មូលនិធិសម្រាប់អាជីវកម្មបែបឌីជីថលរបស់ក្រុមហ៊ុន Smart Axiata (SADIF) បានប្រកាសពីការវិនិយោគចុង ក្រោយបំផុតរបស់ខ្លួនក្នុងក្រុមហ៊ុន Okra Solar ដែលជាក្រុមហ៊ុនផ្គត់ផ្គង់កម្មវិធីថាមពល solar ក្នុង ប្រទេស កម្ពុជា និងក្រុមហ៊ុន Sousdey Cambodia ដែលជាកម្មវិធីទីផ្សារបែបឌីជីថល និងដំណោះស្រាយ សហគ្រាសសម្រាប់ការគ្រប់គ្រងទំនាក់ទំនងជាមួយអតិថិជន។
តាមរយៈការចូលរួមជាមួយនឹងក្រុមហ៊ុន Morakot Technology, Joonaak Delivery, Nham24 និង Agribuddy ក្រុមវិនិយោគិននៃអាជីវកម្មឌីជីថលក្នុងស្រុករបស់មូលនិធិ SADIF បានពង្រីកវិសាលភាពរបស់ខ្លួនរហូតដល់ ៦ ក្រុមហ៊ុន។
លោក គឹម បូរ៉ា ដៃគូរបស់ក្រុមហ៊ុន Mekong Strategic Partners ជាក្រុមហ៊ុនវិនិយោគដែលគ្រប់គ្រង មូលនិធិ SADIF បានឲ្យដឹងថា៖ «ការវិនិយោគរបស់យើងទៅក្នុងក្រុមហ៊ុន Okra បញ្ជាក់ពីសារៈសំខាន់នៃរបកគំហើញថ្មីដើម្បីដោះស្រាយបញ្ហាទាក់ទងទៅនឹងប្រជាពលរដ្ឋដែលខ្វះខាតការផ្គត់ផ្គង់បំផុតខណៈពេលដែលពួកគេបន្តការចូលរួមផ្តល់នូវកំណើនសេដ្ឋកិច្ចនិងបង្កើតឥទ្ធិពល ក្នុងមាត្រដ្ឋានសកល។ ក្រុមហ៊ុន Sousdey Cambodia ផ្តោតលើល្បឿនក៏ដូចជាទំហំ នៃកម្មវិធីដែលមានមូលដ្ឋានលើ AI ដើម្បី ដោះស្រាយបញ្ហាទាក់ទងនឹងការចូលរួម របស់អតិថិជន»។
ដោយត្រូវបានបង្កើតឡើងនៅឆ្នាំ ២០១៦ ក្រុមហ៊ុន Okra ដែលជាក្រុមហ៊ុនបច្ចេកវិទ្យាបែប “Internet of Things (IoT)” ដោយជួយសហគមន៏ជនបទដាច់ស្រយាលក្នុងការទទួលបានបច្ចេកវិទ្យា ពន្លឺ ព្រះអាទិត្យ ដែលមានតម្លៃសមរម្យដោយប្រើបច្ចេកវិទ្យាថាមពលចែកចាយទំនើប។ កម្មវិធី software របស់ក្រុមហ៊ុននេះអាចយកបន្ទះ solar និងអាគុយ ដើម្បីដំឡើងទៅជាប្រព័ន្ធផ្គត់ផ្គង់អគ្គិសនីខ្នាតតូច (Microgrids) ឆ្លាតវៃសម្រាប់ការផ្គត់ផ្គង់អគ្គិសនីដល់គ្រួសារដាច់ស្រយាលក្នុងការប្រើប្រាស់។
