គ្មានអ្វីធ្វើឱ្យអ្នកពិបាកចិត្តជាង នៅពេលដែលអ្នកធ្វើដំណើរតាមដងផ្លូវ ហើយរថយន្តរបស់អ្នកខូចអាគុយ ឬបែកកង់នោះទេ ដែលធ្វើឱ្យការធ្វើដំណើររបស់អ្នកត្រូវជួបឧបសគ្គ ហើយអ្វីដែលកាន់តែធ្ងន់ធ្ងរទៀតនោះគឺនៅក្នុងប្រទេសកម្ពុជា សេវាកម្មប្តូរកង់ និងជួសជុលរថយន្តនៅតាមដងផ្លូវគឺនៅមានតិចតួចនៅឡើយ។
ប៉ុន្តែបញ្ហានេះកំពុងត្រូវបានផ្លាស់ប្តូរដោយមានក្រុមហ៊ុនលក់ និងប្តូរកង់រថយន្តក្នុងស្រុក Smart Auto ដែលធ្វើឱ្យលោកអ្នកអស់កង្វល់ ខណៈសេវាកម្មនេះគឺជាឱកាសដ៏ប្រសើរក្នុងទីផ្សារនាពេលបច្ចុប្បន្ន។
អ្នកគ្រប់គ្រងទូទៅនៃ Smart Auto លោក ជា វិបុល មានប្រសាសន៍ថា៖ «រថយន្តសេវាកម្មរបស់ Smart Auto បំពាក់នូវឧបករណ៍ទំនើបៗគ្រប់គ្រាន់ សម្រាប់ផ្លាស់ប្តូរសម្បកកង់រថយន្ត និងប្រព័ន្ធថ្លឹងកង់ឱ្យស្មើគ្នា ហើយរថយន្តផ្តល់សេវាកម្មនេះនឹងទៅដល់ទីកន្លែងក្នុងរយៈពេល ៣០ ទៅ ៤៥ នាទី អាស្រ័យលើស្ថានភាពចរាចរណ៍។ បុគ្គលិករបស់យើងនឹងធ្វើការជួសជុលកង់រថយន្ត ឬប្តូរអាគុយក្នុងរយៈពេល ១៥ ទៅ ២០ នាទី អាស្រ័យលើទំហំនៃការខូចខាត»។
«យើងគឺជាក្រុមហ៊ុនដំបូងគេដែលផ្តល់នូវផលិតផល និងសេវាកម្មប្រភេទនេះទៅកាន់ទីផ្សារ។ ខណៈយើងទើបតែចាប់ផ្តើមប្រតិបត្តិការកាលពីឆ្នាំមុន ហើយអំឡុងជំងឺកូវីដ១៩ នេះយើងទទួលបានអតិថិជនជាច្រើន ជាពិសេសសម្រាប់សេវាកម្មប្តូរអាគុយ និងសម្បកកង់រថយន្តចល័ត គឺមានភាពវិជ្ជមានខ្លាំងណាស់»។
តម្រូវការសេវាកម្មនេះរំពឹងថានឹងកើនឡើង។ យោងតាមរបាយការណ៍ថ្មីៗដែលចេញផ្សាយដោយក្រុមហ៊ុនស្រាវជ្រាវទីផ្សារអន្តរជាតិ Acumen Research and Consulting បានបង្ហាញថា ទំហំទីផ្សារផ្តល់ជំនួយតាមចិញ្ចើមផ្លូវជាសកលត្រូវបានរំពឹងថានឹងកើនឡើងដល់ ២៩ ពាន់លានដុល្លារ នៅឆ្នាំ ២០២៦ និងកំពុងកើនឡើងក្នុងអត្រាកំណើនប្រចាំឆ្នាំ ៣,៨ ភាគរយ។ ជាមួយនឹងសេវាកម្មចុងក្រោយនេះ Smart Auto កំពុងផ្លាស់ប្តូរបទពិសោធការបើកបរនៅកម្ពុជា។
ការបង្កើតអាជីវកម្មលក់រាយសម្បកកង់រថយន្ត និងលក់អាគុយតាមអនឡាញដោយឯករាជ្យ គឺដើម្បីផ្តល់សេវាកម្មប្តូរសម្បកកង់ និងប្តូរអាគុយរថយន្តរបស់អតិថិជនឱ្យកាន់តែមានភាពងាយស្រួល ហើយក្រុមហ៊ុនមានទំនុកចិត្តខ្ពស់នៅក្នុងការផ្តល់សេវាកម្មនេះ។
លោក វិបុល ថ្លែងថា៖ «រឿងដំបូងដែលខ្ញុំជឿជាក់គឺទទួលបានការជឿទុកចិត្ត និងផ្តល់ការពេញចិត្តពីអតិថិជន នេះជាអ្វីដែលយើងកំពុងធ្វើ។ នាពេលអនាគតយើងជឿជាក់ថាយើងអាចចាប់យកចំណែកទីផ្សារយ៉ាងហោចណាស់ ២០ ភាគរយពីហាងលក់រាយធម្មតា»។
«យើងជាក្រុមហ៊ុនឯករាជ្យលក់រាយសម្បកកង់តាមប្រព័ន្ធអ៊ីនធើណិតដែលអតិថិជនអាចស្វែងរកព័ត៌មានគ្រប់ម៉ាក ទំហំ និងតម្លៃនៃសម្បកកង់រថយន្តដែលពួកគេកំពុងស្វែងរកដើម្បីបំពេញតាមតម្រូវការ និងថវិការបស់ពួកគេ»។
