.jpg)
លោក ហ៊ុន សែន និងលោក ផាន វ៉ាន់ហ្សាង អនុរដ្ឋមន្ត្រីវៀតណាម។ រូបថត SPM
ភ្នំពេញៈ កងយោធពលខេមរភូមិន្ទ និងកងទ័ពប្រជាជនវៀតណាមគ្រោងរៀបចំធ្វើសមយុទ្ធរួមគ្នានៅខែធ្នូ ឆ្នាំ ២០១៩ ដើម្បីត្រៀមជួយសង្គ្រោះដល់ពលរដ្ឋនៃប្រទេសទាំង ២ នៅពេលមានគ្រោះមហន្តរាយកើតឡើង។
លោក ថោង សូលីម៉ូ អ្នកនាំពាក្យអគ្គបញ្ជាការកងទ័ពនៃក្រសួងការពារជាតិកម្ពុជាបានឲ្យដឹងកាលពីម្សិលមិញថា កងយោធពលខេមរភូមិន្ទ និងកងទ័ពប្រជាជនវៀតណាមនឹងចូលរួមសមយុទ្ធជាមួយគ្នាដែលត្រូវធ្វើឡើងនៅតាមបណ្តោយព្រំដែននៅក្នុងខេត្តស្វាយរៀង និងឡុងអានដើម្បីពង្រឹងសមត្ថភាពក្នុងការជួយសង្គ្រោះប្រជាពលរដ្ឋពេលមានទឹកជំនន់ និងភ្លើងឆេះព្រៃ ព្រមទាំងពង្រឹងការសហការណ៍រក្សាសន្តិសុខសណ្តាប់ធ្នាប់។
លោកបានបញ្ជាក់ថា៖ «អ្នកដែលចូលរួមសមយុទ្ធគឺជាកម្លាំងនៅតាមបណ្តោយព្រំដែន។ សមយុទ្ធជាមួយគ្នានេះគឺជាលើកទី ១ ដែលយើងធ្វើនៅតាមបណ្តោយព្រំដែននៅក្នុងខេត្តស្វាយរៀង និងខេត្តឡុងអាន» ។
ទោះជាយ៉ាងណាក្ដីលោក សូលីម៉ូ នៅមិនទាន់អាចផ្តល់ព័ត៌មានអំពីចំនួនពិតនៃកងទ័ពប្រទេសទាំង ២ និងកាលបរិច្ឆេទនៃការចាប់ផ្ដើមសមយុទ្ធពិតប្រាកដនោះទេ។
ជាមួយគ្នានេះដែរលោក ហ៊ុន សែន នាយករដ្ឋមន្ដ្រីនៃកម្ពុជាក៏បានសម្ដែងការគាំទ្រចំពោះការធ្វើសមយុទ្ធរួមគ្នារវាងកងទ័ពកម្ពុជាវៀតណាមអំពីការសង្គ្រោះពេលមានគ្រោះមហន្ដរាយ។ នេះបើតាមហ្វេសប៊ុករបស់លោក ដែលបានបង្ហោះក្រោយបញ្ចប់ជំនួបសម្ដែងការគួរសមជាមួយលោក ផាន វ៉ាន់ហ្សាង អនុរដ្ឋមន្ត្រី និងជាប្រធានអគ្គសេនាធិការនៃកងទ័ពប្រជាជនវៀតណាមនៅល្ងាចថ្ងៃទី ៣០ ខែតុលា ឆ្នាំ ២០១៩ នៅក្នុងវិមានសន្ដិភាព។
លោក ហ៊ុន សែន បានចាត់ទុកថាការរៀបចំសមយុទ្ធក្នុងពេលមានគ្រោះមហន្តរាយដែលនឹងប្រព្រឹត្តទៅនៅខែ ១២ ខាងមុខគឺជាការអនុវត្តមួយដែលផ្ដល់នូវផលប្រយោជន៍ ដល់ប្រជាជនទាំង ២ នៅពេលដែលមានគ្រោះមហន្តរាយ ជាពិសេសពេលមានភ្លើងឆេះព្រៃ និងមានទឹកជំនន់ជាដើម ដោយហេតុភ្លើងឆេះព្រៃមិនស្គាល់ព្រំដែនទេ ហើយការអនុវត្តសមយុទ្ធនេះគឺកងទ័ពកម្ពុជាត្រូវចូលទៅកាន់ទឹកដីវៀតណាម ហើយកងទ័ព-វៀតណាមត្រូវចូលមកកាន់ទឹកដីកម្ពុជា ដើម្បីចៀសវាងដល់ការយល់ច្រឡំគ្នា និងធ្វើឲ្យមានការយល់ដឹងដោយទូលំទូលាយផងដែរ។
