សេដ្ឋកិច្ចកម្ពុជាកំពុងមានកំណើនក្នុងល្បឿនមួយដ៏លឿន ដូច្នេះហើយតម្រូវការអ្នកជំនាញផ្នែកហិរញ្ញវត្ថុ គឺពិតជាចាំបាច់ខ្លាំងណាស់ ដើម្បីជំរុញទីផ្សារមូលធនដែលកំពុងមានតម្រូវការខ្ពស់។
ប៉ុន្ដែការផ្គត់ផ្គង់អ្នកដែលមានទេពកោសល្យនៅក្នុងជំនាញបែបនេះ គឺនៅមិនទាន់គ្រប់គ្រាន់នៅឡើយសម្រាប់បំពេញតម្រូវការនៅក្នុងស្រុក។ ក្រុមអ្នកជំនាញបានឲ្យដឹងថា កង្វះជំនាញពិតប្រាកដអាចប៉ះពាល់ដល់ការអភិវឌ្ឍទីផ្សារហិរញ្ញវត្ថុ ដែលមានសារៈសំខាន់ខ្លាំងសម្រាប់ប្រព័ន្ធហិរញ្ញវត្ថុ។
លោក Casey Barnett នាយកវិទ្យាស្ថាន CamEd Business School បានថ្លែងប្រាប់កាសែតភ្នំពេញប៉ុស្តិ៍ថា៖ «ការអភិវឌ្ឍទីផ្សារមូលបត្រ គឺមានសារៈសំខាន់ណាស់ ដើម្បីជំរុញដល់កំណើនសេដ្ឋកិច្ចកម្ពុជាប៉ុន្តែវាអាចកើតឡើងបានលុះត្រាតែមានការវិនិយោគលើជំនាញនេះ»។
លោកថ្លែងបែបនេះបន្ទាប់ពីពិធីទទួលស្គាល់ជាអន្តរជាតិចំពោះបរិញ្ញាបត្រគណនេយ្យ និងហិរញ្ញវត្ថុរបស់ CamEd ពីវិទ្យាស្ថាន CFA Institute ក្នុងរាជធានីភ្នំពេញ កាលពីថ្ងៃទី ៣០ ខែ មេសា។
រដ្ឋាភិបាលបានចាប់ផ្តើមបើកដំណើរទីផ្សារមូលបត្រកម្ពុជាក្នុងឆ្នាំ ២០១២ ដែលជាផ្នែកមួយនៃយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ ២០០៦-២០១៥ ដែលសំដៅសម្រេចឲ្យបាននូវកំណើនសេដ្ឋកិច្ចខ្ពស់ដោយសម្របសម្រួលលំហូរដើមទុន និងការវិនិយោគ។ រហូតមកដល់បច្ចុប្បន្ន មានក្រុមហ៊ុនតែ ៥ ប៉ុណ្ណោះ ដែលត្រូវបានចុះបញ្ជីក្នុងផ្សារហ៊ុនដែលជាការឆ្លើយតបមួយដ៏យឺតយ៉ាវពីវិស័យសាជីវកម្ម។
«បច្ចុប្បន្ន ទីផ្សារមូលបត្រមានការរីកចម្រើនយឺត ដោយសារតែកង្វះការយល់ដឹងអំពីការវិនិយោគលើមូលបត្រ ហើយសូម្បីតែក្រុមហ៊ុនមួយចំនួនដែលចាប់អារម្មណ៍ក្នុងការលក់ដូរភាគហ៊ុនក៏ពួកគេមិនមានធនធានមនុស្សគ្រប់គ្រាន់ដើម្បីធ្វើវាបានដែរ»។
លោក Casey បន្ថែមថា៖ «យុទ្ធសាស្ត្ររបស់យើងនៅទីនេះ គឺអភិវឌ្ឍធនធានមនុស្សជាមួយនឹងធនធានមនុស្សដែលមានជំនាញ ដូច្នេះយើងអាចធ្វើដំណើរឆ្ពោះទៅមុខនៅក្នុងទីផ្សារមូលបត្រ»។
វិទ្យាស្ថាន CamEd ដែលមានមូលដ្ឋាននៅទីក្រុងភ្នំពេញ បានបោះជំហានយ៉ាងសំខាន់នៅក្នុងការគាំទ្រដល់ទីផ្សារមូលធនកម្ពុជា ដោយផ្តល់ការបណ្តុះបណ្តាលឲ្យមានអ្នកជំនាញហិរញ្ញវត្ថុពិតប្រាកដ ដើម្បីជំរុញដល់វិស័យមួយនេះឲ្យកាន់តែរីកចម្រើនទៅមុខ។
