ភ្នំពេញៈ មន្ត្រីជាន់ខ្ពស់កម្លាំងប្រដាប់អាវុធទាំងនគរបាល និងយោធា អះអាងថាកម្លាំងអាជ្ញាធរត្រៀមរួចជាស្រេចសម្រាប់អនុវត្តដីការបស់តុលាការដើម្បីចាប់ខ្លួនលោក សម រង្ស៊ី ប្រធានស្តីទីនៃអតីតបក្សប្រឆាំង ខណៈថ្នាក់ដឹកនាំសំខាន់ៗមួយចំនួននៃគណបក្សនេះបានធ្វើដំណើរមកដល់ប្រទេស ថៃ និងខ្លះទៀតកំពុងស្ថិតក្នុងប្រទេសតំបន់អាស៊ី ហើយនៅពេលក្រុមប្រឆាំងនេះ ឆ្លងកាត់ចូលមកកម្ពុជាតាមព្រំដែនកម្ពុជា-ថៃ នឹងចាប់តែម្តង។
លោក សម រង្ស៊ី កាលពីយប់ថ្ងៃទី ១៨ តុលា ថ្លែងតាមរយៈបទសម្ភាសជាមួយវិទ្យុអាស៊ីសេរីថា ផែនការមាតុភូមិនិវត្តន៍របស់លោកនឹងមិនផ្លាស់ប្តូរឡើយ។ លោកនឹងដឹកនាំកម្លាំងអ្នកគាំទ្ររបស់លោកធ្វើដំណើរចូលមកកាន់ប្រទេសកម្ពុជាដោយថ្មើរជើងនៅថ្ងៃទី ៩ វិច្ឆិកា ខាងមុខនេះដែលត្រូវនឹងខួបលើកទី ៦៦ នៃទិវាបុណ្យឯករាជ្យជាតិកម្ពុជា ខណៈអាជ្ញាធរកម្ពុជាវិញបានប្រកាសត្រៀមចាត់វិធានការច្បាប់គ្រប់បែបយ៉ាង។
លោក សម រង្ស៊ី ថ្លែងថា៖ «ថាត្រឹម ១០ ភាគរយចុះ ១០ ភាគរយនៃ ២ លាននាក់គឺ ២ សែននាក់។ បើ ២ សែននាក់ យើងមកប្រមូលផ្តុំគ្នា ហើយចូលមកប្រទេសកម្ពុជា យើងមកចាប់ដៃជាមួយប្រជាពលរដ្ឋក្នុងស្រុកពេលនោះលោក ហ៊ុន សែន វង្វេងហើយ»។
អនុប្រធានអតីតគណបក្សសង្គ្រោះជាតិលោកស្រី មូរ សុខហួរ តាមរយៈហ្វេសប៊ុករបស់លោកស្រីឱ្យដឹងថា លោកស្រីរួមជាមួយនឹងថ្នាក់ដឹកនាំនៃអតីតគណបក្សប្រឆាំងបានធ្វើដំណើរមកដល់ប្រទេសថៃហើយកាលពីព្រឹកថ្ងៃទី ១៩ តុលា។
លោកស្រីសរសេរថា៖ «អ្នកទោសរបបលោក ហ៊ុន សែន ជួបគ្នាហើយត្រៀមខ្លួនវិលចូលប្រទេសកម្ពុជានៅថ្ងៃទី ៩ វិច្ឆិកាខាងមុខនេះ»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថាកម្លាំងអាជ្ញាធរមានសមត្ថកិច្ចបានត្រៀមខ្លួនរួចជាស្រេចចូលរួមអនុវត្តដីកាតុលាការក្នុងការចាប់ខ្លួនលោក សម រង្ស៊ី និងថ្នាក់ដឹកនាំសំខាន់ៗមួយចំនួននៃអតីតគណបក្សប្រឆាំង ប្រសិនបើពួកគេឈានជើងចូលទឹកដីកម្ពុជា។
