.jpg)
កិច្ចជំនួបពិភាក្សារវាងមន្ត្រីកងទ័ពជើងទឹកកម្ពុជា និងកងទ័ពជើងទឹកថៃកាលពីថ្ងៃទី ១៨ ខែធ្នូ។ រូបថត សហការី
ភ្នំពេញៈ មន្ត្រីជាន់ខ្ពស់កងទ័ពជើងទឹកកម្ពុជា និងមន្ត្រីជាន់ខ្ពស់ កងទ័ពជើងទឹកថៃ បានជួបប្រជុំគ្នាជាថ្មីទៀតដោយបានពិភាក្សាពីការបន្តពង្រឹងកិច្ចសហប្រតិបត្តិការក្នុងការទប់ស្កាត់បទល្មើសផ្សេងៗនៅលើផ្ទៃសមុទ្រ។
លោក ទៀ សុខា មេបញ្ជាការរង កងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ (គ.ជ.ស.ស) ផងនោះបានដឹកនាំគណៈប្រតិភូកងទ័ពកម្ពុជាទៅចូលរួមកិច្ចប្រជុំស្តីពីការផ្លាស់ប្តូរព័ត៌មានលើផ្ទៃសមុទ្រលើកទី ១១ ជាមួយមេបញ្ជាការយោធភូមិភាគទី ១ នៃកងទ័ពជើងទឹកភូមិន្ទថៃនាថ្ងៃទី ១៨ ខែ ធ្នូ ឆ្នាំ ២០១៩។
កិច្ចប្រជុំលើកទី ១១ ដែលធ្វើឡើងនៅបញ្ជាការដ្ឋានយោធភូមិភាគទី ១ នៃកងទ័ពជើងទឹកភូមិន្ទថៃក្នុងខេត្តឈុនបុរីនេះគឺបានពិភាក្សាផ្តោតលើការផ្លាស់ប្តូរព័ត៌មានលើផ្ទៃសមុទ្រការនាំទំនិញចេញ-ចូលខុសច្បាប់ ការជួញដូរគ្រឿងញៀន ការជួញដូរមនុស្ស និងការរុករកជួយសង្គ្រោះជនរងគ្រោះដោយគ្រោះមហន្តរាយ។
លោក ទៀ សុខា បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា កិច្ចប្រជុំនេះគឺបានផ្លាស់ប្តូរព័ត៌មានឲ្យគ្នាទៅវិញទៅមកដែលភាគីទាំង ២ បានឯកភាពរួមគ្នាកន្លងមកចំនួន ៤ ចំណុចក្នុងនោះរួមមាន ការផ្លាស់ប្តូរព័ត៌មាន ការទប់ស្កាត់ និងបង្ក្រាបការនាំចូល នាំចេញទំនិញដែលមិនបានឆ្លងកាត់ការបំពេញបែបបទ ពន្ធគយត្រឹមត្រូវ។ ការទប់ស្កាត់ និងបង្ក្រាបគ្រឿងញៀនការទប់ស្កាត់ និងបង្ក្រាបការជួញដូរមនុស្សក្នុងតំបន់នៃប្រទេសនីមួយៗ និងការរុករក ជួយសង្គ្រោះជនរងគ្រោះក្នុងតំបន់នៃប្រទេសនីមួយៗ។
លោកបន្តថា ផ្អែកតាមខ្លឹមសារដែលបានលើកឡើងប្រសិនបើបញ្ជាការដ្ឋានយោធភូមិភាគទី ១ នៃកងទ័ពជើងទឹកភូមិន្ទថៃក្តាប់បាននូវព័ត៌មានអំពីរាល់បទល្មើស និងការជួញដូរទំនិញនាំចេញនាំចូលខុសច្បាប់នានាទីបញ្ជាការជួរមុខកម្ពុជាសំណូមពរដល់កងទ័ពជើងទឹកភូមិន្ទថៃផ្តល់ព័ត៌មានមកឲ្យកម្ពុជាដើម្បីចាត់វិធានការបង្ក្រាប និងទប់ស្កាត់ឲ្យបានទាន់ពេលវេលា។
