ភ្នំពេញៈ ក្រសួងការពារជាតិបានបញ្ជាក់ថា សភាពការណ៍ សន្ដិសុខសុវត្ថិភាពនៅតាមព្រំដែនប្រទេស កម្ពុជា មិនមានការប្រែប្រួលនោះទេ គឺស្ថិតនៅក្នុងភាពម្ចាស់ការបានល្អជានិច្ចហើយកងទ័ពបានត្រៀមខ្លួនរួចជាស្រេចក្នុងការទទួលបទបញ្ជាពីរាជរដ្ឋាភិបាលដើម្បីប្រយុទ្ធប្រឆាំងនឹងជំងឺកូវីដ ១៩ ខណៈដែលជំងឺនេះកំពុងតែរីករាលដាលនៅទូទាំងពិភពលោក។ នេះបើតាមលោក ឈុំ សុជាត អ្នកនាំពាក្យក្រសួងការពារជាតិ។
លោក ឈុំ សុជាត ថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងការពារជាតិ» ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលកាលពីម្សិលមិញនៅទីស្ដីការគណៈរដ្ឋមន្ដ្រីថា៖ «ខ្ញុំសូមជម្រាបជូនថា សភាពការណ៍សន្ដិសុខនៅតាមព្រំដែនមិនមានអ្វីប្រែប្រួលទេ គឺរក្សាភាពម្ចាស់ការបានជានិច្ច។
ចំណែកការហ្វឹកហ្វឺន ការប្រុងប្រៀបសម្រាប់ប្រយុទ្ធប្រឆាំងនឹងជំងឺកូវីដ ១៩ គឺក្រសួងការពារជាតិមានការប្រុងប្រៀបខ្ពស់ណាស់ទាំងកងកម្លាំង ទាំងសម្ភារទាំងបច្ចេកទេស។ យើងមានការប្រុងប្រៀបអស់ហើយ។ ដូច្នេះការត្រៀមលក្ខណៈដើម្បីប្រើប្រាស់កម្លាំងអនុវត្ដទៅតាមបទបញ្ជារាជរដ្ឋាភិបាលគឺយើងបានត្រៀមរួចរាល់អស់ហើយគឺថាឱ្យតែមានបទបញ្ជាគឺធ្វើហើយទាហានគឺដាច់ខាតបែបនេះតែម្ដង»។
លោក សុជាត បានថ្លែងជំនួសមុខឱ្យកងយោធពលខេមរភូមិន្ទទាំងអស់ថា កងទ័ពរបស់កម្ពុជាគឺស្ថិតនៅជាមួយប្រជាពលរដ្ឋជានិច្ច។ កងទ័ពគឺត្រូវតែជាកម្លាំងឈានមុខ កម្លាំងឆ្អឹងខ្នងដើម្បីការពារប្រជាពលរដ្ឋគ្រប់កន្លែង គ្រប់កាលៈទេសៈទាំងអស់។
លោកបញ្ជាក់ថា៖ «មិនថា សង្គ្រាមក្នុងស្រុក ក្រៅស្រុក ឬសង្គ្រាមប្រយុទ្ធជាមួយជំងឺកូវីដ១៩នេះក៏ដោយ គឺកងទ័ពនៅជួរមុខសម្រាប់ប្រជាពលរដ្ឋ ការពារពលរដ្ឋទាំងអស់គឺមិនរត់ចោលប្រជាពលរដ្ឋទេ។ សាច់ស្រស់ ឈាមស្រស់របស់យើងគឺបូជាជីវិតសម្រាប់ការពារជាតិ សាសនា ព្រះមហាក្សត្រ ក៏ដូចជាការពារសេចក្ដីសុខក្សេមក្សាន្ត និងការពារ សន្ដិសុខ សន្ដិភាពរបស់ប្រជាពលរដ្ឋ»។
