សីហនុៈ កងទ័ពជើងទឹកនៃមូលដ្ឋានសមុទ្រកំពុងធ្វើប្រតិបត្ដិការតាមរកមន្ត្រីយោធានៃអង្គភាពសន្តិសុខលម្ហសមុទ្រ ២ នាក់ ដែលបានបាត់ខ្លួនដោយសារករណីផ្ទុះអូប័រពេលកំពុងដឹកស្បៀងនៅចំណុចខាងត្បូងកោះសំពោច ក្នុងឃុំរាម ស្រុកព្រៃនប់ ខណៈមន្ដ្រី ៤ នាក់ទៀតរងរបួសក្នុងនោះមានម្នាក់របួសធ្ងន់។ នេះបើតាមលោក ទៀ វិញ មេបញ្ជាការកងទ័ពជើងទឹក។
លោក ទៀ វិញ បានប្រាប់កាលពីម្សិលមិញថា៖ «ឥឡូវយើងកំពុងធ្វើប្រតិបត្ដិការតាមរកពួកគាត់ដែលបាត់ខ្លួនទាំង ២ នាក់នៅឡើយ។ យើងរកមិនទាន់ឃើញទេ។ ចំណែកមន្ដ្រីយោធា ៤ នាក់ទៀត ដែលរងរបួសក្នុងនោះរបួសស្រាល ៣ នាក់ រហូសធ្ងន់តែម្នាក់។ ពួកគាត់គ្រាន់តែរងរបួសរលាត់ស្បែក»។
លោកបានឱ្យដឹងថា ហេតុការណ៍នេះបានកើតឡើងនៅអំឡុងប្រហែលម៉ោង ១៣ និង ៣០ នាទីថ្ងៃទី ៥ ខែមេសា ឆ្នាំ ២០២១ នេះនៅចំណុច Lat: 10°28‘00″N Long:103°40‘00″E ខាងត្បូងកោះសំពោច មុខឆ្នេរព្រែកចាក រយៈចម្ងាយ ៣ គីឡូម៉ែត្រពីឆ្នេរព្រែកចាកស្ថិតក្នុងឃុំរាម ស្រុកព្រៃនប់ ខេត្តព្រះសីហនុ។
លោកបានថ្លែងថា ករណីផ្ទុះអូប័រនេះកើតឡើងនៅពេលមន្ដ្រីយោធាទាំង ៦ នាក់ កំពុងបំពេញបេសកកម្មដឹកស្បៀងយកទៅឱ្យកងកម្លាំងដែលកំពុងប្រចាំការនៅកោះសេះ។
ពេលកំពុងធ្វើដំណើរស្រាប់តែមានករណីឆ្លងចរន្តអគ្គិសនីរហូតផ្ទុះអូប័របណ្ដាលឱ្យមន្ត្រីយោធា ២ នាក់ធ្លាក់ចូលសមុទ្របាត់ខ្លួន និង ៤ នាក់ទៀតរងរបួសក្នុងនោះមានម្នាក់រងរបួសធ្ងន់។
លោក ទៀ វិញ បានបញ្ជាក់ថា៖ «ឥឡូវយើងកំពុងបន្តរុករកមន្ដ្រីដែលបាត់ខ្លួនទាំង ២ នាក់ ហើយក៏បានទាក់ទងនៅខាងវៀតណាមដែរឱ្យជួយពិនិត្យមើល ក្រែងអណ្ដែតទៅដល់ទីនោះ។ ឥឡូវនេះនៅលើសមុទ្រមានខ្យល់ខ្លាំងពេក វាមានផលលំបាកសម្រាប់ទូកក្នុងការរុករក»។
បើតាមរបាយការណ៍របស់លោក អ៊ុក សីហា មេបញ្ជាការមូលដ្ឋានសមុទ្ររាមបានឱ្យដឹងថា មន្ដ្រីយោធា ២ នាក់ ដែលបាត់ខ្លួននេះមានឈ្មោះលោក វរនាវីឯក សុខ រស្មី និងម្នាក់ទៀតឈ្មោះ ភ័ក្ត្រ៕