លោក ហ៊ុន សែន បានឲ្យដឹងថា៖ «សកម្មភាពមនុស្សធម៌ក្នុងសមយុទ្ធនេះ គឺភាគីកម្ពុជាអាចចូលទៅព្យាបាលប្រជាជនវៀតណាម ហើយប្រជាជនវៀតណាមអាចចូលមកព្យាបាលនៅក្នុងប្រទេសកម្ពុជា ដើម្បីត្រៀមនៅពេលដែលមានគ្រោះមហន្តរាយ ហើយក៏អាចជំរុញឱ្យមានកម្មវិធីកីឡា សិល្បៈ ផងដែរ។ សំខាន់ជាងនេះគឺធ្វើយ៉ាងណាបន្តកិច្ចសហប្រតិបត្តិការដែលមានស្រាប់ និងជំរុញបង្កលក្ខណៈណាឲ្យប្រជាជននៃប្រទេសទាំងពីរអាចប្រកបអាជីវកម្មតាមព្រំដែនបានដោយងាយស្រួលផងដែរ»។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានថ្លែងថា ការធ្វើសមយុទ្ធរវាងភាគីកម្ពុជា និងវៀតណាមនឹងជួយពង្រឹងទំនាក់ទំនងរវាងប្រទេសទាំង ២ ក្នុងវិស័យយោធា ហើយប្រទេសវៀតណាម គឺជាមិត្តជិតស្និទ្ធរបស់កម្ពុជាដោយសារតែវៀតណាមតែងតែផ្តល់ជំនួយដល់កម្ពុជា ទាំងការបណ្តុះបណ្តាលធនធានមនុស្ស និងសម្ភារលើវិស័យយោធាដល់ប្រទេសកម្ពុជា។
លោកថ្លែងថា៖ «វាជារឿងធម្មតាទេដែលប្រទេសទាំង ២ ធ្វើសមយុទ្ធជាមួយគ្នាដោយសារតែវាគឺជាផ្នែកមួយក្នុងការពង្រឹងការងារគ្រប់គ្រង និងការដោះស្រាយគ្រោះមហន្តរាយ។ វានឹងជួយឲ្យទំនាក់ទំនងរវាងប្រទេសទាំង ២ កាន់តែជិតស្និទ្ធថែមទៀត»។
លោក ឡៅ ម៉ុងហៃ អ្នកវិភាគសង្គម និងនយោបាយបានថ្លែងថា សមយុទ្ធនេះគឺចង់បង្ហាញថា ទំនាក់ទំនង និងការសហការរវាងកងទ័ពប្រទេសកម្ពុជា និងវៀតណាមនៅតែជាមិត្តជិតស្និទ្ធ និងទំនាក់ទំនងនេះមិនមានការប្រែប្រួលទេ បើទោះបីជាប្រទេសកម្ពុជាមានទំនាក់ទំនងជាមួយចិនយ៉ាងជិតស្និទ្ធដូចជាដែកថែបក៏ដោយ។
លោកថ្លែងថា៖ «នេះជាសកម្មភាពមួយក្នុងការសហការគ្នារវាងកងទ័ពទាំង ២ ជាពិសេសក្រោយដែលមានសមយុទ្ធរួមគ្នារវាងកងទ័ពចិន និងកងទ័ពខ្មែរដើម្បីសម្ដែងថា មិត្តភាពរវាងកម្ពុជា និងវៀតណាមមិនមានការកែប្រែក្រោយមានមិត្តភាពចិន»៕
