ភ្នំពេញៈ «ស្ត្រី និងការអភិវឌ្ឍក្នុងបរិការណ៍កូវីដ១៩» គឺជាប្រធានបទនៃទិវាអន្តរជាតិនារី ៨ មីនា លើកទី១១០ ក្នុងឆ្នាំ ២០២១ នេះដែលជាការបង្ហាញឱ្យឃើញពីតួនាទីយ៉ាងសំខាន់របស់ស្ត្រីនៅក្នុងសង្គមជាតិ ជាពិសេសក្នុងការប្រយុទ្ធប្រឆាំងជំងឺកូវីដ ១៩ នាពេលបច្ចុប្បន្ន។ នេះជាខ្លឹមសារនៅក្នុងលិខិតរបស់លោកនាយករដ្ឋមន្ត្រី ហ៊ុន សែន ក្នុងទិវាអន្តរជាតិនារី។
លោក ហ៊ុន សែន បានលើកឡើងថា សិទ្ធិសេរីភាពរបស់ប្រជាពលរដ្ឋខ្មែរ រួមទាំងស្ត្រីផងដែរ គឺបានកើតមានសាជាថ្មីឡើងវិញ ក្រោយពីថ្ងៃរំដោះ ៧ មករា ឆ្នាំ ១៩៧៩។ ចាប់តាំងពីថ្ងៃរំដោះ ៧ មករា រហូតដល់ពេលបច្ចុប្បន្ន រាជរដ្ឋាភិបាលកម្ពុជាបានយកចិត្តទុកដាក់ជានិច្ចក្នុងការលើកកម្ពស់ស្ត្រីរហូតបង្កើតបានជាពាក្យស្លោកថា «ស្ត្រីជាឆ្អឹងខ្នងសេដ្ឋកិច្ចជាតិ»។
លោកបានមានប្រសាសន៍ក្នុងសារលិខិតបញ្ជាក់ថា៖ «ប្រធានបទ ស្ត្រី និងការអភិវឌ្ឍក្នុងបរិការណ៍កូវីដ ១៩ ពិតជាមានអត្ថន័យ និងសារៈសំខាន់ ឆ្លើយតបទៅនឹងបរិការណ៍សេដ្ឋកិច្ច និងសង្គមក្នុងអំឡុងនៃការរីករាលជំងឺកូវីដ ១៩ ហើយបង្ហាញអំពីការចូលរួមយ៉ាងសកម្មរបស់ស្ត្រីក្នុងកិច្ចអភិវឌ្ឍនៅគ្រប់កម្រិត គ្រប់វិស័យ និងគ្រប់កាលៈទេសៈស្របតាមយុទ្ធសាស្ត្រចតុកោណដំណាក់កាលទី៤ ដែលស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ»។
ឆ្នាំនេះប្រទេសកម្ពុជាពុំបានរៀបចំយុទ្ធនាការទិវាសិទ្ធិនារីអន្តរជាតិ ៨ មីនា ដូចបណ្តាឆ្នាំកន្លងទៅទេ ដោយសារតែបញ្ហាកូវីដ ១៩ ដែលនៅតែបន្តរីករាលដាល ហើយតម្រូវឱ្យមានការចូលរួមសហការទាំងអស់គ្នា ដើម្បីទប់ស្កាត់តាមវិធានការរបស់អង្គការសុខភាពពិភពលោក និងក្រសួងសុខាភិបាល។ ប៉ុន្តែអង្គការសង្គមស៊ីវិលមួយចំនួនបានប្រារព្ធទិវានេះតាមរយៈអនឡាញ និងការជួបជុំគ្នាដោយកំណត់ពីចំនួនអ្នកចូលរួមផងដែរ។
បើតាមលោកនាយករដ្ឋមន្ត្រី ជានិច្ចកាល រាជរដ្ឋាភិបាល បានយកចិត្តទុកដាក់ ក្នុងការបង្កើនសមាមាត្រស្ត្រីក្នុងស្ថាប័នសាធារណៈ ដើម្បីឱ្យស្ត្រីបានចូលរួមកាន់តែច្រើនឡើងក្នុងការដឹកនាំ និងធ្វើសេចក្តីសម្រេចទាំងនៅថ្នាក់ជាតិ និងថ្នាក់ក្រោមជាតិដែលធ្វើឱ្យចំនួនស្ត្រីនៅក្នុងស្ថាប័ននីតិបញ្ញត្តិ មានការកើនឡើងគួរឱ្យកត់សម្គាល់ពី ១ អាណត្តិទៅ ១ អាណត្តិទៀត។
