.jpg)
ហាងកាហ្វេ Hard Rock Cafe ភ្នំពេញស្ថិតនៅអគារ Exchange Square។ សហការី
ហាងកាហ្វេ Hard Rock Café គឺជាម៉ាកយីហោហាងម្ហូបអាហារ និងភេសជ្ជៈអន្តរជាតិដ៏ល្បីល្បាញនៅទូទាំងពិភពលោក។ ស្លាកយីហោ Hard Rock Café មានវត្តមាននៅអាមេរិកខាងជើងតំបន់ការាបៀន អាមេរិកខាងត្បូង ទ្វីបអឺរ៉ុប តំបន់មជ្ឈិមបូព៌ា ទ្វិបអាហ្រ្វិក និងតំបន់អាស៊ីប៉ាស៊ីហ្វិក ដែលមាននៅ ៧៦ ប្រទេស។
បច្ចុប្បន្ន Hard Rock Café មានហាងចំនួន ២ កន្លែងនៅក្នុងព្រះរាជាណាចក្រកម្ពុជា។ហាងទី១ នៅក្នុងខេត្តសៀមរាបដែលបានបើកដំណើរការអស់រយៈពេល ២ ឆ្នាំកន្លងមកហើយ។ ចំពោះហាងទី២ គឺមានទីតាំងស្ថិតនៅនៅក្នុងអគារ Exchange Square ក្នុងរាជធានីភ្នំពេញ ដែលបានបើកដំណើរការបានជាង ១ ឆ្នាំ។
ទន្ទឹមនឹងនេះដែរ លោក Richard Tan ប្រធានផ្នែកទីផ្សាររបស់ Hard Rock Café ប្រចាំកម្ពុជាបានប្រាប់កាសែតភ្នំពេញប៉ុស្តិ៍អំពីបទពិសោធនៅក្នុងវិស័យម្ហូបអាហារ និងភេសជ្ជៈនៃម៉ាកយីហោល្បីៗនៅកម្ពុជាក្នុង ពេលបច្ចុប្បន្ននេះ។
លោក Tan បានឲ្យដឹងថា ក្នុងនាមជាម៉ាកយីហោដែលត្រូវបានទទួលស្គាល់ជាអន្តរជាតិតាមរយៈប្រតិបត្តិការចម្រុះដ៏សម្បួរបែប ហាងកាហ្វេ Hard Rock Café គឺជាជម្រើសដ៏ល្អបំផុតរបស់អតិថិជនគ្រប់រូប។ ជាមួយនឹងកំណើនដ៏ឆាប់រហ័សនៃវិស័យម្ហូបអាហារ និងភេសជ្ជៈនៅក្នុងប្រទេស កម្ពុជា នារយៈពេល ៥ ឆ្នាំចុងក្រោយនេះវាគឺជាសញ្ញាដ៏វិជ្ជមានមួយដែលបង្ហាញយ៉ាងច្បាស់អំពីឱកាសដ៏ធំនៅក្នុងទីផ្សារកម្ពុជា។
លោក Tan ថ្លែងថា៖«ក្នុងនាមជាម៉ាកយីហោអន្តរជាតិ ហាងកាហ្វេ Hard Rock Café ផ្តល់ជូននូវម្ហូបអាហារភេសជ្ជៈស្រាក្រឡុករួមនឹងសេវាកម្មដែលមានគុណភាពខ្ពស់ជាច្រើនទៀត។ យើងក៏បានផ្តល់ការងារដល់ប្រជាជនកម្ពុជាជាង ១២០ នាក់ផងដែររួមនឹងការបណ្តុះបណ្តាលក្រុមការងារដើម្បីរក្សាគុណភាពសេវាកម្មរបស់យើងឲ្យបានល្អបំផុត»។
ហាងកាហ្វេ Hard Rock Café កំពុងស្ថិតនៅក្នុងទីតាំងមួយដ៏ល្អក្នុងការទទួលបានអត្ថប្រយោជន៍ពីការរីកចម្រើននៃវិស័យនេះហើយនឹងបន្តផ្តល់អត្ថប្រយោជន៍ជាច្រើនដល់ប្រជាជនកម្ពុជាដែលជាបុគ្គលិករបស់ក្រុមហ៊ុន។ កូនសោគន្លឹះដ៏សំខាន់នៅក្នុងការធ្វើជំនួញប្រកបដោយភាពជោគជ័យនៅក្នុងប្រទេស កម្ពុជា គឺអាជីវកម្មដែលអាចផ្តល់ការងារដល់ពលរដ្ឋកម្ពុជា។
លោក Tan ឲ្យដឹងទៀតថា៖ «តាមរយៈបទពិសោធ ៨ ឆ្នាំចុងក្រោយរបស់ខ្ញុំៗមើលឃើញថាមានម៉ាកយីហោអន្តរជាតិល្បីៗច្រើនឡើងៗ បានហក់ចូលមកក្នុងទីផ្សារកម្ពុជា [ហើយ] នៅក្នុងរយៈពេល ២ ឆ្នាំចុងក្រោយនេះក៏មានមួយចំនួនបានចាកចេញទៅវិញដែរ»។
