.jpg)
Paulaner ត្រូវបានបង្កើតឡើងនៅក្នុងទីក្រុងមុយនិចចាប់តាំងពីឆ្នាំ ១៦៣៤។
ស្រាបៀរ Paulaner ជាស្រាបៀរស្រូវសាលី (weissbier) លេខ ១ របស់អាល្លឺម៉ង់កំពុងទទួលបានប្រជាប្រិយភាពកាន់តែខ្លាំងឡើងៗនៅក្នុងប្រទេសកម្ពុជា ពីព្រោះវាផ្តល់ឱ្យអ្នកចូលចិត្តស្រាបៀរនៅកម្ពុជានូវជម្រើសកាន់តែពិសេសប្លែកនៅក្នុងទីផ្សារ។
ស្រាបៀរអាល្លឺម៉ង់ដ៏ល្បីល្បាញនៅលើពិភពលោកមួយនេះមានវត្តមាននៅក្នុងប្រទេសកម្ពុជាអស់រយៈពេលប្រមាណ ១ ឆ្នាំមកហើយ និងត្រូវបានកត់សម្គាល់ឃើញថាការលក់មានសម្ទុះខ្លាំង ហើយមានសុទិដ្ឋិនិយមខ្ពស់សម្រាប់ឆ្នាំ ២០២១។
«ស្រាបៀរ Paulaner គឺជាស្រាបៀរដើមនាំចូលពីអាល្លឺម៉ង់តែមួយនៅកម្ពុជា ហើយជាស្រាបៀរឧបត្ថម្ភផ្លូវការរបស់ក្លិប Bayern Munich FC ដែលកំពុងរីកចម្រើនយ៉ាងឆាប់រហ័សនៅក្នុងប្រទេសកម្ពុជា។ យើងបានបន្តមើលឃើញការលក់មានកំណើនខ្លាំង ទោះបីរងឥទ្ធិពលជំងឺកូវីដ១៩ និងវិធានការប្រយុទ្ធប្រឆាំងនឹងការរីករាលដាលក៏ដោយ»។
លោក Dirk Zylla នាយកក្រុមហ៊ុន DKJ Co Ltd ដែលជាក្រុមហ៊ុនចែកចាយផ្លូវការរបស់ស្រាបៀរ Paulaner នៅកម្ពុជាធ្វើការជាមួយដៃគូនាំចូល CYCS Co Ltd បានថ្លែងថា៖ «ដូច្នេះយើងមានទំនុកចិត្តខ្ពស់ក្នុងការសម្រេចឲ្យបានដល់គោលដៅរបស់យើងសម្រាប់ឆ្នាំនេះ គឺគ្រោងលក់ឱ្យបាន ១ ០០០ ហិកតូលីត (hectalitres)»។
ប្រជាជនកម្ពុជាទទួលទានស្រាបៀរប្រមាណ ៦,១ លានហិកតូលីតក្នុង ១ ឆ្នាំ ឬ ៦០០ លានលីត្រ ដែលជាមធ្យម ៣៨,៦ លីត្រ សម្រាប់មនុស្សម្នាក់ក្នុង ១ ឆ្នាំតំណាងឱ្យចំណែកទីផ្សារ ០,១ ភាគរយ។
លោក Dirk Zylla ប្រធានក្រុមហ៊ុន DKJ Co Ltd។
លោក Zylla បញ្ជាក់ថា៖ «យើងរីករាយដែលយើងជាយីហោដ៏មានគុណភាព។ បច្ចុប្បន្នគេឃើញមានស្រាបៀរក្នុងស្រុក និងស្រាបៀរប្រភេទ craft beer កាន់តែច្រើន ប៉ុន្តែយើងផ្តល់ជូននូវបទពិសោធស្រាបៀរអាល្លឺម៉ង់ពិសេស និងពិតប្រាកដ»។
បុរសជនជាតិអាល្លឺម៉ង់រូបនេះបានធ្វើការយ៉ាងជិតស្និទ្ធជាមួយ Paulaner នៅប្រទេសអាល្លឺម៉ង់អស់រយៈពេលជាច្រើនឆ្នាំ ហើយលោកធ្លាប់គ្រប់គ្រងបារ៍មួយ ជាកន្លែងដែលកីឡាករបាល់ទាត់ Mainz បុគ្គលិក គ្រូបង្វឹក ជួបជុំគ្នា ហើយលោកនៅតែជាមិត្តភក្តិរបស់អ្នកចាត់ការក្រុម Liverpool បច្ចុប្បន្នលោក Jurgen Klopp។
ដោយបានឈានជើងចូលក្នុងវិស័យផលិតស្រាបៀរបែបប្រពៃណីអាល្លឺម៉ង់ លោក Zylla បានមើលឃើញកង្វះស្រាបៀរគុណភាពខ្ពស់នាំចូលកម្ពុជា បន្ទាប់ពីបានផ្លាស់មករស់នៅក្នុងប្រទេសកម្ពុជាប្រហែលមួយទសវត្សរ៍មុន ហើយលោកក៏បានចាប់ផ្តើមបង្កើតក្រុមហ៊ុនស្រាបៀរ Paulaner នៅកម្ពុជា។
លោកបានថ្លែងថា៖ «Paulaner weissbier ស្រាបៀរស្រូវសាលីរហូតមកដល់ពេលនេះជាផលិតផលដ៏មានប្រជាប្រិយបំផុតរបស់យើង ហើយយើងក៏លក់ស្រាបៀរ Paulaner Hefe Weizen Dunkel ដែលជាម៉ាកលក់ដាច់បន្ទាប់ ក៏ដូចជាស្រាបៀរ Paulaner Muncher Hell។ ដូច្នេះយើងផ្គត់ផ្គង់ស្រាបៀរជាច្រើនប្រភេទ»។