លោក វិបុល បានបន្តថា៖ «បន្ទាប់ពីអតិថិជនបានបញ្ជាក់ពីជម្រើស និងកាលបរិច្ឆេទ ទីតាំង និងពេលវេលាដែលសមស្របបំផុតសម្រាប់ពួកគេ នោះរថយន្តសេវាកម្មរបស់យើងនឹងទៅដល់អតិថិជនដើម្បីប្តូរកង់រថយន្តរបស់អតិថិជន»។
ហើយក៏ជួយអតិថិជនក្នុងការសម្រេចចិត្តល្អបំផុត តាមរយៈការផ្តល់ព័ត៌មាន ដើម្បីបំពេញតាមតម្រូវការរបស់ពួកគេ ដែលបង្កើនការជឿទុកចិត្តរបស់អតិថិជនបន្ថែមទៀតដោយផ្តល់ជូននូវផលិតផលដែលមានតម្លៃប្រកួតប្រជែងនៅលើទីផ្សារ។
លោក វិបុល បន្ថែមថា៖ «សម្បកកង់ត្រូវប្តូររៀងរាល់ ៧ ម៉ឺន ទៅ ៩ ម៉ឺន គីឡូម៉ែត្រម្តង។ របៀបប្តូរកង់រថយន្តគឺជាការសម្រេចចិត្តដ៏ធំមួយសម្រាប់ម្ចាស់យានយន្ត ពីព្រោះវានឹងជះឥទ្ធិពលដល់សុវត្ថិភាពអ្នកបើកបរ និងអ្នកដំណើរ។ អាយុកាលរបស់អាគុយគឺមានចាប់ពី ១ ទៅ ២ ឆ្នាំ»។ ក្រុមហ៊ុនប្តូរ និងលក់រថយន្តអនឡាញដែលកំពុងរីកចម្រើនមួយនេះក៏កំពុងស្វែងរកការពង្រីកសេវាកម្ម និងវិសាលភាពរបស់ខ្លួននៅតាមដងផ្លូវផងដែរ។
«បច្ចុប្បន្ន យើងផ្តល់ជូនតែសេវាកម្មប្តូរអាគុយ និងសម្បកកង់ចល័តនៅក្នុងរាជធានីភ្នំពេញចន្លោះពីម៉ោង ៧ ព្រឹក ដល់ម៉ោង ៧ យប់តែប៉ុណ្ណោះក្នុង ១ សប្តាហ៍ ប៉ុន្តែយើងកំពុងសម្លឹងរកការពង្រីកសមត្ថភាពសេវាកម្មរបស់យើងនៅពេលដែលកម្មវិធីទូរស័ព្ទចល័តរបស់យើងត្រូវបានដាក់ឱ្យប្រើប្រាស់នៅទូទាំងប្រទេសនាពេលអនាគតដ៏ខ្លី»។
លោក វីបុល ថ្លែងថា៖ «ដើម្បីធ្វើឱ្យសេវាកម្មរបស់យើងកាន់តែងាយស្រួលសម្រាប់ម្ចាស់រថយន្ត យើងក៏មានគម្រោងដែលកំពុងដំណើរការ សម្រាប់ក្រុមហ៊ុន Smart Auto ក្នុងការបង្កើតក្លិបមួយដែលសមាជិកត្រូវបានគិតថ្លៃសេវាជាវប្រចាំឆ្នាំ ដើម្បីរីករាយនឹងសេវាកម្មដែលផ្តល់ជូនក៏ដូចជាសេវាកម្មជំនួយបន្ថែមតាមដងផ្លូវដោយឥតគិតថ្លៃ»។
លោក វិបុល ជឿជាក់ថា Smart Auto គឺជាគំរូអាជីវកម្មប្រកបដោយនិរន្តរភាពមួយដែលនឹងធ្វើឱ្យសេដ្ឋកិច្ចមានការរីកចម្រើនបន្ថែមទៀត នៅពេលដែលកម្ពុជាចាប់យកឧស្សាហកម្ម ៤.០ ។ «អតិថិជនបច្ចុប្បន្នកំពុងស្វែងរកវិធីកាន់តែងាយស្រួលជាងមុនក្នុងការទិញទំនិញខណៈអតិថិជនក៏កំពុងងាកទៅរកវេទិកាឌីជីថល។ វេទិកាឌីជីថលនេះក៏រួមបញ្ចូលទាំងការទិញគ្រឿងបន្លាស់រថយន្តដូចជាសម្បកកង់ និងអាគុយតាមអនឡាញផងដែរ»។ «ជាមួយនឹងការណែនាំបច្ចេកវិទ្យា 5G តម្រូវការនឹងកាន់តែបន្តកើនឡើង ខណៈអតិថិជនកាន់តែច្រើននឹងងាកមកទិញទំនិញតាមអនឡាញដោយផ្ទាល់ពីហាងលក់រាយ។ ជាមួយ Smart Auto យើងនៅតែបន្តបង្កើនការជឿទុកចិត្ត និងពង្រីកសេវាកម្មរបស់យើង ហើយយើងឈរនៅទីតាំងល្អឥតខ្ចោះ ដើម្បីរីកចម្រើនទៅមុខ»៕