.jpg)
លោក ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និងលោក គួច ចំរើន អភិបាលខេត្តព្រះសីហនុ នៅក្នុងពិធីបិទវគ្គបណ្ដុះបណ្ដាលឆ្នាំ២០១៩ និងបើកវគ្គថ្មី ២០២០។ រូបថត សាលាខេត្តព្រះសីហនុ
ភ្នំពេញៈ កងនាវិកថ្មីចំនួន ៣០០ នាក់ បានចាប់ផ្ដើមទទួលបណ្ដុះបណ្ដាលកាលពីម្សិលមិញពីរបៀបអប់រំចិត្តសាស្ត្រអប់រំសុខាភិបាល ភ័ស្តុភារហិរញ្ញវត្ថុ កាយសិក្សាយោធាបច្ចេកទេសប្រើប្រាស់អាវុធថ្មើរជើង យុទ្ធវិធីប្រយុទ្ធថ្នាក់បុគ្គល និងបាញ់ស៊ីបនៅសាលាទ័ពជើងទឹកមូលដ្ឋានសមុទ្ររាមក្នុងឃុំរាម ស្រុកព្រៃនប់ ខេត្តព្រះសីហនុ បន្ទាប់ពីវគ្គចាស់បានបញ្ចប់។
លោក ព្រាប សាម៉ន នាយករងសាលាទ័ពជើងទឹកបានប្រាប់ភ្នំពេញប៉ុស្តិ៍កាលពីម្សិលមិញថា ការបណ្ដុះបណ្ដាលនេះធ្វើឡើងក្រោយពីបញ្ចប់ពិធីបិទវគ្គហ្វឹកហ្វឺនបណ្តុះបណ្តាលនាវិកថ្មីឆ្នាំ ២០១៩ កាលពីថ្ងៃអង្គារទី ១៩ ខែឧសភា ក្រោមអធិបតីលោក ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និងជាអគ្គលេខាធិការនៃគណៈកម្មាធិការជាតិសន្តិសុខលម្ហសមុទ្រ និងលោក គួច ចំរើន អភិបាល ខេត្តព្រះសីហនុ។
លោកថ្លែងថាការចាប់ផ្តើមបណ្ដុះបណ្ដាលថ្មីនេះមានសិក្ខាកាមចូលរួម ៣០០ នាក់ ក្នុងនោះគ្រូបង្វឹក ១១ នាក់ ខណៈកាលពីឆ្នាំមុនមានសិក្ខាកាម ២៣៩ នាក់ ហើយទទួលបានលទ្ធផលល្អ។ វគ្គបណ្ដុះបណ្ដាលថ្មីនេះគឺយើងធ្វើដូចគ្នាទៅនឹងវគ្គចាស់ដែរ ហើយក៏ជាការបំពេញក្របខ័ណ្ឌដល់កងនាវិកថ្មី និងត្រៀមលក្ខណៈដើម្បីទទួលនាវារបស់កងនាវិកចិន។
លោកបានបញ្ជាក់ថា៖ «ជាលទ្ធផលក្នុងវគ្គហ្វឹកហ្វឺនឆ្នាំ ២០១៩ ក្នុងចំណោមសិក្ខាកាមចូលរួម ២៣៩ នាក់ សិក្ខាកាមទទួលបាននិទ្ទេសល្អ ៩៩ នាក់ ស្មើ ៤១,៤២ ភាគរយ ល្អបង្គួរ ១០២ នាក់ស្មើនឹង ៤២,៦៨ ភាគរយ និងមធ្យម ៣៨ នាក់ស្មើនឹង ១៥,៩០ ភាគរយ»។
ថ្លែងនៅក្នុងឱកាសបើកវគ្គថ្មីនេះលោក ទៀ វិញ បានលើកយកប្រសាសន៍របស់លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិដែលផ្ដាំផ្ញើទៅកាន់នាយនាវីពលនាវីថា៖ «ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានយកចិត្តទុកដាក់វិស័យអប់រំបណ្តុះបណ្តាលបង្កើនធនធានមនុស្សឲ្យក្លាយជាកម្លាំងស្នូល និងជាមូលដ្ឋានគ្រឹះរឹងមាំតាមជំនាញឯកទេសថែមមួយកម្រិតទៀត»។
លោក ទៀ បាញ់ បានវាយតម្លៃខ្ពស់ចំពោះការហ្វឹកហាត់ថា នេះគឺជាការផ្ទេរចំណេះដឹងដល់នាវិកថ្មីក្នុងការរួមចំណែកអភិវឌ្ឍធនធានមនុស្សដើម្បីបម្រើជាតិ សាសនា ព្រះមហាក្សត្រ ពិសេសបម្រើ និងការពាររាជរដ្ឋាភិបាលឆ្លើយតបទៅនឹងតម្រូវការចាំបាច់របស់កងយោធពលខេមរភូមិន្ទក្នុងវិស័យទ័ពជើងទឹក ទាំងពេលបច្ចុប្បន្ន និងទៅថ្ងៃអនាគតក្នុងការដឹកនាំគ្រប់គ្រងបញ្ជាលើគ្រប់ស្ថានភាព ទាំងគ្រឿងបំពាក់សម្ភារបច្ចេកទេស ទាំងអាវុធយុទ្ធភណ្ឌគ្រប់ប្រភេទឱ្យមានប្រសិទ្ធភាពខ្ពស់៕
