផ្លែព្រីង និងស្វាយខ្ចីជាដើម ដើម្បីផលិតជាស្ករគ្រាប់រឹងដែលមានរសជាតិប្លែក ឈ្ងុយឆ្ងាញ់ពិសេសសម្រាប់អតិថិជន។
កាលពីខែកញ្ញាកន្លងទៅ ក្រុមហ៊ុន Aprati Foods (Cambodia) Ltd បាននាំចេញស្ករគ្រាប់រឹងម៉ាក «Frutati» និង «Mocati» ទៅកាន់សហរដ្ឋអាមេរិក ដែលបានទាក់ទាញការចាប់អារម្មណ៍យ៉ាងខ្លាំងនៅក្នុងឧស្សាហកម្មមួយនេះ និងជាសញ្ញាមួយនៃការចូលម៉ាកសញ្ញាថ្មីទៅក្នុងទីផ្សារពិភពលោក។
ថ្មីៗនេះ អ្នកវិទ្យាសាស្ត្រផ្នែកអាហាររបស់ក្រុមហ៊ុន Aprati Foods (Cambodia) ទើបបានបញ្ចប់ «ដំណើរស្វែងយល់ពីរសជាតិ» នៅតាមបណ្តាខេត្តមួយ ចំនួន ដូចជាបាត់ដំបង ពោធិ៍សាត់ និងកំពង់ឆ្នាំង។ ដំណើរស្វែងយល់ពីរសជាតិ នេះផ្តោតទៅលើការស្វែងរកផ្លែឈើព្រៃក្នុងស្រុកតាមរដូវកាល។
ក្រុមយុវជនវ័យក្មេងពោរពេញដោយទេពកោសល្យខ្ពស់ទាំងនេះសុទ្ធតែបានបញ្ចប់ការសិក្សាមកពីវិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទកសិកម្ម និងសាកលវិទ្យាល័យមានជ័យ។ នៅប៉ុន្មានខែខាងមុខ ក្រុមការងារនេះនឹងបន្តចុះទៅតំបន់ជនបទ ដើម្បីរកស្វែងរករសជាតិថ្មី និងរសជាតិតាមការស្រមើស្រមៃរបស់ពួកគេ។
លោក Benjamin Pedro នាយកផ្នែកបង្កើតចំណេះដឹងនៃក្រុមហ៊ុន Aprati បានឲ្យភ្នំពេញប៉ុស្តិ៍ ដឹងថា៖ «សម្រាប់ការស្វែងយល់ពីរសជាតិនេះ គឺជាការជំរុញទឹកចិត្ត ចង់ចេះ ចង់ដឹង ចង់រៀនសូត្រ ដែលសុទ្ធជាចំណុចល្អសម្រាប់ក្រុមយុវជនកម្ពុជាក្នុងការបង្កើតថ្មី។ វាទើបតែជាការចាប់ផ្តើមនៃឧស្សាហកម្មថ្មីមួយផ្សេងទៀតនៅក្នុងប្រទេសកម្ពុជា ប៉ុណ្ណោះ»។
ប្រទេសកម្ពុជា មានវត្ថុធាតុដើមយ៉ាងល្អ និងគួឲ្យចាប់អារម្មណ៍សម្រាប់ការផលិតស្ករគ្រាប់ចូលទៅក្នុងទីផ្សារសកល។ ជាមួយនឹងវត្ថុធាតុដើមកសិកម្មដ៏សម្បូរបែប កម្លាំងពលកម្មវ័យក្មេងច្រើនភាពរីកចម្រើនផ្នែកប្រាក់ចំណូល វិស័យផលិតកម្មកំពុងរីកចម្រើន អាចធ្វើឲ្យការផលិតស្ករគ្រាប់ឈានដល់កម្រិតថ្មីមួយទៀត។
