.jpg)
មន្ត្រីសុខាភិបាលពិនិត្យកម្ដៅលើកងកម្លាំងមួកខៀវរករោគសញ្ញាកូវីដ ១៩។ រូបថត សហការី
ភ្នំពេញ៖ លោកស្រី កុសល ម៉ាលីដា អ្នកនាំពាក្យមជ្ឈមណ្ឌលជាតិរក្សាសន្តិភាពបានឲ្យដឹងថា កងទ័ពមួកខៀវកម្ពុជាចំនួន ៣ រូប ដែលបានឆ្លងវីរុសកូវីដ ១៩ នៅក្នុងតំបន់បេសកកម្ម នៃប្រទេស ម៉ាលី ពួកគេស្ថិតក្នុងស្ថានភាពល្អប្រសើរ ខណៈដែលកងទ័ពមួកខៀវកម្ពុជាដទៃទៀត កំពុងបន្តតាមដានសុខភាព ហើយមិនទាន់មានករណីឆ្លងថ្មីនៅឡើយទេ។
លោកស្រី កុសល ម៉ាលីដា បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្នុងចំណោមកងកម្លាំងមួកខៀវរបស់អង្គការសហប្រជាជាតិទាំងអស់ ដែលកំពុងបំពេញបេសកកម្មនៅប្រទេស ម៉ាលី ក្នុងនោះមាន ៣០ នាក់ បានឆ្លងជំងឺកូវីដ ១៩ ក្នុងនោះ រួមទាំងកងកម្លាំងមួកខៀវកម្ពុជា ចំនួន ៣ នាក់។ លោកស្រីបន្តថា ពួកគេទាំង ៣ នាក់ មានប្រុស ២ នាក់ និងស្រីម្នាក់ កំពុងត្រូវបានអង្គការសហប្រជាជាតិពិនិត្យតាមដាននៅក្នុងតំបន់បេសកកម្មគីដាល ដោយមានស្ថានភាពល្អប្រសើរជាងមុនបន្ទាប់ពីទទួលបានការព្យាបាលយ៉ាងយកចិត្តទុកដាក់បំផុត។
លោកស្រីបញ្ជាក់ថា៖ «ស្ថានភាពរបស់ពួកគាត់ ៣ នាក់ មានភាពធូរស្បើយជាងមុន គាត់ចាប់ផ្តើមមានកម្លាំងកម្តៅរបស់គាត់ចាប់ថយពី ៣៨ អង្សាសេ មកនៅ ៣៧ អង្សាសេ ហើយម្នាក់នោះឃើញ ធូរស្រាលជាងគេ ដោយឡែកម្នាក់ទៀត ឃើញមានអាការក្អក។ ប៉ុន្តែបើធៀបទៅនឹងស្ថានភាពពីមុន ការយកសំណាកមកត្រួតពិនិត្យហ្នឹង គឺពួកគាត់ធូរច្រើនជាងមុន»។
គណនីហ្វេសប៊ុកកងអនុសេនាធំកម្ទេចគ្រាប់មិនទាន់ផ្ទុះលេខ ២៣១ បំពេញបេសកកម្មនៅសាធារណរដ្ឋម៉ាលីបានឆ្លើយតបជាមួយភ្នំពេញប៉ុស្តិ៍តាមរយៈហ្វេសប៊ុកឆាតកាលពីថ្ងៃម្សិលមិញថា ពួកគេនៅទីនោះ គឺកំពុងស្ថិតក្នុងស្ថានភាពប្រក្រតី ប៉ុន្តែបានបង្វែរសំនួរទៅថ្នាក់លើវិញ។
គណនីដដែលនោះ បានបញ្ជាក់ថា៖ «អរគុណប្រជាជនកម្ពុជាដែលតែងតែយកចិត្តទុកដាក់មកលើកងកម្លាំងរក្សាសន្តិភាពដែលបំពេញបេសកកម្ម អ.ស.ប»។
លោកស្រី កុសល ម៉ាលីដា បានអះអាងថា កងកម្លាំងរក្សាសន្តិសុខកម្ពុជាដែលកំពុងបំពេញបេសកកម្មនៅក្នុងប្រទេស ម៉ាលី ត្រូវបានបែងចែកមានដូចជាតំបន់បាម៉ាកូមានម្នាក់ តំបន់គីដាល់ ៨២ នាក់ តំបន់ទេសាលីត ៧២ នាក់, តំបន់ហ្កាវ ១០៥ នាក់, តំបន់ទុំបុកទូ ២១ នាក់ និងតំបន់ម៉ប់ទី ១៨ នាក់។
លោកស្រី កុសល ម៉ាលីដា បានឲ្យដឹងទៀតថា កងទ័ពមួកខៀវកម្ពុជាដែលកំពុងបំពេញបេសកកម្មនៅក្រៅប្រទេស ត្រូវបានណែនាំឲ្យបន្តបង្ការ និងការពារពីការឆ្លងនៃជំងឺកូវីដ ១៩ ខណៈដែលកងទ័ពមួកខៀវរបស់កម្ពុជា ក៏ត្រូវបានណែនាំឲ្យផ្អាកការផ្លាស់ប្តូរវេនគ្នាជាបណ្តោះអាសន្ន រហូតដល់ចុងខែមិថុនា ទើបមានការសម្រេចជាថ្មីផងដែរ។
លោកស្រីបញ្ជាក់ថា៖ «យើងធ្វើ (ពិនិត្យ) ក្នុងករណីដែលគាត់បានប្រាស្រ័យទាក់ទងគ្នាផ្ទាល់ ដែលកើតកូវីដ ១៩ ហើយនឹងមានរោគសញ្ញាគួរឲ្យកត់សម្គាល់។
លោកស្រីបានឲ្យដឹងថា ក្នុងចំណោមកម្លាំងដែលប្រតិបត្តិការនៅប្រទេស ម៉ាលី ទាំងមូលនោះមិនទាន់ទទួលបានដំណឹងថា មានអ្នកផ្ទុកទៀត ឬយ៉ាងណាទេ។
តាមមជ្ឈមណ្ឌលជាតិរក្សាសន្តិភាព បច្ចុប្បន្ននេះកងទ័ពមួកខៀវកម្ពុជាចំនួន ៧៨៧ នាក់ ក្នុងនោះរួមមានស្ត្រីចំនួន ៧៦ នាក់ បាននិងកំពុងបំពេញបេសកកម្មក្រោមឆត្ររបស់អង្គការសហប្រជាជាតិនៅតាមតំបន់បេសកកម្មនានារួមមាន សាធារណរដ្ឋស៊ូដង់ សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្ដាល ម៉ាលី និងនៅប្រទេស យេម៉ែន៕
