ភ្នំពេញៈ បណ្ដាញដឹកនាំដោយកុមារ និងយុវជនចំនួន ៣ ជាមួយអង្គការធ្វើការងារផ្នែកកុមារម្សិលមិញរួមគ្នាធ្វើយុទ្ធនាការ «តោះចូលរៀនវិញ» ដើម្បីរកការគាំទ្រពីអ្នកពាក់ព័ន្ធក្នុងការធានាចំពោះការត្រឡប់ចូលរៀនវិញរបស់កុមារគ្រប់រូប និងទប់ស្កាត់ការបោះបង់ការសិក្សារបស់កុមារ បន្ទាប់ពីពួកគេរកឃើញ ៩៧% នៃកុមារ ២៣៩ នាក់ តាមរាជធានី ខេត្ដចំនួន ១៥ បានរងឥទ្ធិពលធ្ងន់ធ្ងរដល់ការរស់នៅព្រោះវិបត្ដិជំងឺកូវីដ ១៩។
សេចក្ដីប្រកាសព័ត៌មានរួមស្ដីពីការធ្វើយុទ្ធនាការរបស់បណ្ដាញដឹកនាំដោយកុមារ និងយុវជនទាំង ៣ រួមទាំងបណ្ដាញកុមារអ្នកតស៊ូមតិ (Child Advocate- Network) ក្រុមតំណាងយុវវ័យ និងយុវជន (AYRG) និងសមាគមចលនាកុមារ និងយុវជនកម្ពុជាដើម្បី សិទ្ធិកុមារ (CCYMCR) បង្ហាញថា ការធ្វើយុទ្ធនាការនេះដើម្បីស្វែងរកការគាំទ្រពីអ្នកបង្កើតគោលនយោបាយ។
ក្នុងនោះមានដៃគូអភិវឌ្ឍន៍នានា សាធារណជន និងអ្នកពាក់ព័ន្ធសំខាន់ៗក្នុងការធានាការត្រឡប់ចូលរៀនវិញរបស់កុមារគ្រប់ៗរូប។ គោលបំណង គឺដើម្បីទប់ស្កាត់ការបោះបង់ការសិក្សា និងការជួញដូរកម្លាំងពលកម្មលើកុមារ បន្ទាប់ពីសាលារៀនទូទាំងប្រទេសកម្ពុជាត្រូវបានបិទក្នុងរយៈពេលយូរដោយសារជំងឺកូវីដ ១៩។
សេចក្ដីប្រកាសបង្ហាញថា៖ «តាមការស្រាវជ្រាវដែលធ្វើឡើងដោយបណ្តាញ ដែលដឹកនាំដោយកុមារ និងយុវជនស្តីពីផលប៉ះពាល់នៃវិបត្តិកូវីដ១៩ ចំពោះកុមារ និងមនុស្សវ័យក្មេងនៅកម្ពុជា ៩៧% នៃកុមារ ២៣៩ នាក់ ដែលបានធ្វើការស្ទង់មតិបង្ហាញថា ជំងឺកូវីដ ១៩ បានជះឥទ្ធិពលយ៉ាងធ្ងន់ធ្ងរដល់ការរស់នៅប្រចាំថ្ងៃរបស់ពួកគេដោយ ៤៨ ភាគរយ នៃពួកគេបង្ហាញថាជីវិតរបស់ពួកគេត្រូវបានផ្លាស់ប្តូរយ៉ាងខ្លាំងដោយជំងឺកូវីដ ១៩»។
កញ្ញា ហួ បុប្ផា ប្រធានក្រុមគាំទ្រ កុមារ និងយុវជនប្រាប់ភ្នំពេញប៉ុស្ដិ៍ពីម្សិលមិញថា តាមការស្ទង់មតិដែលរកឃើញបង្ហាញថា កុមារ និងមនុស្សពេញវ័យដែលបានបោះបង់ចោលការសិក្សា ព្រោះពួកគាត់បានទទួលរងផលប៉ះពាល់យ៉ាងខ្លាំង ក្រោយពេលពួកគាត់រៀនតាមអនឡាញក្នុងអំឡុងពេលជំងឺកូវីដ ១៩ នេះ។
កញ្ញាបន្ដថា៖ «ដូច្នេះពួកយើងចង់ឲ្យពួកគាត់ត្រឡប់ទៅចូលរៀនវិញ ដោយអនុវត្ដការថែរក្សាអនាម័យ និងគោលការណ៍ណែនាំរបស់ក្រសួងពាក់ព័ន្ធ។ ព្រោះយើងមិនចង់ឃើញអត្រានៃការបោះបង់ចោលការសិក្សារបស់កុមារ និងមនុស្សពេញវ័យក្នុងអំឡុងពេលវិបត្ដិជំងឺកូវីដ ១៩ នេះទេ»។
បុប្ផា បន្ថែមថាការសិក្សាពីផ្ទះតាមរយៈអនឡាញមានផលវិបាក និងផលប៉ះពាល់ជាច្រើនក្នុងនោះមានផលវិបាកនៃសេវាអ៊ីនធឺណិត អាណាព្យាបាលក្នុងគ្រួសារបង្គាប់ឲ្យកុមារ និងមនុស្សពេញវ័យធ្វើការងារ ដែលប៉ះពាល់ដល់ពលកម្មកុមារនាំឲ្យកុមារមិនអាចសិក្សាបានជាប់លាប់ឡើយ។
លោក ធន់ ពិទិ អនុប្រធានក្រុមគាំទ្រកុមារ និងយុវជននិយាយថា ក្រោយបញ្ចប់យុទ្ធនាការ បណ្ដាញ ដឹកនាំដោយកុមារ និងយុវជន និងបន្តជួបជាមួយក្រសួង និងមន្ទីរពាក់ព័ន្ធ ដើម្បីពិភាក្សាគ្នាលើបញ្ហាដែលកំពុងកើតមានឡើងចំពោះកុមារ និងមនុស្សពេញវ័យនេះ។
លោកថ្លែងថា៖ «យុទ្ធនាការនេះគឺយើងបានធ្វើការផ្សព្វផ្សាយទៅកាន់សាធារណជន ដើម្បីចូលរួមទប់ស្កាត់ការបោះបង់ការសិក្សារបស់កុមារ និងមនុស្សពេញវ័យក្នុងវិបត្ដិជំងឺកូវីដ ១៩ នេះ»។
លោកថា តាមរយៈការមើលឃើញបញ្ហាប្រឈមរបស់កុមារ និងមនុស្សពេញវ័យ ដែលបានបោះបង់ការសិក្សាអំឡុងពេលវិបត្ដិ ជំងឺកូវីដ ១៩ ទើបបណ្ដាញដឹកនាំដោយកុមារ និងយុវជនចង់នាំសំឡេង និងផលលំបាករបស់ពួកគេទៅកាន់អ្នកពាក់ព័ន្ធឲ្យបានដឹង និង រួមគ្នាស្វែងរកដំណោះស្រាយ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងពីម្សិលមិញថា៖ «ក្រសួងអប់រំ ស្វាគមន៍មតិយោបល់ និងកិច្ចសហការវិជ្ជមានពីគ្រប់ភាគីពាក់ព័ន្ធក្នុងការចូលរួមចំណែកការងារកំណែទម្រង់អប់រំ យុវជន និងកីឡា តាមគ្រប់រូបភាព»៕