ក្រុមហ៊ុនធានារ៉ាប់រងអាយុជីវិតជប៉ុន Dai-ichi Life Holdings Inc បានចូលមកប្រទេស កម្ពុជា ជាលើកដំបូងជាមួយនឹងគម្រោងផ្តល់ជូននូវការការពារផ្នែកហិរញ្ញវត្ថុ និងការសន្សំរយៈពេលវែងសម្រាប់ទីផ្សារធានារ៉ាប់រងកម្ពុជាដែលកំពុងរីកចម្រើន។
ក្រុមហ៊ុនដែលមានបទពិសោធជាង ១ សតវត្សរ៍ នៅក្នុងអាជីវកម្មធានារ៉ាប់រងអាយុជីវិតមួយនេះ បានបង្កើតក្រុមហ៊ុនបុត្រសម្ព័ន្ធ Dai-ichi Life Insurance (Cambodia) PLC នៅថ្ងៃទី ២៤ ខែ មេសា និងបានសហការជាមួយធនាគារវឌ្ឍនៈ ដើម្បីណែនាំសេវាកម្មរបស់ខ្លួននៅក្នុងព្រះរាជាណាចក្រកម្ពុជា។
អគ្គនាយកក្រុមហ៊ុនធានារ៉ាប់រង Dai-ichi Life Insurance (Cambodia) Plc លោក Allen Thai បានឲ្យកាសែតភ្នំពេញប៉ុស្តិ៍ដឹងថា៖ «ក្រុមហ៊ុន Dai-ichi Life Group បានសម្រេចចិត្តចូលមកក្នុងទីផ្សារនេះគឺដើម្បីជួយបំពេញនូវការការពារផ្នែកធានារ៉ាប់រង និងការសន្សំរយៈពេលវែងរបស់ប្រជាជនកម្ពុជា»។
វិស័យធានារ៉ាប់រងកម្ពុជា ជាពិសេស ផ្នែកធានារ៉ាប់រងអាយុជីវិត ផ្តល់ឱកាសដ៏ល្អសម្រាប់ក្រុមហ៊ុនបរទេសដោយសារតែកំណើនសេដ្ឋកិច្ចរបស់កម្ពុជាដែលកំពុងរីកចម្រើន ហើយប្រជាជនដែលមានចំណូលមធ្យមក៏កំពុងកើនឡើងដែលជាកត្តាជំរុញដល់កំណើនឧស្សាហកម្មមួយនេះ។
លើសពីនេះទៀត ការធានារ៉ាប់រងអាយុជីវិតក្នុងចំណោមប្រជាជនកម្ពុជា ១៦ លាននាក់ នៅមានកម្រិតទាបនៅឡើយ គឺមានក្រោម ៣ ភាគរយប៉ុណ្ណោះ។
«កំណើនប្រជាជនកម្ពុជាវ័យក្មេងកំពុងកើនឡើងយ៉ាងឆាប់រហ័ស។ ប្រមាណមួយទសវត្សរ៍ចុងក្រោយនេះ កំណើនសេដ្ឋកិច្ចរបស់ប្រទេស កម្ពុជា មានការរីកចម្រើនលឿនបំផុតមួយនៅក្នុងទ្វីបអាស៊ី ដែលមានកំណើនជាមធ្យមចំនួន ៧ ភាគរយជារៀងរាល់ឆ្នាំ»។
លោក Thai បានបន្ថែមថា៖ «ការអភិវឌ្ឍសេដ្ឋកិច្ចដ៏វិជ្ជមានទាំងនេះបានធ្វើឲ្យប្រជាជនដែលមានប្រាក់ចំណូលមធ្យមកើនឡើង ដូច្នេះតម្រូវការធានារ៉ាប់រងអាយុជីវិតក៏កំពុងចាប់ផ្តើមកើនឡើងដែរ»។
យោងតាមសមាគមធានារ៉ាប់រងកម្ពុជា (IAC) បានឲ្យដឹងថា មានក្រុមហ៊ុនធានារ៉ាប់រងទូទៅចំនួន ១២ និងក្រុមហ៊ុនធានារ៉ាប់រងអាយុជីវិតចំនួន ៨ កំពុងប្រតិបត្តិការនៅក្នុងប្រទេស កម្ពុជា គិតត្រឹមឆ្នាំមុន។
វិស័យធានារ៉ាប់រងនៅកម្ពុជា គឺជាទីផ្សារមួយដ៏មានសក្តានុពលបំផុតនៅក្នុងតំបន់។ ដោយវាមានកំណើនរហូតដល់ ៣០ ភាគរយ កាលពីឆ្នាំមុន បើធៀបនឹងឆ្នាំ ២០១៧ ដែលបុព្វលាភរ៉ាប់រងដុលមានជាង ១៩០ លានដុល្លារ នៅក្នុងឆ្នាំ ២០១៨។
