ចំណង់ចំណូលចិត្តចំពោះការទិញទំនិញតាមអនឡាញនៅតែមិនថមថយនោះឡើយក្នុងចំណោមពលរដ្ឋកម្ពុជា ទោះស្ថិតនៅក្នុងបរិយាកាសសេដ្ឋកិច្ចបែបណាក្តី។
អ្នកទិញទំនិញដែលមានជីវភាពធូធារ និងក្រុមអ្នកដែលចូលចិត្តបច្ចេកវិទ្យាវ័យក្មេងនៅតែបន្តប្រមូលផ្តុំគ្នានៅតាមបណ្តាវេបសាយលក់ទំនិញដែលភាគច្រើនជាប្រភេទផលិតផលបែបគ្រឿងសម្អាង សម្លៀកបំពាក់ គ្រឿងអេឡិចត្រូនិក និងឧបករណ៍ប្រើប្រាស់សម្រាប់ស្ត្រីជាដើម។ ពាណិជ្ជកម្មតាមប្រព័ន្ធអេឡិចត្រូនិកកំពុងកើនឡើងនៅកម្ពុជា។
ចំណូលគ្រួសារកើនឡើង ឥទ្ធិពលប្រព័ន្ធផ្សព្វផ្សាយសង្គមចំពោះអ្នកទិញទំនិញ តម្លៃសេវាអ៊ីនធឺណិតសមរម្យរួមជាមួយការទទួលបានបច្ចេកវិទ្យាថ្មីៗ បានធ្វើឲ្យប្រជាជនកម្ពុជាកាន់តែមានភាពងាយស្រួលក្នុងការសម្រេចចិត្តទិញទំនិញ។
ការទិញទំនិញតាមអនឡាញដែលគេមើលឃើញថាទើបតែចាប់ផ្តើមកើនឡើងនោះ ពិតជាបានធ្វើឱ្យឧស្សាហកម្មលក់រាយនៅកម្ពុជាកើនឡើង។
យោងតាមការលើកឡើងរបស់ Datareportal បានបង្ហាញថា អាជីវកម្មជាច្រើនមានការកើនឡើងគួរឲ្យកត់សម្គាល់ ជាពិសេសតួលេខនៃការទូទាត់លុយតាមប្រព័ន្ធឌីជីថលនៅក្នុងប្រទេស ខណៈសេដ្ឋកិច្ចកាន់តែបង្កភាពងាយស្រួលតាមរយៈការទូទាត់ប្រាក់តាមបច្ចេកវិទ្យាអេឡិចត្រូនិកប្រកបដោយប្រសិទ្ធភាព និងមានសុវត្ថិភាពខ្ពស់។
លើសពីនេះបរិបទនៃការប្រើប្រាស់ទូរស័ព្ទដៃនៅកន្លែងធ្វើការ និងនៅក្នុងការងារចាំបាច់ប្រចាំថ្ងៃជាមួយនឹងការទូទាត់តាមប្រព័ន្ធឌីជីថលផងនោះ បានកំពុងតែជួយជំរុញឲ្យចំនួនទូទាត់លុយតាមអនឡាញបានកើនឡើងគួរឲ្យកត់សម្គាល់។
ការចាយវាយដោយគ្មានឧបសគ្គទោះនៅជិត ឬឆ្ងាយបែបនេះ ចំណូលពាណិជ្ជកម្មអេឡិចត្រូនិកត្រូវបានគេរំពឹងថានឹងកើនឡើង ៣០ ភាគរយ ឬ១៦៨ លានដុល្លារក្នុងឆ្នាំ ២០២០ ធៀបនឹងឆ្នាំមុនជាមួយនឹងចំនួនអ្នកទិញទំនិញតាមអនឡាញរំពឹងថានឹងកើនឡើងដល់ ២០ ភាគរយ ឬ ៤,៨ លាននៅក្នុងឆ្នាំនេះ។
ដើម្បីជួយសម្រួលដល់ពាណិជ្ជកម្មតាមប្រព័ន្ធអេឡិចត្រូនិកដែលកំពុងមានកំណើនដ៏ខ្លាំងនេះ UnionPay កំពុងធ្វើការជាមួយដៃគូទាំងក្នុងស្រុក និងក្រៅស្រុក ដើម្បីធ្វើជួយពាណិជ្ជករដែលធ្វើពាណិជ្ជកម្មតាមប្រព័ន្ធអេឡិចត្រូនិកសម្រាប់ពលរដ្ឋក្នុងស្រុកឲ្យកាន់តែមានភាពងាយស្រួល និងមានសុវត្ថិភាព ចំពោះការទូទាត់ប្រាក់តាមប្រព័ន្ធអេឡិចត្រូនិក។
