.jpg)
កុមារីដើរលើស្ពានឈើដែលដាក់សម្រាប់ដើរឆ្លងកាត់ប្រឡាយទឹកស្អុយបឹងត្របែកដែលយុវជនទើបសម្អាតសំរាមហើយ។ ហេង ជីវ័ន
ភ្នំពេញៈ ប្រឡាយលូទឹកស្អុយបឹងត្របែក ដែលកាលពីមុនពេញខាប់ទៅដោយសំរាម ដែលក្នុង ១ ថ្ងៃៗក្រុម «យុវជនសំរាម» ខំប្រឹងប្រមូលស្ទើរតែមិនចង់អស់នោះ ប៉ុន្តែនៅពេលនេះស្ទើរតែលែងមានសំរាមទៀតហើយ ដែលនេះជាជោគជ័យមួយធ្វើឲ្យក្រុមយុវជនសំរាមប្រកាសចងក្រងបង្កើតបណ្តាញប្រមូលសំរាមនៅទូទាំងប្រទេស។
អស់រយៈពេលជាង ៤ ខែ មកហើយដែលយុវជនស្ម័គ្រចិត្ត ១ ក្រុម បានដាក់ឈ្មោះពួកគេថា ជា «យុវជនសំរាម» បាននាំគ្នាប្រមូលសំរាម នៅក្នុងប្រឡាយលូទឹកស្អុយបឹងត្របែក ហើយរហូតមកទល់ពេលនេះ លទ្ធផលដែលទទួលបានគឺដូចការរំពឹងទុក ព្រោះក្នុងប្រឡាយ មិនសូវមានសំរាមដូចមុនទៀតទេ ហើយការទុកដាក់សំរាមរបស់ពលរដ្ឋនៅតាមប្រឡាយក៏មានរបៀបជាងមុនផងដែរ។
ទោះយ៉ាងណាក៏យុវជនសំរាម ដែលមានគ្នាជាង ២០ នាក់ នៅតែមិនទាន់ពេញចិត្តនឹងលទ្ធផលនេះនៅឡើយ ដោយពួកគេអះអាងថា នឹងបង្កើតបណ្តាញឲ្យបានច្រើនឬក្នុងក្របខ័ណ្ឌទូទាំងប្រទេសដើម្បីពង្រីកយុទ្ធនាការសម្អាតបរិស្ថានជាទៀងទាត់ដោយធ្វើយ៉ាងណាឲ្យមានអ្នករើសសំរាមច្រើនជាងអ្នកបោះសំរាមចោល។
លោក សាន ដារ៉ាវិត ស្ថាបនិកនៃក្រុម «យុវជនសំរាម» បានប្រាប់ភ្នំពេញប៉ុស្តិ៍កាលពីថ្ងៃអាទិត្យ ស្របពេលដែលរូបលោក និងសមាជិកក្រុម កំពុងកែច្នៃសំរាមឲ្យទៅជារបស់មានប្រយោជន៍នៅក្នុងរោងជួល ១ កន្លែង ក្បែរប្រឡាយលូទឹកស្អុយបឹងត្របែកថា អ្វីដែលទទួលបានក្នុងពេលនេះគឺទើបតែបាន ១០ ភាគរយប៉ុណ្ណោះ នៃមហិច្ឆតារបស់ពួកលោក ដែលចង់ឲ្យពិភពលោកស្គាល់កម្ពុជាថាជាប្រទេសដែលមានការទុកដាក់សំរាមបានត្រឹមត្រូវ។
ដោយចង់ឲ្យសម្រេចនូវក្តីស្រមៃនេះ យុវជនរូបនេះថ្លែងថា ជំហានបន្ត ពួកលោកនឹងព្យាយាមវិវត្តខ្លួនឲ្យមានសមាជិកច្រើន និងធំជាងនេះ ដោយការចងក្រងបណ្តាញឬបង្កើតជាសហគមន៍មួយដែលនឹងមានអ្នកចូលរួមគ្រប់ទិសទី។
លោក ដារ៉ាវិត បញ្ជាក់ថា៖ «យើងចង់បង្កើតសហគមន៍សម្អាតបរិស្ថាន ដែលយើងព្យាយាមបង្កើតសមាជិកអ្នករើសសំរាម ដោយអ្នកណាៗ ក៏អាចចូលរួមសកម្មភាពទាំងនេះបាន បើទោះបីធ្វើនៅកន្លែងណាក៏ដោយដូចជា១សប្តាហ៍ម្តងអី យើងប្រកាសយុទ្ធនាការសម្អាតបរិស្ថាន។ យើងបើកទូលាយឲ្យគ្រប់គ្នាចូលរួមមិនប្រកាន់អាយុ ឬភេទ ជារៀងរាល់ចុងសប្តាហ៍នៅតាមទីសាធារណៈនានា»។