ជាមួយនឹងប្រាក់ចំណូលជាមធ្យមក្នុងមនុស្សម្នាក់ប្រមាណ ១ ៥០០ ដុល្លារ កាលពីឆ្នាំមុន និងកំណើនយុវជនចូលទៅក្នុងទីផ្សារការងារកាន់តែច្រើនផងនោះ វាអាចជំរុញឱ្យមានតម្រូវការធានារ៉ាប់រងកើនឡើងដែរ។
ក្រុមហ៊ុន Dai-ichi មានសុទិដ្ឋិនិយមអំពីទស្សនវិស័យកំណើនរបស់ ខ្លួន ទោះបីទើបចូលមកក្នុងទីផ្សារនេះក៏ដោយ។
«ការធានារ៉ាប់រងអាយុជីវិតនៅកម្ពុជានៅមានកម្រិតទាបនៅឡើយ ហើយតម្រូវការធានារ៉ាប់រងអាយុជីវិតកំពុងកើនឡើងជាលំដាប់។ ស្របជាមួយនឹងកំណើនសេដ្ឋកិច្ចដ៏រឹងមាំរបស់កម្ពុជា និងកេរដំណែលរបស់ជប៉ុនដ៏យូរលង់អមជាមួយការជឿទុកចិត្តខ្ពស់របស់អតិថិជនកម្ពុជាទៅលើផលិតផលជប៉ុន ខ្ញុំមានសុទិដ្ឋិនិយមខ្លាំងណាស់អំពីការរីកចម្រើនរបស់យើងនៅក្នុងការពង្រីកទីផ្សារនេះនៅក្នុងឆ្នាំ ២០១៩ និងទៅមុខទៀត»។
លោកបន្តថាប្រទេស កម្ពុជា កំពុងបន្តរីករាយជាមួយនឹងកំណើនសេដ្ឋកិច្ចដ៏រឹងមាំ។ ប្រជាពលរដ្ឋដែលមានចំណូលមធ្យមកាន់តែកើនឡើងជាលំដាប់ ដូច្នេះហើយការយល់ដឹងពីការធានារ៉ាប់រងអាយុជីវិតនឹងជួយជំរុញវិស័យធានារ៉ាប់រងអាយុជីវិតកាន់តែខ្លាំងបន្ថែមទៀត។ លោក Thai បន្ថែមថា៖ «ខ្ញុំមានសុទិដ្ឋិនិយមខ្លាំងណាស់អំពីកំណើននេះ»។
ក្រុមហ៊ុន Dai-ichi ផ្តល់ជូននូវផលិតផលពិសេសៗជាច្រើន។ មានផ្តល់ជូននូវការការពារផ្នែកហិរញ្ញវត្ថុ និងការសន្សំសម្រាប់បុគ្គល និងក្រុមគ្រួសារដែលចង់សន្សំសម្រាប់ពេលអនាគតដូចជាសម្រាប់ការចំណាយទៅលើការសិក្សារបស់កូនចៅរបស់ពួកគេ ឬការផ្តល់ចំណូលដល់សមាជិកគ្រួសារជាដើម។
លោកបន្ថែមថា៖ «ផលិតផលរបស់យើងមានភាពបត់បែន និងមានតម្លៃសមរម្យ។ យើងចែកចាយផលិតផលធានារ៉ាប់រងអាយុជីវិតរបស់យើងតាមរយៈអ្នកពិគ្រោះយោបល់ផ្នែកផែនការហិរញ្ញវត្ថុ និងធនាគារដៃគូនៅក្នុងទីក្រុងភ្នំពេញ និងទីក្រុងសំខាន់ៗដទៃទៀត»។
លោក Thai លើកឡើងទៀតថាវិស័យធានារ៉ាប់រងអាយុជីវិតក្នុងស្រុកកំពុងដំណើរការទៅយ៉ាងរលូននៅក្នុងរយៈពេលប៉ុន្មានឆ្នាំចុងក្រោយនេះ។ ហើយនៅក្នុងរយៈពេលប៉ុន្មានឆ្នាំចុងក្រោយនេះ បុព្វលាភរ៉ាប់រងមានកំណើនជាង ៥០ ភាគរយ ជារៀងរាល់ឆ្នាំ។
តាមរយៈកំណើននេះបានធ្វើឱ្យកម្ពុជាក្លាយជាទីផ្សារធានារ៉ាប់រងដែលរីកលូតលាស់លឿនបំផុតមួយនៅក្នុងតំបន់។ បច្ចុប្បន្នបុព្វលាភរ៉ាប់រងមានជាង ១០០ លានដុល្លារ នៅក្នុងឧស្សាហកម្មនេះ ដែលផ្តល់នូវលំហូរទុនជាអចិន្ត្រៃយ៍ នឹងផ្តល់អត្ថប្រយោជន៍បន្ថែមដល់ការអភិវឌ្ឍសេដ្ឋកិច្ចដែលកំពុងរីកចម្រើនរបស់កម្ពុជា៕