សាជីវកម្មសេវាកម្មហិរញ្ញវត្ថុដែលមានមូលដ្ឋាននៅទីក្រុងស៊ាងហៃមួយនេះ គឺជាក្រុមហ៊ុនទូទាត់ card payment ធំជាងគេបំផុត (កាតឥណពន្ធ និងកាតឥណទានរួមបញ្ចូលគ្នា) នៅក្នុងពិភពលោក ដែលផ្តល់ការទូទាត់តាមទូរស័ព្ទ និងអនឡាញ។ ផ្អែកលើតម្លៃសរុបនៃប្រតិបត្តិការទូទាត់គឺលើស Visa និង Mastercard។
ក្រុមហ៊ុនកំពុងធ្វើការជាមួយធនាគារឈានមុខដូចជាធនាគារ ABA ធនាគារអេស៊ីលីដា ធនាគារ China Bank ធនាគារកាណាឌីយ៉ា និងមួយចំនួនទៀត ដើម្បីពង្រីកបណ្តាញរបស់ខ្លួនតាមប្រព័ន្ធអេឡិចត្រូនិក។
បច្ចុប្បន្ន UnionPay ទទួលបានការជឿជាក់ពីពាណិជ្ជកររកស៊ីតាមអនឡាញជាង ២០ លាននាក់ដែលមកពីឧស្សាហកម្មផ្សេងៗគ្នារាប់ចាប់ពីម្ហូបអាហារ ហ្គេម ដឹកជញ្ជួនម្ហូបអាហារ សេវាសុខភាព និងការលក់រាយដែលមានមូលដ្ឋាននៅ ២០០ ប្រទេស និងតំបន់។ ពាណិជ្ជករក្នុងស្រុកនៅកម្ពុជាមានដូចជា Bloc Delivery Decathlon និង Little Fashion សុទ្ធតែជាអតិថិជនរបស់ខ្លួន។
យោងតាមលោក Wenhui Yang អ្នកចាត់ការទូទៅនៃក្រុមហ៊ុន Union Pay International ប្រចាំតំបន់អាស៊ីអាគ្នេយ៍បានឲ្យដឹងថាការទិញទំនិញតាមអនឡាញផ្តល់អត្ថប្រយោជន៍យ៉ាងច្រើន។ វាមានភាពងាយស្រួលព្រោះមិនចាំបាច់ឈរតម្រង់ជួរដោយត្រូវចំណាយពេលវេលាតែក្នុងរយៈពេលប៉ុន្មាននាទីប៉ុណ្ណោះ។ លើសពីនេះអ្នកទិញមានជម្រើសច្រើនរាប់មិនអស់ដូចជាប្រូមូសិនពិសេសៗ តម្លៃប្រកួតប្រជែង ហើយជាពិសេសគឺមិនចាំបាច់ឆ្លងកាត់ឈ្មួញកណ្តាល។
លោកបន្ថែមថា ទិញទំនិញតាមអនឡាញអ្នកទិញមានជម្រើសគ្មានដែនកំណត់ ដោយពួកគេអាចបញ្ជាទិញស្ទើរតែគ្រប់ម៉ាកផលិតផល។
អ្វីដែលសំខាន់បំផុតនោះគឺការបង់ប្រាក់មានសុវត្ថិភាពខ្ពស់។ UnionPay ផ្តល់នូវដំណោះស្រាយល្អបំផុតដោយផ្ទៀងផ្ទាត់អត្តសញ្ញាណអ្នកកាន់បណ្ណឥណពន្ធ និងឥណទាន និងកាតបង់ប្រាក់ជាមុនដើម្បីកាត់បន្ថយហានិភ័យពីការក្លែងបន្លំ និងប្រតិបត្តិការដែលគ្មានការអនុញ្ញាត។ បច្ចុប្បន្នការទិញទំនិញតាមប្រព័ន្ធអេឡិចត្រូនិកគឺមានសុវត្ថិភាពខ្ពស់ និងមានភាពងាយស្រួលយ៉ាងខ្លាំង៕