ដារ៉ាវិត និយាយថា ស្របពេលដែលសំរាមនៅក្នុងប្រឡាយមិនសូវមានច្រើន ក្រុមរបស់លោក ក៏បានបង្កើតគំនិតក្នុងការច្នៃសំរាមឲ្យទៅជារបស់ប្រើប្រាស់បាន ហើយក៏កំពុងតែរួមគ្នា កសាងហាងកាហ្វេបរិស្ថាន ដោយមិនផ្តោតទៅលើប្រាក់ចំណូលនោះទេ តែអាចចូលរួមជួយទ្រទ្រង់ដល់ក្រុមប្រមូលសំរាមបានក្នុងសកម្មភាពនាពេលខាងមុខ។
យុវជនម្នាក់ទៀត ដែលចូលរួមគាំទ្រសកម្មភាពនេះដែរ លោក អៀម ប៊ុនហួរ បាននិយាយថា ពួកលោកនៅតែមានមហិច្ឆតារួមគ្នាដើម្បីធ្វើយ៉ាងណាឲ្យប្រទេសកម្ពុជា គ្មានសំរាម បើទោះជាប្រឡាយដែលពួកលោកកំពុងប្រមូលសំរាមរាល់ថ្ងៃបានផ្លាស់ប្តូររូបរាងថ្មីក៏ដោយ។ យុវជនរូបនេះប្តេជ្ញាថា ដរាបណាកម្ពុជា នៅតែមានសំរាមពួកលោកនៅតែបន្តសកម្មភាពប្រមូលសំរាមជាទៀងទាត់ និងចង់ឲ្យយុវជនទាំងអស់ ធ្វើជាប្រចាំដូចពួកលោកដែរ។
យុវជនវ័យ ១៩ ឆ្នាំ រូបនេះបញ្ជាក់ថា៖ «ខ្ញុំធ្លាប់ចូលក្រុមផ្សេងដែលធ្វើការសម្អាតដូចគ្នាគេធ្វើតែមួយឆាវ ក៏ឈប់ ប៉ុន្តែ នៅទីនេះ យើងប្តេជ្ញាចិត្តថា ធ្វើ (សម្អាត) ទាល់តែស្អាត។ ខ្ញុំសប្បាយចិត្តដែលឃើញប្រឡាយពីមុនសុទ្ធតែសំរាម តែឥឡូវបានស្អាត។ ប៉ុន្តែ ប៉ុណ្ណឹង ខ្ញុំគិតថា មិនទាន់គ្រប់គ្រាន់សម្រាប់ក្តីស្រមៃរបស់ពួកខ្ញុំទេ ខ្ញុំចង់បានច្រើនជាងហ្នឹងទៀតគឺចង់ឲ្យទឹកលូហ្នឹងស្អាតហើយក៏មិនមែនធ្វើតែ ១ កន្លែងហ្នឹងដែរ»។
លោក ប៊ុន សុភ័ក្ត្រ អភិបាលរងខណ្ឌចំការមន បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្នុងនាមអាជ្ញាធរ តែងចូលរួមគាំទ្ររាល់សកម្មភាពណាដែលមានសារប្រយោជន៍ដល់សង្គម ជាពិសេសសកម្មភាពរបស់ក្រុមយុវជនប្រមូលសំរាមទាំងនេះ។ លោកបន្តថា ការចូលរួមជាមួយអាជ្ញាធរនាពេលកន្លងមក បានធ្វើឲ្យសំរាមនៅក្នុងប្រឡាយ ស្ទើរតែគ្មានខណៈលោកក៏គាំទ្រផងដែរ ចំពោះផែនការរបស់យុវជនសំរាម ដែលចង់បង្កើតសហគមន៍ឬបណ្តាញរបស់ខ្លួន។
លោកបញ្ជាក់ថា៖ «ល្អណាស់ ធ្វើអ៊ីចឹងទៅ យើងបង្កើតជាសហគមន៍ចងក្រងគ្នាជាបណ្តាញ ហើយកាន់តែល្អមែនទែន គឺឲ្យអាជ្ញាធរ យើងបានដឹងឮ ដើម្បីបានចូលរួមជាមួយផងដោយធ្វើយ៉ាងណាឲ្យប្រឡាយស្អាត ហើយមិនមែនស្អាតតែកន្លែងហ្នឹងទេគ្រប់ប្រឡាយនៅក្នុងទីក្រុងភ្នំពេញយើង ចូលរួមជួយសម្អាតទាំងអស់គ្នា»។
