.jpg)
ក្រុម «យុវជនសំរាម» ដើររើសកន្ទុយបារីតាមឆ្នេរសមុទ្រ។ សហការី
ព្រះសីហនុៈ ក្រុម «យុវជនសំរាម» បានប្រមូលកន្ទុយបារីប្រមាណជិត ១ ម៉ឺនកន្ទុយបារី ក្នុងរយៈពេល ២ សប្តាហ៍ នៅតាមឆ្នេរអូឈើទាល បន្ទាប់ពីពួកគេបានបើកយុទ្ធនាការប្រមូលកន្ទុយបារីឲ្យបាន ១ លានពីតាមឆ្នេរសមុទ្រកម្ពុជា ដើម្បីចូលរួមការពារសោភណភាព និងការពារជីវចម្រុះក្នុងតំបន់ទេសចរណ៍ជាប់មាត់សមុទ្រដ៏ល្បីល្បាញមួយនេះ។
បើតាមការប្រកាសនៅតាមបណ្តាញទំនាក់ទំនងសង្គមរបស់ «យុវជនសំរាម» កាលពីចុងសប្តាហ៍មុន សកម្មភាពប្រមូលកន្ទុយបារីនៅឆ្នេរអូរឈើទាល គឺធ្វើឡើងរាល់ចុងសប្តាហ៍ ដោយមានការចូលរួមពីយុវជនស្ម័គ្រចិត្ត មកពីភ្នំពេញ និងយុវជនរស់នៅខេត្តព្រះសីហនុផ្ទាល់។
ក្នុងរយៈពេល ២ សប្តាហ៍មកនេះ ក្រុមយុវជនសំរាម បានរួមគ្នាប្រមូលកន្ទុយបារីបានប្រមាណ ៩ ៨៥៦ កន្ទុយបារី ដោយប្រើដៃដើម្បីរើសម្តងមួយៗដាក់ចូលទៅក្នុងដបរបស់ពួកគេ ដែលយុទ្ធនាការនេះមានឈ្មោះថា «បេសកកម្ម ១ លានកន្ទុយបារី នៅលើឆ្នេរសមុទ្រកម្ពុជា»។
នេះបើតាមយុវជន ផល សុភ័ក្ត្រ សមាជិកម្នាក់នៃក្រុម «យុវជនសំរាម» ថ្លែងពីម្សិលមិញ។ យុវជនវ័យ ២៩ ឆ្នាំរូបនេះ លើកឡើងថា ដោយសារតែមើលឃើញពីការបោះចោលកន្ទុយបារីពាសវាលពាសកាល ពីសំណាក់ទេសចរបរទេសនិងពលរដ្ឋខ្មែរមួយចំនួន ទើបក្រុមយុវជនសំរាមបានបង្កើតយុទ្ធនាការនេះឡើង។
លោកបន្តថា ជាទូទៅសារធាតុនៅក្នុងកន្ទុយបារី ពិតជាមានផលប៉ះពាល់អាក្រក់ ដល់ជីវចម្រុះខ្លាំងណាស់ដូច្នេះសង្ឃឹមថា ទង្វើនេះគឺជាសារមួយឲ្យមានការបញ្ឈប់ការបោះចោលកន្ទុយបារីពាសវាលពាសកាល ជាពិសេសតាមឆ្នេរសមុទ្រ។
លោក ផល សុភ័ក្ត្រ បញ្ជាក់ថា៖ «និយាយរួមទៅគោលដៅរបស់យើងគឺមិនមែនចង់រើស (កន្ទុយបារី) ឲ្យគ្រប់ ១ លានហ្នឹងទេ គឺចង់បញ្ឈប់ឲ្យពួកគាត់ ដែលជាជនជាតិចិន ខ្មែរ អីហ្នឹង ឈប់បោះកន្ទុយបារីចោលនៅកន្លែងឆ្នេរសមុទ្រដោយឲ្យពួកគាត់រកអីដាក់ឲ្យបានត្រឹមត្រូវទៅ ដូចជាប៊ីដុងទឹក។ ពួកខ្ញុំរើសហ្នឹង មិនមែនរើសឲ្យតែបាន ១ លានហ្នឹងទេ គឺគោលបំណងធំរបស់ពួកខ្ញុំ គឺអត់ចង់ឲ្យមានការបោះចោលកន្ទុយបារីលើឆ្នេរអ៊ីចឹង»។