Paulaner ត្រូវបានបង្កើតឡើងក្នុងឆ្នាំ ១៦៣៤ នៅក្នុងទីក្រុងមុយនិច ហើយក្រុមហ៊ុនស្រាបៀរនៅរដ្ឋ Bavarian មួយនេះ គឺ ១ ក្នុងចំណោម ៦ ដែលផលិតសម្រាប់ពិធីបុណ្យ Oktoberfest ដ៏ល្បីល្បាញ ដែលជាពិធីបុណ្យស្រាបៀររបស់ទីក្រុងដែលបានចាប់ផ្តើមតាំងពីឆ្នាំ ១៨១០។
ស្រាបៀរត្រូវបានផលិតដោយប្រើប្រាស់គ្រឿងផ្សំគុណភាពខ្ពស់ពិតប្រាកដ និងប្រកាន់ខ្ជាប់យ៉ាងតឹងរ៉ឹងស្របតាមច្បាប់របស់អាល្លឺម៉ង់ Reinheitsgebot ឆ្នាំ ១៥១៦ ដែលចែងថាមានតែទឹកស្រូវបាឡេ (barley) និងផ្កាហប់ ប៉ុណ្ណោះ ដែលអាចប្រើដើម្បីផលិតកម្មស្រាបៀរ។
ក្នុងនាមជាស្រាបៀរស្រូវសាលីដែលត្រូវបានផលិតជាបន្តបន្ទាប់នៅក្នុងរដ្ឋ Bavaria ចាប់តាំងពីឆ្នាំ ១០៤០ មកនោះមានន័យថា ស្រាបៀរ Paulaner weissbier ផ្តល់នូវបទពិសោធដ៏ពិសេសជាអ្វីដែលក្រុមហ៊ុនផលិតស្រាបៀរ មានមោទភាព។
លោកបន្តថា៖ «អ្នកជំនាញស្រាបៀរបានកោតសរសើរចំពោះកំណត់ត្រាដ៏ល្អនៃដំបែ និងក្លិនក្រអូប និងរសជាតិដ៏ឈ្ងុយឆ្ងាញ់។ វាជាស្រាបៀរផ្តល់ភាពរីករាយសម្រាប់ការជួបជុំរបស់មនុស្សនៅជុំវិញពិភពលោក»។
លោក Zylla ក៏បានលើកឡើងថារសជាតិទាំងនេះផ្សំគ្នាដែលធ្វើឱ្យស្រាបៀរ Paulaner ទទួលបានការចាប់អារម្មណ៍ខ្លាំងនៅកម្ពុជា។
«វាមិនមែនគ្រាន់តែពេញនិយមសម្រាប់ប្រជាជនលោកខាងលិចប៉ុណ្ណោះទេ ប៉ុន្តែប្រជាជនកម្ពុជាក៏ពេញនិយមដែរ។ វាមានរសជាតិផ្អែមតិចតួច និងមិនជូរ ជារសជាតិដែលត្រូវនឹងប្រជាជនកម្ពុជា»។
«៦០ ភាគរយនៃការលក់របស់យើងបច្ចុប្បន្នគឺនៅតាមបារ៍ និងភោជនីយដ្ឋាន ដោយស្រាបៀរ Paulaner មាននៅតាមហាងពេញនិយមមួយចំនួនក្នុងរាជធានីភ្នំពេញរួមទាំងហាង Rukkha មាត់ទន្លេ ភោជនីយដ្ឋាន Samba Brazilian Samba និងហាង Drum Bar នៅទួលគោក។
«ការលក់ ៤០ ភាគរយផ្សេងទៀតគឺត្រូវលក់នៅក្នុងចំនួនប្រហាក់ប្រហែលគ្នានៅតាមសណ្ឋាគារ និងតាមរយៈការដឹកជញ្ជូនទៅតាមផ្ទះ»។
លោក Zylla បានលើកឡើងថា៖ «បណ្តាសណ្ឋាគារអន្តរជាតិល្បីៗនៅក្នុងប្រទេសកម្ពុជា Sofitel និង Raffles ជ្រើសរើសស្រាបៀរ Paulaner ដោយសារតែគុណភាពរបស់វា និងដោយសារតែយីហោអន្តរជាតិដ៏ល្បីល្បាញនៅលើពិភពលោកដែលត្រូវបានទទួលទាននៅក្នុងប្រទេសជាង ៧០ នៅជុំវិញពិភពលោក»។
«យើងកំពុងពង្រីកនៅខាងក្រៅរាជធានីភ្នំពេញទៅកាន់ខេត្តសៀមរាប កំពត និងនៅតាមកោះមួយចំនួន។ គោលដៅសម្រាប់ឆ្នាំនេះគឺធ្វើឱ្យស្រាបៀរ Paulaner ក្លាយជាយីហោដ៏សំខាន់មួយសម្រាប់បារ៍លំដាប់ខ្ពស់ សណ្ឋាគារអន្តរជាតិ និងសណ្ឋាគារប្រភេទ boutique»។
លោក Zylla មានប្រសាសន៍ថា៖ «ថ្ងៃណាមួយខ្ញុំចង់នាំយកបទពិសោធនៃការទទួលទានស្រាបៀររបស់រដ្ឋ Bavarian មកកាន់ប្រទេសកម្ពុជាតាមរយៈការបើកហាង Paulaner wirstshaus លក្ខណៈអាល្លឺម៉ង់»៕
