ភ្នំពេញៈ មន្ត្រីជាន់ខ្ពស់នៃក្រសួងការពារជាតិបានឲ្យដឹងថា អគ្គមេបញ្ជាការនៃកងយោធពលខេមរភូមិន្ទបានចេញបទបញ្ជាដល់កងទ័ពទាំងអស់ មិនអនុញ្ញាតឲ្យយកអាវុធ និង ស្លៀកពាក់ឯកសណ្ឋានយោធា និងមធ្យោបាយប្រើប្រាស់របស់កងយោធពលខេមរភូមិន្ទចូលទៅកាន់កន្លែងសាធារណៈដែលមានការប្រមូលផ្ដុំមហាជនច្រើន និងបម្រើដល់វិស័យឯកជន បើគ្មានភារកិច្ចជាប់ខ្លួននោះ។
លោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទកាលពីថ្ងៃទី ៣ ខែ កញ្ញា ឆ្នាំ ២០១៩ បានចេញបទបញ្ជាមិនអនុញ្ញាតឲ្យយកកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជនឡើយ។
យោងតាមបទបញ្ជានេះលោក វង្ស ពិសេន បានបញ្ជាក់ថា មេបញ្ជាការប្រភេទទ័ព និងទ័ពជំនាញ នាយកស្ថាប័ន និងសាលា ចំណុះអគ្គបញ្ជាការដ្ឋាននៃកងយោធពលខេមរភូមិន្ទ ត្រូវគ្រប់គ្រងទ័ពរបស់ខ្លួនជាប់ជាប្រចាំភ្ជាប់នូវវត្តមាន អវត្តមាន និងមិនអនុញ្ញាតឱ្យយកកម្លាំង មធ្យោបាយរបស់កងទ័ពទៅបម្រើការងារ ឬយាមការពារក្រុមហ៊ុន រោងចក្រ សហគ្រាសឯកជន និងបម្រើការងារបុគ្គលឯកជនឡើយ។
ហាមស្លៀកពាក់ឯកសណ្ឋាន និងយកអាវុធចូលភោជនីយដ្ឋាន អគារលក់ទំនិញ ដែលប្រមូលផ្ដុំមហាជន ប្រជាជនច្រើន និងក្លិបកម្សាន្ត ដែលនាំឱ្យបាត់សណ្តាប់ធ្នាប់ និងវិន័យកងយោធពលខេមរភូមិន្ទ លើកលែងពេលប្រតិបត្តិការ។
លោក ឈុំ សុជាត អ្នកនាំពាក្យក្រសួងការពារជាតិបានថ្លែងប្រាប់កាសែតភ្នំពេញប៉ុស្តិ៍កាលពីម្សិលមិញថា បទបញ្ជានោះគឺជាការបង្ការទុកជាមុន ដើម្បីទប់ស្កាត់មន្ត្រីកងយោធពលខេមរភូមិន្ទណាដែលហ៊ានយកកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជនហើយក្រសួងនឹងចាត់វិធានការតឹងរ៉ឹងតាមបទបញ្ជាផ្ទៃក្នុងរបស់កងយោធពលខេមរភូមិន្ទចំពោះមន្ត្រីណាដែលហ៊ានរំលោភបទបញ្ជានេះ។
លោក ឈុំ សុជាត បានបញ្ជាក់ថា៖ «ដើម្បីពង្រឹងវិន័យក្នុងទ័ពក្នុងកងយោធពលខេមរភូមិន្ទហើយ យើងចេញបទបញ្ជាហ្នឹងដើម្បីឲ្យកម្លាំងទាំងអស់គ្រប់គ្រងកងកម្លាំងដែលមានវត្តមានក្នុងអង្គភាពឲ្យបានម៉ឺងម៉ាត់ មិនឲ្យយកកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជន»។
លោកបានបន្ថែមថា៖ «ការហាមមន្ត្រីដែលស្លៀកពាក់ឯកសណ្ឋាន និងយកអាវុធចូលភោជនីយដ្ឋាន អគារលក់ ទំនិញដែលប្រមូលផ្ដុំមហាជនប្រជាជនច្រើន និងក្លិបកម្សាន្ត ដោយសារតែវាមិនសមរម្យដែលអាចធ្វើឲ្យប្រជាពលរដ្ឋ មានការភ័យខ្លាច និងប៉ះពាល់ដល់ពួកគាត់ ដូច្នេះការហាមប្រាមនេះ គឺជាការត្រឹមត្រូវដើម្បីកុំឲ្យប្រជាពលរដ្ឋមានការភ័យខ្លាចចំពោះកងកម្លាំងប្រដាប់អាវុធ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាបានអះអាងថា កន្លងមកមានករណីដែលបុគ្គល ឬមន្ត្រីខ្លះបានប្រើកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជនដែលធ្វើឲ្យអគ្គមេបញ្ជាការនៃកងយោធពលខេមរភូមិន្ទចេញបទបញ្ជាហាមប្រាមមិនឲ្យមន្ត្រីប្រើកងកម្លាំង ឬយកមធ្យោបាយរបស់អង្គភាពទៅបម្រើវិស័យឯកជន ឬការងារផ្ទាល់ខ្លួន។
ការហាមប្រាមហ្នឹងដោយសារតែកន្លងមកវាមានករណីបុគ្គលមួយចំនួនដែលចូលចិត្ត សម្ញែងកាំភ្លើង ឋានន្តរស័ក្តិរបស់ខ្លួន។ មន្ត្រី ឬបុគ្គលខ្លះដែលមានកាំភ្លើង ពេលខ្លះយកកាំភ្លើងតាមខ្លួនដើម្បីបន្លាចគេឯង។ វាជាការល្អដែលដាក់ចេញបទបញ្ជាបែបនេះ តែត្រូវដាក់ទោសទណ្ឌតឹងរ៉ឹងចំពោះជនណាដែលបានបាញ់បោះសេរី ដោយសារកន្លងមកពុំឃើញមានការដាក់ទោសទណ្ឌធ្ងន់ធ្ងរដល់អ្នកទាំងនោះទេ។
លោកបានបន្ថែមថាកត្តាដែលធ្វើឲ្យមានមន្ត្រី ឬបុគ្គលមួយចំនួនប្រើប្រាស់កងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជនដោយសារតែការអនុវត្តច្បាប់របស់មន្ត្រីមួយចំនួននៅមានកម្រិត។ មធ្យោបាយធ្វើដំណើរខ្លះរបស់ឯកជន ប៉ុន្តែដោយសារតែការគ្រប់គ្រងស្លាកលេខរបស់កងកម្លាំងនៅមានភាពធូររលុងដែលអាចធ្វើឲ្យបុគ្គលនោះអាចសុំស្លាកលេខ ខ.ម ឬ នប ឬស្លាកលេខរដ្ឋដែលឃើញមានច្រើន។ គេធ្វើបែបនេះការពារមធ្យោបាយរបស់ពួកគេ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ថ្លែងថា ប្រសិនបើអគ្គបញ្ជាការកងទ័ពមានវិធានការតឹងរ៉ឹងប្រកបដោយប្រសិទ្ធនោះវានឹងជួយទប់ស្កាត់ការយកកងកម្លាំង និងមធ្យោបាយប្រើប្រាស់របស់កងយោធពលខេមរភូមិន្ទទៅបម្រើឲ្យវិស័យឯកជនបានហើយ៕