លោកបញ្ជាក់ថា នៅពេលដែលរាជរដ្ឋាភិបាលត្រូវការ គឺកងទ័ពត្រូវតែឈានមុខគេតែម្ដងគឺមិនគិតពីការស្លាប់រស់នោះទេ។ លោកថា កងទ័ពម្នាក់ៗក្នុងសម្លៀកបំពាក់ជាកងទ័ពគឺមានពលិកម្មរួចហើយគឺកងទ័ពត្រូវតែពលិកម្មដើម្បីទឹកដីដើម្បីប្រជាពលរដ្ឋនេះជំហរដាច់ខាតរបស់កងទ័ព។
តាមរយៈសន្និសីទសារព័ត៌មាននេះលោក ឈុំ សុជាត ក៏បានបង្ហាញរបាយការណ៍ស្ដីពី «វឌ្ឍនភាព និងទិសដៅការងារបន្ដរបស់ក្រសួងការពារជាតិ» ក្នុងឆ្នាំ ២០១៩ កន្លងទៅ កងយោធពលខេមរភូមិន្ទបានអនុវត្ដភារកិច្ចរបស់ខ្លួនតាមកម្មវិធីនយោបាយ យុទ្ធសាស្ដ្រចតុកោណដំណាក់កាលទី ៤ របស់រាជរដ្ឋាភិបាល ផែនការកែទម្រង់កងយោធពលខេមរភូមិន្ទរយៈពេល ៥ ឆ្នាំ និងកម្មវិធីការងារបានល្អប្រសើរ។
របាយការណ៍បង្ហាញថា ទិសដៅបន្តរបស់ក្រសួងការពារជាតិគឺបន្ដអនុវត្ដកម្មវិធីនយោបាយ យុទ្ធសាស្ដ្រចតុកោណដំណាក់កាលទី ៤ របស់រាជរដ្ឋាភិបាលនីតិកាលទី ៦ នៃរដ្ឋសភា ដើម្បីទប់ទល់សភាពការណ៍អសន្ដិសុខដែលអាចកើតឡើងដោយយថាហេតុ និងវាយបំបាក់នូវរាល់ឧបាយកលញុះញង់បំបែកបំបាក់របស់ក្រុមឧទ្ទាមក្រៅច្បាប់ដែលប៉ុនប៉ងផ្ដួលរំលំរាជរដ្ឋាភិបាលស្របច្បាប់។ តាមរបាយការណ៍នេះបានឱ្យដឹងថា លទ្ធផលនៃការកែទម្រង់កងយោធពលខេមរភូមិន្ទក្នុងឆ្នាំ ២០១៩ កន្លងទៅក្រសួងការពារជាតិបានចាត់តាំង លំហាត់ហ្វឹកហ្វឺនរួមគ្នារវាងកងយោធពលខេមរភូមិន្ទ និងកងទ័ពរំដោះប្រជាជនចិន «នាគមាសឆ្នាំ ២០១៩»។
លំហាត់ហ្វឹកហ្វឺន «មហារំអិល ២០១៩» ក្រោមប្រធានបទ «ប្រឆាំងនឹងការប្លន់នាវាដឹកប្រេង»។ លំហាត់ហ្វឹកហ្វឺន «ហនុមានមាស ២០១៩» និងលំហាត់ហ្វឹកហ្វឺន «សង្គ្រោះគ្រោះមហន្តរាយព្រំដែនកម្ពុជា-វៀតណាម» ផងដែរ។ ដោយឡែកក្នុងឆ្នាំ ២០២០ នេះក្រសួងការពារជាតិក៏បានធ្វើសមយុទ្ធនាគមាសលើកទី ៤ រវាងកងទ័ពកម្ពុជា-ចិន ដែលបានធ្វើឡើងរយៈពេល ១៥ ថ្ងៃ ចាប់ផ្តើមពីថ្ងៃទី ១៥-៣០ ខែ មីនា នៅខេត្តកំពត។ ការធ្វើសមយុទ្ធនេះ គឺដើម្បីលើកកម្ពស់ចំណងសាមគ្គីភាព មិត្តភាព និងការបណ្ដុះបណ្ដាលចំណេះដឹងការផ្លាស់ប្ដូរបទពិសោធនៃកងទ័ពប្រទេសទាំង ២៕