កាលពីពាក់កណ្តាលខែកក្កដា លោក សាន ដារ៉ាវិត ស្ថាបនិកនៃក្រុម «យុវជនសំរាម» បានបង្ហោះលើទំព័រហ្វេសប៊ុករបស់លោកថា កន្ទុយបារីមានសារជាតិញៀននិងសារជាតិគីមីជាច្រើនប្រភេទផ្សេងទៀត ដែលអាចធ្វើឱ្យប៉ះពាល់ដល់សត្វសមុទ្រ និងមនុស្សដែលចុះលេងទឹកនៅទីនោះផងដែរ។ «គ្រប់ពេលដែលមានរលកបោកបក់មកកាន់ឆ្នេរក៏បាននាំយកសារជាតិនីកូទីននិងកន្ទុយបារីស្នោទាំងនោះទៅក្នុងសមុទ្រវិញដូច្នេះកន្ទុយបារីឬសារជាតិគីមីទាំងនោះ អាចនឹងក្លាយជាចំណីត្រីសមុទ្រ»។
បើតាមរបាយការណ៍អង្គការ NGO Ocean Conservancy កន្ទុយបារី គឺជាសារធាតុគីមីដែលបង្កគ្រោះថ្នាក់ដល់ជីវិតសត្វសមុទ្រ និងជាប្រភពធំបំផុត នៃសំរាមក្នុងមហាសមុទ្រ។ ការបំពុលលើមហាសមុទ្រគឺជាបញ្ហាដ៏ធ្ងន់ធ្ងរមួយហើយវាកំពុង តែចោទជាបញ្ហា និងក្លាយជាព័ត៌មានដ៏ក្ដៅគគុកផងដែរ។
ជាមួយនឹងសកម្មភាពរបស់ «យុវជនសំរាម» អង្គការ UNDP Cambodia បានបង្ហោះលើទំព័រហ្វេសប៊ុកថា កន្ទុយបារីមួយដើម អាចប្រើរយៈពេលរហូតដល់ ១០ ឆ្នាំ ដើម្បីរលាយ។ ជាមួយនឹងការបង្ហោះសារបែបនេះអង្គការនេះ ក៏បានកោតសរសើរ ចំពោះសកម្មភាព «យុវជនសំរាម» ដែលបានប្រកាសពីយុទ្ធនាការក្នុងការដើររើសសំរាមឬកន្ទុយបារីនៅតាមឆ្នេរសមុទ្រផងដែរ។
លោក ឃាង ភារម្យ អ្នកនាំពាក្យសាលាខេត្តព្រះសីហនុ ថ្លែងថា សកម្មភាពទាំងនេះ គឺជាការឆ្លុះបញ្ចាំងពីការចូលរួមរបស់យុវជន ដែលមិនអាចខ្វះបាន សម្រាប់អាជ្ញាធរ។ លោកបន្តថា អាជ្ញាធរ តែងតែចូលរួមគាំទ្រ និងលើកទឹកចិត្ត ឲ្យពួកគាត់បន្តសកម្មភាពបែបនេះ បន្ថែមទៀត។
លោកបន្តថា៖ «ចំពោះបញ្ហាបរិស្ថាន ការចូលរួមពីយុវជន ពីវិស័យឯកជន ពីស្ថាប័ននានាគឺយើងគាំទ្រ ព្រោះយើងមានចក្ខុវិស័យដូចគ្នា ដោយធ្វើយ៉ាងម៉េចឲ្យបរិស្ថានយើងស្អាត ជាពិសេសនៅក្នុងតំបន់ឆ្នេរ។ មិនថា ការបំពុលសំរាម មិនថា ក្លិនស្អុយ មិនថាកន្ទុយបារីហ្នឹងទេ គឺជាសកម្មភាពរបស់ពលរដ្ឋហ្នឹង គឺជាសកម្មភាពដែលល្អ ដែលរដ្ឋបាលខេត្តចូលរួមគាំទ្រ»។
នៅថ្ងៃទី ៣ នៃយុទ្ធនាការប្រមូលកន្ទុយបារីក្នុងសប្តាហ៍នេះក្រុម «យុវជនសំរាម» ដែលនឹងបន្តយុទ្ធនាការ ដើររើសកន្ទុយបារីតាមឆ្នេរសមុទ្របន្តទៀត រំពឹងថានឹងមានអ្នកចូលរួមសកម្មភាពនេះកាន់តែច្រើន ដើម្បីប្រមូលកន្ទុយបារីឲ្យអស់ពីមាត់សមុទ្រកម្ពុជាហើយនឹងធ្វើឲ្យតំបន់ទេសចរណ៍តាមមាត់សមុទ្រមួយនេះ មានសោភណភាព មានខ្យល់អាកាសបរិសុទ្ធ ដោយគ្មានសំរាមដើម្បីទាក់ទាញទេសចរឲ្យកាន់តែច្រើនចូលទៅកម្សាន្ត៕
