ភ្នំពេញៈ ទេសកម្ពុជាបានសម្រេចបញ្ជូនកងយោធពលខេមរភូមិន្ទប្រមាណជាង ៤០០ នាក់ ទៅកាន់ប្រទេស ម៉ាលី និង ស៊ូដង់ខាងត្បូង ជាមួយនឹងការប្ដេជ្ញាចិត្តមិនរាយថយបើទោះជាមានអ្នករងគ្រោះដល់ជីវិតក៏ដោយ ។
ថ្លែងក្នុងពិធីបញ្ជូននៅមូលដ្ឋានទ័ពអាកាសពោធិ៍ចិនតុង នៅព្រឹកថ្ងៃទី ៣ ខែមេសានេះ នាយឧត្តមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទបានលើកឡើងថា ប្រទេសកម្ពុជាមិនរាថយឡើយ ប៉ុន្តែបានប្តេជ្ញាបង្កើនកម្លាំងបន្ថែម បើទោះបីកងទ័ពកម្ពុជាត្រូវបានរងការវាយប្រហារពីក្រុមឧទាមនៅប្រទេស ម៉ាលី ក៏ដោយ។
នាយឧត្តមសេនីយ៍ ប៉ុល សារឿន បានបញ្ជាក់ថា៖ «នាពេលថ្មីៗនេះ…ឆ្លើយតបទៅនឹងតម្រូវការរបស់អង្គសហប្រជាជាតិ កម្ពុជា នៅតែប្តេជ្ញាចិត្តខ្ពស់បន្តសកម្មភាពជាអាទិភាពក្នុងការថែរក្សានិងពង្រឹងសន្តិភាព ស្ថិរភាព ក្នុងប្រទេសក៏ដូចជាការបន្តសកម្មភាពមនុស្សធម៌តាមរយៈការចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ…ទោះបីកងទ័ពកម្ពុជាត្រូវបានរងវាយប្រហារពីក្រុមឧទ្ទាមនៅប្រទេសម៉ាលីក្ដី ប៉ុន្តែកម្ពុជាមិនរាថយ កម្ពុជានៅតែតស៊ូប្តូរផ្តាច់ លះបង់សាច់ស្រស់ ឈាមស្រស់ ហើយ កម្ពុជា បានប្តេជ្ញាបង្កើតកម្លាំងបន្ថែមទៀតដើម្បីចូលរួមបំពេញបេសកកម្មរក្សាសន្តិភាព ក្នុងក្របខ័ណ្ឌអង្គការសហប្រជាជាតិ »។
កងកម្លាំងដែលចេញទៅបំពេញបេសកកម្មលើកនេះ រួមមាន៖ កងវិស្វកម្មព្រលានយន្តហោះលេខ ១៩៨ ចំនួន ១៦៥ នាក់ នារី១៣ នាក់, កងកម្ទេចគ្រាប់មិនទាន់ផ្ទុះ លេខ ១២៣ ចំនួន ១៤៤ នាក់ នារី ១១ នាក់ និង កងអាវុធហត្ថលេខ ១៨១ ចំនួន ១១៩ នាក់។
កាលពីខែឧសភាឆ្នាំមុន កងកម្លាំងមួកខៀវកម្ពុជាចំនួន ៤ រូប បានបូជាជីវិត ក្នុងអំឡុងពេលបំពេញ បេសកកម្មនៅសាធារណរដ្ឋអាហ្វ្រិកកណ្តាលនិងមានការចូលរួមរំលែកទុក្ខគ្រួសារសពពីរាជរដ្ឋាភិបាលកម្ពុជា ព្រមទាំងមានសំណងពីអង្គការសហប្រជាជាតិផងដែរ៕