.jpg)
លោក ហ៊ុន ម៉ាណែត នៅក្នុងកិច្ចប្រជុំអំពីកិច្ចសហប្រតិបត្តិការ គ្រប់គ្រង ការពារព្រំដែននៅទីក្រុងហាណូយកាលពីថ្ងៃអង្គារ។ រូបហ្វេសប៊ុក Hun Manet
ភ្នំពេញៈ បញ្ជាការដ្ឋានកងទ័ពជើងគោកនៃកម្ពុជា និងបញ្ជាការដ្ឋានកងទ័ពការពារព្រំដែនវៀតណាមបានឯកភាពគ្នាពង្រឹងចំណងមិត្តភាព និងកិច្ចសហប្រតិបត្តិការឱ្យកាន់តែសកម្ម និងរឹងមាំបន្ថែមទៀតលើការងារគ្រប់គ្រង ការពារព្រំដែន ដោយផ្អែកលើយន្តការក្របខ័ណ្ឌច្បាប់ជាតិ-អន្តរជាតិ និងការងារហ្វឹកហ្វឺនបណ្តុះបណ្តាលធនធានមនុស្សសម្រាប់ទិសដៅឆ្នាំ ២០១៩-២០២០ ខាងមុខនេះ។
យោងតាមសេចក្តីប្រកាសព័ត៌មានរបស់បញ្ជាការដ្ឋានកងទ័ពជើងគោកបានឲ្យដឹងថានៅក្នុងដំណើរបំពេញទស្សនកិច្ចការងារនៅរដ្ឋធានីហាណូយ សាធារណរដ្ឋសង្គមនិយមវៀតណាមនាព្រឹកថ្ងៃទី ២៩ ខែ តុលា ឆ្នាំ ២០១៩ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោកបានឯកភាពជាមួយ បញ្ជាការដ្ឋានកងទ័ពការពារព្រំដែន-វៀតណាម ពង្រឹងចំណងមិត្តភាព និងកិច្ចសហប្រតិបត្តិការឱ្យកាន់តែសកម្ម និងរឹងមាំបន្ថែមទៀតលើការងារគ្រប់គ្រង និងការពារព្រំដែន។
សេចក្តីប្រកាសព័ត៌មានបញ្ជាក់ថា៖ «សម្រាប់ទិសដៅឆ្នាំ ២០១៩-២០២០ ខាងមុខ ភាគីទាំង ២ បានឯកភាពគ្នាពង្រឹងចំណងមិត្តភាព និងកិច្ចសហប្រតិបត្តិការឱ្យកាន់តែសកម្ម និងរឹងមាំបន្ថែមទៀតលើការងារគ្រប់គ្រង និងការពារព្រំដែនដោយផ្អែកលើយន្តការ និងក្របខ័ណ្ឌច្បាប់ជាតិ និងអន្តរជាតិ និងការងារហ្វឹកហ្វឺនបណ្តុះបណ្តាលធនធានមនុស្ស»។
សេចក្តីប្រកាសព័ត៌មានបន្តថា ភាគីទាំង ២ បានធ្វើការវាយតម្លៃខ្ពស់ចំពោះលទ្ធផលវិជ្ជមាននៃកិច្ចសហប្រតិបត្តិការកន្លងមករវាងកងទ័ពនៃប្រទេសទាំង ២ ដែលបានចូលរួមចំណែកយ៉ាងសំខាន់ដល់ការថែរក្សាសន្តិភាព ស្ថិរភាព សណ្តាប់ធ្នាប់សាធារណៈ និងសន្តិសុខនៅតាមបណ្តោយព្រំដែន។ កិច្ចសហការនេះជាអំណោយផលដល់ការជំរុញទំនាក់ទំនងសេដ្ឋកិច្ច ពាណិជ្ជកម្មទៅវិញទៅមក និងបង្កលក្ខណៈងាយស្រួលដល់ជីវភាពរស់នៅរបស់ប្រជាជននៃប្រទេសទាំង ២ ធានាបាននូវភាពសុខសាន្ត និងឱកាសក្នុងការអភិវឌ្ឍសេដ្ឋកិច្ចទាំងអស់គ្នា។