ចាប់តាំងពីខែមីនាមក ក្រុមយុវជនសំរាម បានដាក់វេនគ្នាប្រចាំការក្នុងការប្រមូលសំរាមពីប្រឡាយលូទឹកស្អុយបឹង ត្របែកជារៀងរាល់ពេលហើយថ្មីៗនេះពួកគេក៏បានប្រកាសពីយុទ្ធនាការថ្មី ដោយក្នុង ១ សប្ដាហ៍ ចុះទៅចងក្រង និងប្រមូលសំរាមនៅខេត្តព្រះសីហនុផងដែរ។ សកម្មភាពទាំងនេះ ត្រូវបានប្រជាពលរដ្ឋនៅតាមប្រឡាយ និងមជ្ឈដ្ឋានទូទៅកោតសរសើរ និងចង់ឲ្យពួកគេបន្តសកម្មភាពបែបនេះបន្តទៀត ដើម្បីជាគំរូដល់ពលរដ្ឋដទៃ។
អ្នកស្រី សោម ច័ន្ទ អាយុ ៦៨ ឆ្នាំ ដែលរស់នៅតាមបណ្តោយប្រឡាយទឹកស្អុយបឹងត្របែកជាង ១០ ឆ្នាំមកហើយនោះ និយាយថា ដំបូងឡើយអ្នកស្រីមិនជឿនោះទេថា ពួកគេធ្វើបាន ព្រោះស្មានតែដូចអ្នកមុនៗ ដែលមកប្រមូលសំរាមតែមួយភ្លែតក៏ឈប់ទៅវិញ ប៉ុន្តែពួកគេទាំងអស់នេះបានធ្វើបានជោគជ័យ ព្រោះតែប្រឡាយគ្មានសំរាមដូចមុនទៀតទេ។
ស្ត្រីចំណាស់ដែលមានមុខរបរជាអ្នកធ្វើនំលក់រូបនេះបន្តថា អ្នកស្រីពេញចិត្ត ពេលឃើញសកម្មភាពរបស់ក្រុមយុវជនប្រមូលសំរាម។ «ប្លែកនិយាយមិនប្លែកម៉េច ក្នុងប្រឡាយគ្មានសំរាមទេហើយពួកយើងអ្នករស់នៅតាមហ្នឹងក៏ប្រុងប្រយ័ត្នជាងមុន រឿងសំរាមរឿងអី គឺទុកដាក់បានត្រឹមត្រូវ។ គេខំសម្អាត ខំអី យើងត្រូវតែមើលគេហើយគេដូចជាបង្រៀនយើងអ៊ីចឹងឲ្យចេះស្អាតចេះអី»។
ដូចគ្នានេះដែរ ប្រជាពលរដ្ឋនៅតាមប្រឡាយជាច្រើននាក់ ដែលភ្នំពេញប៉ុស្តិ៍បានសម្ភាស សុទ្ធតែទទួលស្គាល់ថា សកម្មភាពរបស់ក្រុមយុវជនសំរាម បានធ្វើឲ្យប្រឡាយ ដែលពីមុនពេញខាប់ទៅដោយសំរាមបានផ្លាស់ប្តូររូបរាងថ្មី ថែមទាំងបានធ្វើឲ្យប្រជាពលរដ្ឋភាគច្រើននៅតាមប្រឡាយ បានផ្លាស់ប្តូរឥរិយាបថដោយការចូលរួមដោយផ្ទាល់ក្នុងការទុកដាក់សំរាមដែលប្រើប្រាស់រួចក្នុងផ្ទះ បានល្អជាងមុន និងមិនបោះចោលក្នុងប្រឡាយដូចមុន។
ជាមួយនឹងការទទួលបានជោគជ័យក្នុងផែនការប្រមូលសំរាមនេះ លោក សាន ដារ៉ាវិត បញ្ជាក់ថា៖ «មានហេតុផលច្រើន ដែលប្រឡាយលែងមានសំរាម គឺមានការចុះអប់រំរបស់អាជ្ញាធរជាប្រចាំ នៅតាមបណ្តោយប្រឡាយ និងផ្សារជាដើម ហើយអាជ្ញាធរ ក៏គាត់ជួយកាយ ជួយប្រមូលអីយូរៗទៅ ក៏ទម្លាប់នៃការបោះសំរាមចូលលូវាលែងសូវមាន។ យើងរីករាយក្នុងរយៈពេល ១ ខែចុងក្រោយនេះ អត់មានសំរាម ហូរមកដូចកាលពីមុនទៀត»៕
