ព្រះសីហនុៈ កងទ័ពជើងទឹកសហរដ្ឋអាមេរិក និងកងទ័ពជើងទឹកកម្ពុជាកាលពីម្សិលមិញបានចាប់ផ្តើមធ្វើលំហាត់សមយុទ្ធប្រចាំឆ្នាំលើកទី ៦ ស្តីពីការហ្វឹកហ្វឺន និងការសហប្រតិបត្តិការត្រៀមជាស្រេចលើផ្ទៃទី (CARAT) រយៈពេល ៥ ថ្ងៃលើមូលដ្ឋានជើងទឹករាមក្នុងខេត្តព្រះសីហនុដែនសមុទ្រកម្ពុជាដើម្បីបង្កើនកិច្ចសហប្រតិបត្តិការលើលំហសមុទ្ររវាងកងទ័ពប្រទេសទាំងពីរ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាចេញផ្សាយកាលពីម្សិលមិញបានឲ្យដឹងថានៅក្នុងឆ្នាំទី ៦ ជាប់គ្នានៃលំហាត់សមយុទ្ធយោធាទ្វេភាគី CARAT នេះនៅតែជាមធ្យោបាយមួយសម្រាប់បង្កើនកិច្ចសហប្រតិបត្តិការសន្តិសុខលើលំហសមុទ្ររវាងអាមេរិកជាមួយនឹងកងទ័ពជើងទឹកកម្ពុជា។
តាមសេចក្តីប្រកាសព័ត៌មាននេះឧត្តមនាវីទោ Charlie Williams មេបញ្ជាការនៃក្រុមការងារពិសេសលេខ ៧៣ របស់សហរដ្ឋអាមេរិកបានឲ្យដឹងថា៖ «CARAT ធ្វើឲ្យយើងអាចពង្រឹងទំនាក់ទំនងរឹងមាំជាមួយកងទ័ពជើងទឹកកម្ពុជាដែលជាដៃគូរបស់យើង។ តាមរយៈទំនាក់ទំនង និងវត្តមានជាបន្តបន្ទាប់យើងបន្តធ្វើឲ្យមានភាពជឿនលឿនជាលំដាប់ក្នុងការបង្កើនភាពស្មុគស្មាញនៃការហ្វឹកហ្វឺនរបស់យើងហើយលើកកម្ពស់កិច្ចសហប្រតិបត្តិការរវាងកងទ័ពជើងទឹករបស់ប្រទេសយើងទាំងពីរ»។
សេចក្តីប្រកាសព័ត៌មានបានឲ្យដឹងថាក្រៅពីការហ្វឹកហ្វឺនលើផ្ទៃទឹកនៅលើគោកបុគ្គលិកយោធានឹងធ្វើការហ្វឹកហ្វឺនជាក់ស្តែងក្នុងការកាត់បន្ថយការខូចខាត ការកំណត់ផ្លូវនាវា ការថែទាំអ្នកស្លាប់ និងអ្នករងរបួសក្នុងការប្រយុទ្ធ ទស្សនកិច្ច និងការការពារកម្លាំង ការឡើងលើនាវា ការឆែកឆេរ និងបច្ចេកទេសចាប់នាវាដោយមានការចូលរួមពីកងទាហានជើងទឹកកម្ពុជាប្រហែល ៣០០ នាក់ និងពលទាហានជើងទឹកអាមេរិកប្រហែល ២០០ នាក់។
បន្ថែមពីនេះនាវានៃកងទ័ពជើងទឹកអាមេរិកដែលចូលរួមមាននាវាប្រយុទ្ធក្បែរតំបន់ឆ្នេរដែលមានឈ្មោះថា USS Fort Worth (LCS 3) និងនាវា USNS Safeguard (T-ARS 50) ផងដែរ។
សមយុទ្ធយោធា CARAT បានបង្កើតឡើងរយៈពេល ២០ ឆ្នាំមកហើយក្នុងការធ្វើសមយុទ្ធរួមគ្នារវាងអាមេរិកជាមួយបណ្តាប្រទេសក្នុងតំបន់អាស៊ីប៉ាស៊ីហ្វិក និងអាស៊ីអាគ្នេយ៍ដែលក្នុងនោះកម្ពុជាបានចូលរួមតាំងពីឆ្នាំ ២០១០ មកដោយអនុវត្តធ្វើជារៀងរាល់ឆ្នាំក្នុងគោលបំណងដើម្បីពង្រឹងកិច្ចសហប្រតិបត្តិការតំបន់ កិច្ចសហប្រតិបត្តិការទ្វេភាគី កសាងមិត្តភាព សមត្ថភាព ជំនាញអាជីពពីកម្រិតទ្រង់ទ្រាយតូច និងឈានទៅរកទម្រង់ទ្រង់ទ្រាយកាន់តែទូលំទូលាយថែមទៀត៕