លោក ហ៊ុន ម៉ាណែត ក្នុងពេលចូលរួមកិច្ចប្រជុំនៅវៀតណាមកាលពីថ្ងៃទី ២៩ តុលា។ រូបថត ហ្វេសប៊ុក Hun Manet
តាមការប្រកាសដដែលលទ្ធផលទាំងនេះគឺជាផ្លែផ្កានៃកិច្ចសហប្រតិបត្តិការជិតស្និទ្ធរវាងបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ និងបញ្ជាការដ្ឋានកងទ័ពការពារព្រំដែនវៀតណាម ដោយឈរលើស្មារតីមិត្តភាព ការយោគយល់គ្នា និងការទុកចិត្តគ្នាទៅវិញទៅមកដោយមានការគាំទ្ររបស់ក្រសួងការពារជាតិនៃព្រះរាជាណាចក្រកម្ពុជា និងក្រសួងការពារជាតិនៃសាធារណរដ្ឋសង្គមនិយមវៀតណាមក៏ដូចជាការចូលរួមរបស់ប្រជាជននៃប្រទេសទាំង ២។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថាការចុះហត្ថលេខាឯកភាពរវាងភាគីទាំង ២ គឺជាផ្នែកមួយនៃកិច្ចខិតខំប្រឹងប្រែងពង្រឹងកិច្ចសហប្រតិបត្តិការ និងទំនាក់ទំនងវិស័យការពារជាតិរវាងប្រទេសទាំង ២ ឲ្យកាន់តែខ្លាំង។
លោកបញ្ជាក់ថា៖ «ទំនាក់ទំនងរវាងកម្ពុជា និងវៀតណាមគឺជាទំនាក់ទំនងប្រវត្តិសាស្ត្របងប្អូន និងជាអ្នកជិតខាងល្អដោយប្រទេសយើងទាំង ២ បានឆ្លងកាត់របត់នយោបាយសំខាន់ៗជាច្រើនទាំងផ្អែមល្ហែម និងល្វីងជូរចត់ក្នុងប្រវត្តិសាស្ត្រកន្លងទៅ។ កម្ពុជា និងវៀតណាមបានដើរស្របគ្នា និងរួមគ្នាវាយសត្រូវទាំងបារាំង និងអាមេរិក។ យើងបានស្ថិតក្នុងស្ថានភាពដ៏លំបាកលំបិនក្នុងសង្គ្រាមត្រជាក់ ហើយពង្រឹងទំនាក់ទំនងរវាងកងទ័ពរវាងប្រទេសទាំង ២ កាន់តែល្អហើយជិតស្និទ្ធថែមទៀត»។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន ចាត់ទុកការឯកភាពរវាងភាគីកម្ពុជា និងវៀតណាម នឹងជួយពង្រឹងទំនាក់ទំនងរវាងប្រទេសទាំង ២។ វៀតណាមតែងតែផ្តល់ជំនួយដល់កម្ពុជាទាំងការហ្វឹកហ្វឺន បណ្តុះបណ្តាលធនធានមនុស្ស និងសម្ភារលើវិស័យយោធាដែលធ្វើឲ្យប្រទេសទាំង ២ កាន់តែជិតស្និទ្ធនឹងគ្នា។
លោកបន្ថែមថា៖ «វាជារឿងធម្មតាទេដែលប្រទេសទាំង ២ ឯកភាពគ្នាក្នុងការពង្រឹងការងារគ្រប់គ្រង និងការពារព្រំដែនដោយផ្អែកលើយន្តការ និងក្របខ័ណ្ឌច្បាប់ជាតិ និងអន្តរជាតិ និងការងារហ្វឹកហ្វឺនបណ្តុះបណ្តាលធនធានមនុស្សដោយសារតែប្រទេសមានទំនាក់ទំនងយ៉ាងជិតស្និទ្ធ ពិសេសពេលដែលកម្ពុជាកំពុងមានបញ្ហា»៕