លោក ទៀ សុខា បញ្ជាក់ថា៖ «អតីតកាលក៏ដូចជាបច្ចុប្បន្ន បញ្ហាសន្តិសុខលម្ហសមុទ្រនៅតែជាកង្វល់ដ៏ធំសម្រាប់ពិភពលោកទាំងមូល និងក្នុងតំបន់អាស៊ីអាគ្នេយ៍ ហេតុដូច្នេះកិច្ចសហការជាមួយបណ្តាស្ថាប័ន ជាតិអន្តរជាតិ ជាពិសេសជាមួយបញ្ជាការដ្ឋានយោធភូមិភាគទី ១ នៃកងទ័ពជើងទឹកភូមិន្ទថៃ នាពេលនេះគឺ ពិតជាមានសារៈសំខាន់ណាស់ និងជាតម្រូវការចាំបាច់ មិនអាចខ្វះបានសម្រាប់កងយោធពល ខេមរភូមិន្ទ ក៏ដូច គ.ជ.ស.ស.»។
លោកបន្តថា៖ «កិច្ចសហការនេះគឺដើម្បីបង្កើនសន្តិសុខស្ថិរភាព និងសុវត្ថិភាពក្នុងការធានាដល់ការធ្វើចរាចរនាវាលើផ្ទៃសមុទ្ររក្សាផលប្រយោជន៍សេដ្ឋកិច្ច ធនធានធម្មជាតិ បរិស្ថាន ជួយសង្គ្រោះ គ្រោះមហន្តរាយ ទប់ស្កាត់ការឆ្លងដែនខុសច្បាប់ ការនេសាទខុសច្បាប់ការរត់ពន្ធខុសច្បាប់ការជួញដូរគ្រឿងញៀនការជួញដូរអាវុធការជួញដូរមនុស្ស ចោរសមុទ្រ ប្រឆាំងអំពើភេរវកម្ម និងបទល្មើសផ្សេងៗដែលកើតមានឡើងលើផ្ទៃសមុទ្រនៃប្រទេសទាំង ២»។ លោក ទៀ សុខា បញ្ជាក់ទៀតថាក្រៅពីនេះកងទ័ពជើងទឹកប្រទេសទាំង ២ ក៏បានព្រមព្រៀងក្នុងការតាមដានរុករកស្រាវជ្រាវព័ត៌មានផ្តល់ឲ្យគ្នាទៅវិញទៅមកផងដែរ។
លោក ទៀ សុខា ក៏សង្ឃឹមយ៉ាងមុតមាំថា សម្ព័ន្ធភាពទាំង ២ ភាគីនឹងកាន់តែជិតស្និទ្ធនឹងមានការអភិវឌ្ឍសម្ព័ន្ធភាពឱ្យកាន់តែល្អប្រសើរថែមទៀត ខណៈដែលកន្លងមកមានការសហការគ្នាល្អក្នុងការថែរក្សាសន្តិសុខលម្ហសមុទ្រ។
លោក ឃាង ភារម្យ អ្នកនាំពាក្យរដ្ឋបាលសាលាខេត្តព្រះសីហនុបានស្វាគមន៍ ការប្តេជ្ញាចិត្តរបស់កងទ័ពជើងទឹកកម្ពុជា និងកងទ័ពជើងទឹកថៃដែលបានរួមគ្នាទប់ស្កាត់បទល្មើសលើផ្ទៃសមុទ្រ។ លោកបញ្ជាក់ថា៖ «យើងគាំទ្រការខិតខំប្រឹងប្រែងក្នុងការលើកកម្ពស់ទំនាក់ទំនង ហើយយើងស្វាគមន៍កិច្ចសហប្រតិបត្តិការក្នុងវិស័យយោធារវាងប្រទេសទាំង ២ ក្នុងការដែលរក្សាបាននូវសន្តិសុខ និងការទប់ស្កាត់បទល្មើសលើផ្ទៃសមុទ្រ»៕