លោកបញ្ជាក់ថា៖ «ឃើញសកម្មភាពរបស់ពួកគាត់កាន់តែខ្លាំងទៅ ហើយគាត់ប្រុងលេងមែនទែន ហើយបើគាត់ប្រុងលេងមែនទែន យើងក៏លេងមែនទែនដែរ។ កិច្ចការរបស់យើងគឺអនុវត្តទៅតាមអ្វីដែលយើងបានកំណត់ បើទោះបីជារូបភាពណាក៏ដោយយើងត្រូវតែការពារ រដ្ឋធម្មនុញ្ញឲ្យបានការពារសន្តិភាពស្រុកទេសយើង និងរដ្ឋាភិបាលឲ្យបានទោះជាតម្លៃណាក៏ដោយ។ សំខាន់បំផុតគឺចាប់អ្នកដែលមានដីកាទាំងអស់ ដែលប៉ុនប៉ងមកធ្វើការផ្តួលរំលំ និងធ្វើឲ្យប្រទេសមានចលាចល។ ជាផ្លូវច្បាប់ជាកាតព្វកិច្ចរបស់យើងក្នុងការអនុវត្តច្បាប់ ដើម្បីការពារសន្តិភាព»។
លោកសង្ឃឹមថា នគរបាលថៃ និងជួយសហការជាមួយប្រទេសកម្ពុជាក្នុងចាប់ខ្លួនមេខ្លោងមួយចំនួនរបស់អតីតគណបក្សប្រឆាំងដើម្បីទប់ស្កាត់ការបង្កចលាចល ហើយសមត្ថកិច្ចកម្ពុជានឹងចាត់វិធានការជាក់ស្តែងនៅតាមបណ្តោយព្រំដែនកម្ពុជា-ថៃនៅពេលដែលពួកគេធ្វើដំណើរចូលមកកាន់ប្រទេស កម្ពុជា។
លោកបន្ថែមថា៖ «ក្នុងករណីដែលពិនិត្យឃើញថា ផែនការអនុវត្តដើម្បីមកបង្កអុកឡុកការផ្តួលរំលំដើម្បីឲ្យវឹកវរប្រទេសជាតិ យើងមានសិទ្ធិ (បើក ឬបិទព្រំដែន)។ យើងមិនទាន់សម្រេចនៅឡើយទេ យើងត្រូវពិនិត្យមើសសភាពការណ៍ជាក់ស្តែង»។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិប្រាប់ភ្នំពេញប៉ុស្តិ៍ពីម្សិលមិញថា កម្លាំងអាជ្ញាធរត្រៀមរួចជាស្រេចសម្រាប់អនុវត្តដីការបស់តុលាការដើម្បីចាប់ខ្លួនលោក សម រង្ស៊ី និងអ្នកពាក់ព័ន្ធយកទៅដាក់ក្នុងពន្ធនាគារ ប៉ុន្តែលោកបដិសេធផ្តល់ផែនការលម្អិតទាក់ទងនឹងការចាប់ខ្លួននេះ។
លោកបញ្ជាក់ថា៖ «យើងត្រៀមទទួលពួកហ្នឹងចូលពន្ធនាគារ។ យើងបានត្រៀមផែនការរួចហើយក្នុងការអនុវត្តច្បាប់ ហើយផែនការរៀបម៉េចខ្ញុំមិនអាចជម្រាបជូនបានទេ។ វាជាការសម្ងាត់របស់ប៉ូលិស»។
លោក សុខ ឥសាន សមាជិកព្រឹទ្ធសភា និងជាអ្នកនាំពាក្យគណបក្សប្រជាជនកម្ពុជាលើកឡើងថា ក្រុមលោក សម រង្ស៊ី មិនហ៊ានចូលស្រុកនោះទេ ហើយបើពួកគេហ៊ានចូលនោះពួកគេនឹងស្លាប់ដោយសារតែជាន់គ្នា និងជាន់មីន។ លោកបន្ថែមថាអាជ្ញាធរថៃនឹងចាប់បញ្ជូនលោក សម រង្ស៊ី មកកម្ពុជាមុនពេលដែលលោក សម រង្ស៊ី ដើរចូលកម្ពុជាដោយសារតែប្រទេស កម្ពុជា និងថៃមានកិច្ចសហការជាមួយគ្នាយ៉ាងល្អក្នុងការទប់ស្កាត់បទល្មើស។