ដោយមើលឃើញពីតម្រូវការអ្នកជំនាញផ្នែកហិរញ្ញវត្ថុកំពុងកើនឡើង វិទ្យាស្ថាន CamEd ដែលមានជំនាញបណ្តុះបណ្តាលមុខវិជ្ជាហិរញ្ញវត្ថុ និងគណនេយ្យចាប់តាំងពីឆ្នាំ ២០០០ មកនោះបានពង្រឹងកម្មវិធីសិក្សា Charter Financial Analyst (CFA) ដែលជាវគ្គសិក្សាដ៏សំខាន់បំផុតមួយក្នុងចំណោមកម្មវិធីសិក្សាដទៃទៀតរបស់វិទ្យាស្ថាន។
យោងតាមការសិក្សាបានឲ្យដឹងថា កំណើនសេដ្ឋកិច្ចត្រូវបានផ្សារភ្ជាប់ជាមួយនឹងលំហូរសាច់ប្រាក់ និងសកម្មភាពនៅក្នុងទីផ្សារមូលបត្រ។ ការរីកចម្រើននៃទីផ្សារមូលបត្រអាចជួយបង្កើនលំហូរសាច់ប្រាក់កាន់តែច្រើន ដូច្នេះរូបិយប័ណ្ណក្នុងស្រុក ត្រូវបានចរាចរ និងវិនិយោគកាន់តែមានប្រសិទ្ធភាពតាមរយៈទីផ្សារ។ ទីផ្សារមូលបត្រក៏អាចជាមធ្យោបាយមួយ ដើម្បីទាក់ទាញផលបត្របរទេសផងដែរ។
លោកបន្តថា៖ «កម្ពុជានៅខ្វះធនធានមនុស្សដែលមានជំនាញដូច្នេះវាជាដំណាក់កាលដ៏សំខាន់ដែលយើងកំពុងវិនិយោគលើធនធានមនុស្ស ដែលជាកិច្ចការបន្ទាន់ ដើម្បីគាំទ្រដល់កិច្ចខិតខំប្រឹងប្រែងទាំងនេះ (ទីផ្សារមូលបត្រ)»។
វិទ្យាស្ថាន CamEd បានក្លាយជាវិទ្យាស្ថានថ្នាក់ឧត្តមសិក្សាដំបូងគេនៅក្នុងប្រទេស កម្ពុជា ដែលមានកម្មវិធីសិក្សា Charted Financial Analyst សម្រាប់និស្សិតរបស់ខ្លួន។
ថ្លែងនៅក្នុងពិធីនោះដែរ លោក Nick Pollard នាយកគ្រប់គ្រងវិទ្យាស្ថាន CFA ប្រចាំតំបន់អាស៊ីប៉ាស៊ីហ្វិកថ្លែងថា កម្ពុជាគឺជាទីផ្សារដ៏ល្អសម្រាប់ការវិនិយោគ ប៉ុន្តែត្រូវការជំនាញដែលមានសក្តានុពលក្នុងការជំរុញវិស័យនេះ។
លោកបន្តថា៖ «មិនមានវេទមន្តណាមកជប់បាននោះទេ គឺយើងត្រូវវិនិយោគលើធនធានមនុស្ស កសាងទេពកោសល្យ និងកសាងទំនុកចិត្តជាមួយអតិថិជន ដែលវាជាកត្តាចាំបាច់ ដើម្បីកសាងទីផ្សារមូលធន ហើយត្រូវអត់ធ្មត់»។
លោក Pollard បន្ថែមទៀតថា៖«ការវិនិយោគដ៏ធំតែមួយគត់ដែលយើងកំពុងធ្វើនៅកម្ពុជាក្នុងឆ្នាំនេះគឺ មជ្ឈមណ្ឌលប្រឡង CFA នៅក្នុងរាជធានីភ្នំពេញ។ ពីមុនបេក្ខជននៅក្នុងប្រទេស កម្ពុជា ត្រូវធ្វើដំណើរទៅប្រទេសផ្សេងដើម្បីប្រឡង CFA ប៉ុន្តែនៅក្នុងឆ្នាំនេះនឹងធ្វើឡើងនៅក្នុងប្រទេស កម្ពុជា តែម្តង»៕