មានទីតាំងស្ថិតនៅក្នុងតំបន់សេដ្ឋកិច្ចពិសេសភ្នំពេញ ក្រុមហ៊ុន Aprati Foods (Cambodia) គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតស្ករគ្រាប់អាមេរិក Licorice ដែលបានផលិតស្ករគ្រាប់ចាប់តាំងពីឆ្នាំ ១៩១៤ មកម្ល៉េះ បានផ្តល់ឱ្យក្រុមហ៊ុននូវអានុភាពបន្ថែមក្នុងអាជីវកម្មប្រកួតប្រជែងមួយនេះ។
ក្រុមហ៊ុនផលិតស្ករគ្រាប់នៅកម្ពុជានេះ ផលិតនូវស្ករគ្រាប់រឹងពិសេស ៣ ប្រភេទ គឺម៉ាក Mocati (រសជាតិកាហ្វេ) Aprati (រសជាតិជីរអង្កាម និងម៉ុងតុល) និង Frutati (រសជាតិផ្លែឈើពិសេសៗរបស់កម្ពុជា) ។
ជារៀងរាល់ឆ្នាំ ក្រុមហ៊ុន Aprati Foods (Cambodia) ផលិតស្ករគ្រាប់ប្រមាណ ១៥០ តោនដែលភាគច្រើនត្រូវបានលក់នៅទីផ្សារក្នុងស្រុក និងសហរដ្ឋអាមេរិក។
យោងតាមរបាយការណ៍របស់ Grand View Research, Inc បានឱ្យដឹងថា ទីផ្សារស្ករគ្រាប់របស់សហរដ្ឋអាមេរិកត្រូវបានគេរំពឹងថា នឹងកើនឡើងដល់ ១៩,៦ ពាន់លានដុល្លារនៅឆ្នាំ ២០២៥។
«បច្ចុប្បន្នក្រុមហ៊ុន Aprati Foods (Cambodia) កំពុងអភិវឌ្ឍផលិតផលស្ករគ្រាប់ដែលផលិតពីស្ករត្នោតជាវត្ថុធាតុដើមក្នុងស្រុក ដែលជាផ្នែកមួយនៃការប្តេជ្ញាចិត្ត ដើម្បីគាំទ្រសហគ្រាសក្នុងស្រុក និងកសិកម្មកម្ពុជា»។
ចំណុចនេះនឹងពង្រីកបន្ថែមទៀតដល់វត្ថុធាតុដើមក្នុងស្រុកផ្សេងទៀតនាពេលអនាគតនៅពេលខ្សែសង្វាក់ផ្គត់ផ្គង់កាន់តែមានភាពងាយស្រួល ហើយការផ្គត់ផ្គង់វត្ថុធាតុដើមក្នុងស្រុកកាន់តែមានច្រើន ដែលអាចបំពេញតាមស្តង់ដាគុណភាពដ៏តឹងរ៊ឹងរបស់ក្រុមហ៊ុន។
«តាមរយៈការប្រើប្រាស់វិធីសាស្ត្រអភិវឌ្ឍន៍ផលិតផលតាមបែប Agile របស់ខ្លួន បច្ចុប្បន្ន Aprati Foods (Cambodia) គឺជាក្រុមហ៊ុនឈានមុខគេ ផ្នែកវិធីសាស្ត្រក្នុងការអភិវឌ្ឍផលិតផល។ ក្រុមអ្នកវិទ្យាសាស្ត្រខាងចំណីអាហារក្នុងស្រុក និងវិស្វករផ្នែកកែច្នៃសហការគ្នាយ៉ាងស្អិតល្មួត ដើម្បីធ្វើការកែលម្អដំណើរការផលិតស្ករគ្រាប់។
លោក Pedro បន្ថែមថា៖ «នេះនឹងជួយធានាដល់ការផលិតស្ករគ្រាប់ ដែលមានគុណភាពខ្ពស់ និងមានស្ថិរភាពសម្រាប់អតិថិជន»៕