ក្រុមហ៊ុន Okra បានផ្គត់ផ្គង់អគ្គិសនីដល់ប្រជាពលរដ្ឋជាង ៥០០ នាក់ និងគ្រួសារជាង ១០០ គ្រួសារក្នុងប្រទេស កម្ពុជា។ ក្រុមហ៊ុនបានផ្ដើមកម្មវិធីសាកល្បងរបស់ខ្លួនក្នុងប្រទេស កម្ពុជា ហើយបានចុះអនុស្សណៈ យោគយល់គ្នាជាមួយនឹងក្រុមហ៊ុនចែកចាយអគ្គិសនីជាតិ និងអន្តរជាតិជាច្រើន។
លោក Afnan Hannan សហស្ថាបនិកក្រុមហ៊ុន Okra បានមានប្រសាសន៍ថា៖ «យើងមានការរំភើបខ្លាំងណាស់ក្នុងការទទួលបានការគាំទ្រពីមូលនិធិ SADIF ។ នេះគឺជារឿងធម្មតាមួយ ក្នុងការធ្វើជាដៃគូជាមួយក្រុមហ៊ុន Smart ខណៈដែលយើងប្រើបណ្តាញភ្ជាប់រួចជាស្រេចដើម្បីគ្រប់គ្រង និងត្រួតពិនិត្យពីចម្ងាយទៅលើប្រព័ន្ធផ្គត់ផ្គង់អគ្គិសនីខ្នាតតូចដែលហៅថា Internet of Things (IoT) microgrids របស់យើង។ បណ្ដាញភ្ជាប់ ពិតជាមានសារៈសំខាន់ខ្លាំងណាស់ក្នុងការប្រមូលទិន្នន័យឧបករណ៍ចាប់សញ្ញា និងបញ្ជូនការគ្រប់គ្រងដែលយើងត្រូវការដើម្បីធានាថា សហគមន៍មានលទ្ធភាព ប្រើប្រាស់ថាមពល»។
លោក ថូម៉ាស់ ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiataបញ្ជាក់ថា៖ «អគ្គិសនីគឺជាកត្តាចាំបាច់មួយសម្រាប់ជីវភាពរស់នៅរបស់មនុស្សទូទៅ ប៉ុន្តែមនុស្សជាង ១,២ ពាន់លាននាក់នៅក្នុងពិភពលោកបន្តរស់នៅដោយគ្មានអគ្គិសនីគ្រប់គ្រាន់។ បច្ចេកវិទ្យាខុសប្លែកពីគេ និងគំរូអាជីវកម្មរបស់ក្រុមហ៊ុន Okra មានសមត្ថភាពផ្គត់ផ្គង់ និងឆ្លើយតបជាវិជ្ជមានដល់ពលរដ្ឋដែលរស់នៅគ្មានអគ្គិសនីក្នុងប្រទេស កម្ពុជា និងផ្គត់ផ្គង់លើសពីនេះទៅទៀត»។
តាមរយៈចាប់ផ្តើមប្រតិបត្តិការអាជីវកម្មរបស់ខ្លួនក្នុងឆ្នាំ ២០១៧ ក្រុមហ៊ុន Sousdey Cambodia បានក្លាយជាក្រុមហ៊ុនដំបូងគេក្នុងទីផ្សារក្នុងស្រុកសម្រាប់ការប្រើប្រាស់សេវាឆ្លងឆ្លើយស្វ័យប្រវត្តិលើកម្មវិធី Facebook Messenger របស់ខ្លួន និងជាក្រុមហ៊ុនដំបូងគេបង្អស់ដែលបង្កើតកម្មវិធី Khmer Natural Language Processing និងជាផ្លាតហ្វមមួយដែលផ្តោតលើកម្មវិធីប្រាជ្ញាសិប្បនិម្មិត (AI)។ សហគ្រាសធុនតូច និងមធ្យម និងអជីវកម្មស្ទើរតែទាំងអស់ក្នុងប្រទេស កម្ពុជា ប្រើប្រាស់កម្មវិធី Facebook និងកម្មវិធី Facebook Messenger ប៉ុន្តែប្រហែលពិបាកក្នុងទាក់ទងឲ្យមានប្រសិទ្ធភាពជាមួយអតិថិជនជាច្រើនរបស់ពួកគេ។
