.jpg)
សកម្មភាពជួយនាំជនរងគ្រោះដោយសារផ្ទុះអូប័រ ទៅមន្ទីរពេទ្យកាលពីថ្ងៃទី៥ មេសា ។ រូបថត សហការី
ព្រះសីហនុៈ កម្លាំងកងទ័ពជើងទឹកនៃមូលដ្ឋានសមុទ្រ កំពុងធ្វើប្រតិបត្ដិការតាមរកមន្រ្តីយោធានៃអង្គភាពសន្តិសុខលម្ហសមុទ្រ ២ នាក់ ដែលបានបាត់ខ្លួនក្នុងកណីផ្ទុះអូប័រ ពេលកំពុងបំពេញសកម្មដឹកស្បៀង ស្ថិតនៅចំណុចខាងត្បូងកោះសំពោច ក្នុងឃុំរាម ស្រុកព្រៃនប់ ខណៈមន្រ្ដី ៤ នាក់ទៀតរងរបួសក្នុងនោះមានម្នាក់របួសធ្ងន់។ នេះបើតាមលោក ទៀ វិញ មេបញ្ជាការកងទ័ពជើងទឹកថ្លែងកាលពីម្សិលមិញ។
លោក ទៀ វិញ ថ្លែងថា៖ «ឥឡូវយើងកំពុងធ្វើប្រតិបត្ដិការតាមរកពួកគាត់ដែលបាត់ខ្លួនទាំង ២ នាក់នៅឡើយ។ យើងរកមិនទាន់ឃើញទេ។ ចំណែកមន្រ្ដីយោធា ៤ នាក់ទៀត ដែលរងបួសក្នុងនោះរបួសស្រាល ៣ នាក់ រហួសធ្ងន់តែម្នាក់ទេ។ អត់អីទេ ពួកគាត់គ្រាន់តែរលាត់ស្បែក»។
លោកបានបញ្ជាក់ថា ហេតុការណ៍នេះបានកើតឡើងនៅអំឡុងប្រហែលម៉ោង ១៣ និង ៣០ នាទីនៅថ្ងៃទី ៥ ខែមេសា ឆ្នាំ ២០២១ នៅចំណុច Lat: 10°28‘00″N Long:103°40‘00″E ខាងត្បូងកោះសំពោច ទិសដៅខាងមុខឆ្នេរព្រែកចាករយៈចម្ងាយ ៣ គីឡូម៉ែត្រពីឆ្នេរព្រែកចាក ៕