ទាក់ទងទៅនឹងយុទ្ធសាស្ត្ររបស់ Hard Rock Cafes គឺក្រុមហ៊ុនប្រើយុទ្ធសាស្ត្រខុសគ្នារវាងហាងទាំង ២ របស់ខ្លួន។ ការទាក់ទាញអតិថិជននៅខេត្តសៀមរាបគឺមានលក្ខណៈខុសគ្នាពីហាងនៅក្នុងរាជធានីភ្នំពេញ។ លោកTan បានកត់សម្គាល់ថា៖ «នៅក្នុងខេត្តសៀមរាបអតិថិជនភាគច្រើនគឺជាភ្ញៀវទេសចរខណៈនៅក្នុងរាជធានីភ្នំពេញភាគច្រើនអតិថិជនក្នុងស្រុកនិងអ្នកស្នាក់នៅជាជនបរទេស»។
លោក Tan បន្ថែមថា នៅក្នុងរាជធានីភ្នំពេញយើងចង់បញ្ជ្រាបប្រជាពលរដ្ឋឲ្យស្គាល់អំពីម៉ាកយីហោ នេះដែលវាគឺជាធាតុផ្សំដ៏សំខាន់នៅក្នុងយុទ្ធសាស្ត្ររបស់យើងដើម្បីឲ្យពួកគាត់ទទួលបាននូវបទពិសោធដ៏អស្ចារ្យពីម៉ាកយីហោដ៏ល្បីល្បាញមួយនេះ។
យោងតាមលោក Tan បានឲ្យដឹងថាដើម្បីរៀបចំផែនការនាពេលអនាគត វិស័យនេះត្រូវការស្ថិរភាពនិងកំណើន។ អាជីវកម្មម្ហូបអាហារនិងភេសជ្ជៈនឹងបន្តកើនឡើងជានិច្ចដរាបណានៅតែមានតម្រូវការ។ ប្រទេសមួយចំនួនដូចជាសិង្ហបុរី និងថៃគឺជាឧទាហរណ៍ដ៏ល្អមួយដែលបានបង្ហាញអំពីរបៀបដែលឧស្សាហកម្មម្ហូបអាហាររីកលូតលាស់និងផ្លាស់ប្តូរជាលំដាប់។ នៅក្នុងប្រទេស កម្ពុជា ទីផ្សារម្ហូបអាហារ និងភេសជ្ជៈកំពុងរីកចម្រើនដោយសារតែប្រជាពលរដ្ឋដែលចំណូលមធ្យមកំពុងកើនឡើងហើយប្រជាជនកម្ពុជាកាន់តែច្រើនមានប្រាក់ចំណូលកាន់តែខ្ពស់បើប្រៀបធៀបទៅនឹងអតីតកាល។
នៅពេលប្រជាពលរដ្ឋដែលមានចំណូលមធ្យមនៅកម្ពុជាកើនឡើងនោះទីផ្សារម្ហូបអាហារភេសជ្ជៈនឹងទទួលបានអត្ថប្រយោជន៍ច្រើនទាំងកំណើន នៃការលក់និងកំណើនប្រាក់ខែរបស់បុគ្គលិក។ លោកបានបន្តថា៖ «គ្រាន់តែនៅក្នុងរាជធានីភ្នំពេញ តែ ១ ប្រាក់ខែ គឺខ្ពស់ជាងនៅតាមខេត្តនានាក្នុងប្រទេស កម្ពុជា រហូតដល់ ៥៩ ភាគរយឯណោះ»។
លោក Tan ពន្យល់ថា វានឹងនៅតែបន្តមួយរយៈពេលទៅមុខទៀតដោយសារតែនិរន្តរភាពសេដ្ឋកិច្ចកម្ពុជា»។ Hard Rock Café មានលក់ ម្ហូបអាហារ ភេសជ្ជៈ សម្លៀកបំពាក់ កាបូប ពែង មានផ្សាយផ្ទាល់ការប្រគំតន្ត្រី និងផលិតផលជាច្រើនមុខទៀត។ Hard Rock Café ជាម៉ាកយីហោដ៏ល្បីល្បាញដែលផ្តល់ជូននូវបទពិសោធដ៏អស្ចារ្យដល់អតិថិជនគ្រប់រូប។
លោក Tan ជឿជាក់ថា ទីផ្សារកម្ពុជាបានត្រៀមខ្លួនរួចជាស្រេចដើម្បីទទួលស្វាគមន៍ម៉ាកយីហោអន្តរជាតិល្បីៗដើម្បីបម្រើដល់អតិថិជនរបស់ពួកគេនៅក្នុងប្រទេស កម្ពុជា។ ហាងកាហ្វេ Hard Rock Café ជឿជាក់ថាខ្លួននឹងក្លាយជាផ្នែកមួយនៃទីផ្សារជាអចិន្រ្តៃយ៍នៅកម្ពុជា៕