លោក Djibril Cisse ស្ថាបនិក និងនាយកប្រតិបត្តិក្រុមហ៊ុន Sousdey Cambodia បានមានប្រសាសន៍ថា៖ «ការផ្ដល់ប្រាក់ពីមូលនិធិ SADIF នឹងជួយដល់ការអភិវឌ្ឍកម្មវិធីរបស់យើងឲ្យកាន់តែប្រសើរឡើងខណៈពេលពង្រឹងការខិតខំប្រឹងប្រែងផ្នែកលក់ និងទីផ្សារដើម្បីពង្រីកផលិតផលរបស់យើង។ ក្រុមហ៊ុន Sousdey Cambodia សង្ឃឹមថានឹងសហការជាមួយក្រុមហ៊ុន Smart ក្រុមហ៊ុន Forte និង ក្រុមហ៊ុន MSP ដើម្បីជួយដល់អតិថិជនសហគ្រាស និងបង្កើតផលិតផលលំដាប់ថ្នាក់ពិភពលោករបស់សហគ្រាស»។
លោក Charles Cheo នាយកប្រតិបត្តិក្រុមហ៊ុនធានារ៉ាប់រង Forte និងជាក្រុមហ៊ុនដៃគូរបស់មូលនិធិ SADIF បានបន្ថែមថា៖ «កំណើនទីផ្សារយ៉ាងឆាប់រហ័សនៃពាណិជ្ជកម្មអេឡិចត្រូនិកផ្ដល់ឱកាសដល់ពាណិជ្ជករដើម្បីបង្កើតទំនាក់ទំនងជាមួយអតិថិជនដ៏ច្រើន។ ទោះជាយ៉ាងណាក៏ដោយចំណុចអកុសលជាទូទៅ គឺថាចាប់តាំងពីប្រតិបត្តិការទាំងអស់ត្រូវបានដំណើរការដោយដៃបញ្ហាអាចកើតមានឡើងនៅក្នុងដំណើរការទាំងមូល។ ដំណោះស្រាយសហគ្រិនរបស់ក្រុមហ៊ុន Sousdey មានសមត្ថភាពក្នុងការកត់សម្គាល់ទាំងអតិថិជន និងពាណិជ្ជករ»។
ក្រុមហ៊ុន Sousdey ក៏ជួយឲ្យមានដំណើរការទៅលើផ្លាតហ្វមផ្ញើសារ និងវិភាគសម្រាប់ការគ្រប់គ្រងទំនាក់ទំនងអថិតិជនផងដែរ។ ជាមួយនឹងផ្លាតហ្វមនេះ អតិថិជនសហគ្រាសអាចប្តូរនូវដំណោះស្រាយផ្សេងៗ ដើម្បីធ្វើអន្តរកម្មជាមួយអតិថិជនដោយស្វ័យប្រវត្តិក្នុងការផ្សព្វផ្សាយការបញ្ជាទិញការកក់ និងការគាំទ្ររបស់អតិថិជនក្នុងចំណោមសមត្ថភាពជាច្រើន។ សព្វថ្ងៃនេះ Sousdey បម្រើអតិថិជនជាង 800 ក្រុមហ៊ុននិងសហគ្រាសធុនតូច និងមធ្យម និងបានសម្របសម្រួលជាង 2 លានសន្ទនាតាមរយៈផ្លាតហ្វមរបស់ខ្លួន។
សូមបញ្ជាក់ថា SADIF គឺជាមូលនិធិឌីជីថលដំបូងគេរបស់កម្ពុជា ដែលត្រូវបានគ្រប់គ្រងដោយក្រុមហ៊ុន Mekong Strategic Partners រួមជាមួយនឹងដៃគូវិនិយោគពីក្រុមហ៊ុន Smart Axiata និង Forte Insurance៕