ជាមួយគ្នានេះដែរ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ក៏បានលើកឡើងផងដែរថា «៣ ការពារ ៣ កុំ» នៅក្នុងតួនាទីរបស់ស្ត្រីនៃបរិបទប្រយុទ្ធនឹងជំងឺកូវីដ ១៩ ដែលរំលេចពីវីរភាព និងតួនាទីរបស់ស្ត្រីក្នុងការប្រយុទ្ធនឹងជំងឺកូវីដ ១៩។
លោកស្រីថ្លែងថា នៅក្នុងបរិបទនៃការប្រយុទ្ធនឹងជំងឺកូវីដ ១៩ ស្ត្រីនៅកម្ពុជាបាននិងកំពុងតែចូលរួមចំណែកយ៉ាងសំខាន់ ក្នុងការទទួលខុសត្រូវ ចំពោះមុខនៃការទប់ស្កាត់ការចម្លងជំងឺដ៏កាចសាហាវនេះសម្រាប់ខ្លួនឯងផង គ្រួសារផង និងសហគមន៍ផង។
លោកស្រី ឱ វណ្ណឌីន បានបញ្ជាក់ថា៖ «ការអនុវត្តនូវវិធានការសុខាភិបាលរបស់ស្ត្រីនៅក្នុងបរិបទនៃការប្រយុទ្ធនឹងជំងឺកូវីដ ១៩ បច្ចុប្បន្ននេះគឺរឹតតែតម្រូវឱ្យស្ត្រីគ្រប់រូបមានការខិតខំបន្ថែមទៀតក្នុងការណែនាំគ្រប់គ្រងដល់សមាជិកក្រុមគ្រួសារខ្លួនឱ្យបានល្អប្រសើរ ហើយសំខាន់បំផុតនោះគឺធ្វើការអប់រំណែនាំស្វាមីកូនចៅ និងសមាជិកគ្រួសារធ្វើយ៉ាងណាឱ្យមានការអនុវត្តឱ្យខាងតែបាននូវ ៣ ការពារ និង ៣ កុំ ដែលជាវិធានការដ៏មានប្រសិទ្ធភាពខ្ពស់»។
នៅក្នុងសារលិខិតរបស់លោក ហ៊ុន សែន បានឱ្យដឹងថា នៅក្នុងស្ថាប័ននីតិប្រតិបត្តិ ស្ត្រីជាឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការ និងអនុរដ្ឋលេខាធិការមានការកើនឡើង។
ចំណែកនៅក្នុងវិស័យមុខងារសាធារណៈចំនួនមន្ត្រីរាជការជាស្ត្រីកើនឡើង ៣២ ភាគរយ នៅឆ្នាំ ២០០៧ ដល់ ៤១ ភាគរយ នៅក្នុងឆ្នាំ ២០២០ ហើយសមាមាត្រស្ត្រីជាមន្ត្រីរាជការក្នុងតួនាទីធ្វើសេចក្តីសម្រេចបានកើនឡើងដល់ ២៤ ភាគរយ នៅឆ្នាំ ២០១៩។
ជាមួយគ្នានេះនៅថ្នាក់ក្រោមជាតិមានស្ត្រីជាអភិបាលខេត្តចំនួន ២ រូបស្ត្រីជាអភិបាលក្រុង ស្រុកខណ្ឌ ៦ រូប និងស្ត្រីជាមេឃុំ-ចៅសង្កាត់ កើនឡើងពី ៤២ រូប នៅឆ្នាំ ២០០២ ទៅ ១៣០ រូបនៅក្នុងឆ្នាំ ២០១៧។
គិតចាប់តាំងពីឆ្នាំ ២០០៦ ស្ត្រីក្នុងកងកម្លាំងបេសកកម្មរក្សាសន្តិភាពអង្គការសហប្រជាជាតិមានចំនួន ៣៨៧ នាក់ ក្នុងចំណោមកងកម្លាំងសរុបចំនួន ៧ ០៤០ នាក់៕