លោកចំអកដូច្នេះថា៖ «ទណ្ឌិតរត់ចោលស្រុកថាមានប្រជាជន ២ លាននាក់មកពីប្រទេសថៃនឹងមកទទួលខ្លួនដូចស៊ូណាមិ។ បើគគ្រឹកគគ្រេងដូចស៊ូណាមិនឹងជាន់គ្នាងាប់អស់ហើយ។ មានន័យថា ទណ្ឌិតនេះមិនហ៊ានមកចូលស្រុកខ្មែរទេ។ មិនទាន់ឆ្លងដែនផង គ្រាន់តែជិតព្រំដែនហ្នឹង ពួកគេជាន់មីនផ្ទុះងាប់អស់ខ្លះ ហើយបើមេទណ្ឌិតជិះយន្តហោះចុះប្រទេសថៃ គេនឹងចាប់ច្រកបាវ ហើយបិទតែមផ្ញើមកភ្នំពេញ»។
លោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី ៥ ថ្លែងថាកម្លាំងរបស់លោកបានតៀមខ្លួនរួចជាស្រេច ដើម្បីចាប់ខ្លួនក្រុមអ្នកដែលប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាល នៅពេលពួកគេឈានជើងចូលទឹកដីកម្ពុជា។
លោកបានបញ្ជាក់ថា៖ «កិច្ចការងារនេះរបស់កងទ័ពហើយគេបានរៀបចំហើយអស់ហើយ។ កម្លាំងរបស់ខ្ញុំមិនមានបញ្ហាអ្វីទេ ហើយយើងត្រៀមខ្លួនសហការអនុវត្តសាលក្រមតុលាការ ហើយកម្លាំងរបស់យើងគ្មាននរណារវើរវាយតាមឧបាយកលរបស់ពួកវានោះទេ»។
ជាមួយគ្នានេះកាលពីថ្ងៃទី ១៧ ខែតុលាអយ្យការអមសាលាដំបូងខេត្តកំពង់ឆ្នាំងបានសម្រេចចោទប្រកាន់លើឈ្មោះ ដួង ចន្ត្រា និងគូកនពីបទរួមគំនិតក្បត់តាមមាត្រា ៤៥៣ នៃក្រមព្រហ្មទណ្ឌនៃព្រះរាជាណាចក្រកម្ពុជា ពាក់ព័ន្ធនឹងករណីផ្តួលរំលំរាជរដ្ឋាភិបាលស្របច្បាប់របស់កម្ពុជា។
យោងតាមសេចក្តីថ្លែងការណ៍របស់អ្នកនាំពាក្យនៃអយ្យការអមសាលាដំបូងខេត្តកំពង់ឆ្នាំងដែលផ្សព្វផ្សាយកាលពីថ្ងៃទី ១៧ បានបញ្ជាក់ថា៖ «ឈ្មោះ ដួង ចន្ត្រា ហៅ ត្រា ព្រមទាំងគូកនបានបំផុសបំផុលប្រជាពលរដ្ឋដោយចេតនាតាមរយៈបណ្តាញសង្គម Facebook ឈ្មោះ Duong Chantra ដើម្បីចូលរួមសកម្មភាពផ្តួលរំលំរាជរដ្ឋាភិបាលនៃព្រះរាជាណាចក្រកម្ពុជានៅថ្ងៃទី ៩ ខែវិច្ឆិកា ឆ្នាំ ២០១៩ ខាងមុខ»។
ចៅក្រមនៃសាលាដំបូងរាជធានីភ្នំពេញបានប្រកាសសាលក្រមនៅរសៀលថ្ងៃទី ១៨ ខែ តុលា ឆ្នាំ ២០១៩ ដោយសម្រេចឲ្យលោក សម រង្ស៊ី លោក ហូរ វ៉ាន់ និង លោក កាក់ កុម្ភារ ជាប់ពន្ធនាគាររយៈពេល ២០ ខែក្រោមបទផ្តើមគំនិតឲ្យមានការជេរប្រមាថជាសាធារណ: និងបទញុះញង់ឲ្យប្រព្រឹត្តបទឧក្រិដ្ឋ និងបទមជ្ឈិមជាអាទិ៍ ខណៈសកម្មជនអតីតគណបក្សប្រឆាំង ២ នាក់ទៀត គឺលោក គង់ ម៉ាស់ និងលោក វឿន គឹមលន់ ត្រូវជាប់ពន្ធនាគារ ១៨ ខែក្រោមបទជេរប្រមាថជាសាធារណ: និងបទញុះញង់ឲ្យប្រព្រឹត្តបទឧក្រិដ្ឋនិងបទមជ្ឈិមជាអាទិ៍៕