.jpg)
កងបោសសម្អាតគ្រាប់យុទ្ធភណ្ឌមិនទាន់ផ្ទុះក្រោមទឹក នៅទន្លេមេគង្គ ក្នុងស្រុកល្វាឯមខេត្តកណ្តាល កាលពីថ្ងៃទី ១៤ ខែ ឧសភា ឆ្នាំ ២០២១។ រូបថត Sar Kheng page
កណ្តាលៈ កងបោសសំអាតគ្រាប់យុទ្ធភណ្ឌមិនទាន់ផ្ទុះក្រោមទឹក នឹងចាប់ផ្តើមស្រង់គ្រាប់យុទ្ធភណ្ឌមិនទាន់ផ្ទុះចេញពីនាវាដែលត្រូវបានលិចកាលពីសម័យសង្គ្រាមស៊ីវិល ក្នុងទសវត្សត៍ ឆ្នាំ ៧០ នៅក្នុងទន្លេមេគង្គ ស្ថិតនៅចំណុចឃុំបឹងគ្រំ ស្រុកល្វាឯម ខេត្តកណ្ដាល នៅសប្តាហ៍ក្រោយ ។
លោក ម៉ី សុភា មេបញ្ជាការនៃទីបញ្ជាការដ្ឋាន កងបោសសំអាតគ្រាប់យុទ្ធភណ្ឌមិនទាន់ផ្ទុះក្រោមទឹកប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែឧសភា នេះថា ដោយសារបញ្ហាសម្ភារបច្ចេកទេសមានស្ថានភាពខូចខាត និងត្រូវជួសជុល បានធ្វើឱ្យមានភាពយឺតយ៉ាវបន្តិច។ ប៉ុន្តែបច្ចុប្បន្ននេះ បានរៀបចំរួចរាល់ហើយអាចថា នៅសប្តាហ៍ក្រោយនឹងចូលទៅដល់នាវា ដើម្បីស្រង់យកគ្រាប់ឡើងមកលើគោក។
តាមផែនការ គឺពុំមានអ្វីជាឧបសគ្គខ្លាំងនោះទេ សម្រាប់ប្រតិបត្តិករ ក្នុងការយកគ្រាប់ចេញពីនាវា ប៉ុន្តែសម្រាប់ឆ្នាំនេះ រដូវវស្សាចូលមកលឿនជាងឆ្នាំមុន ដែលសម្បូរព្យុះ និងភ្លៀងច្រើន ដែលធ្វើឱ្យមានការរាំងស្ទះបន្តិចបន្តួច ក្នុងបញ្ហាគ្រោះធម្មជាតិ និងមួយទៀត ដោយសារមានការបិទខ្ទប់នាពេលកន្លងមកនេះ ក៏ធ្វើឱ្យមានបញ្ហាបន្តិចផងដែរ។
បើតាម លោក ម៉ី សុភា សម្រាប់កម្លាំងជំនាញ ដែលបាននិងកំពុងឈរជើងនៅក្នុងការដ្ឋានបឹងគ្រុំ នៃស្រុកល្វាឯមនេះមានចំនួន ៣៥ នាក់ មកពីគ្រប់សមាសភាពជំនាញទាំងអស់ ។
ដោយឡែក សម្រាប់តាមផែនការមួយឆ្នាំ នឹងធ្វើឱ្យរួចរាល់ ក្នុង ៤ ការដ្ឋាន ឱ្យចប់សព្វគ្រប់រួមមាន ការដ្ឋានៅស្រុកល្វាឯម ការដ្ឋាននៅស្រុកមុខកំពូល ការដ្ឋាននៅស្រុកពាមរក៍ និងការដ្ឋាននៅស្រុកពាមជរ ខេត្តព្រៃវែង ។
លោក ម៉ី សុភា ថ្លែងថា៖ «សម្រាប់សម្ភារប្រើប្រាស់ និងកម្លាំងជំនាញ គឺមិនមានការខ្វះខាតនោះទេ ហើយបច្ចុប្បន្ននេះ កម្លាំងជំនាញកំពុងយកនៅ បឹងគ្រុំ ស្រុកល្វាឯមមួយការដ្ឋាន ក៏ត្រៀមបើករដ្ឋានថ្មីមួយទៀតដែរ គឺនៅស្រុកមុខកំពូលទៀត ។ យើងកំពុងមានប្រតិបត្តិការលើពីរការដ្ឋានទន្ទឹមគ្នា។ ដូច្នេះ យើងនៅសល់តែ ២ ការដ្ឋានទៀតទេ នឹងត្រូវបានបញ្ចប់តាមផែនការក្នុងរយៈពេល ១ ឆ្នាំ»។
លោក ម៉ី សុភា បញ្ជាក់ទៀតថា សម្រាប់ការបោសសំអាតគ្រាប់យុទ្ធភណ្ឌមិនទាន់ផ្ទុះ ក្នុងនាវាចម្បាំងលិចក្នុងទន្លេមេគង្គស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ត្រូវបានបញ្ចប់ ប្រកបដោយជោគជ័យកាលពីពេលថ្មីៗនេះ ដោយស្រង់គ្រាប់យុទ្ធភណ្ឌបានជាង ១៦ តោន រួមទាំងសម្ភារសឹក បំណែកឆ្អឹងសព និងស្រង់នាវាឡើងមកលើគោកជាស្ថាពរ ក្នុងកិច្ចប្រតិបត្តិការរយៈពេល ៦ ខែ។
បើតាមលោក ម៉ី សុភា សម្រាប់ការដ្ឋានទី២ នៅឃុំបឹងគ្រំ ស្រុកល្វាឯម ខេត្តកណ្ដាលនាពេលនេះ ក្រុមការងារបានស្រាវជ្រាវ និងទទួលបានលទ្ធផលថា នាវាចម្បាំងដែលបានលិចកាលពីសម័យសង្គ្រាមនោះ គឺជាប្រភេទនាវាសឹករបស់កងទ័ព លន់ នល់ ដែលមានចំណុះប្រមាណ ៨០០ តោន ហើយដែលអ្នកស្រុកហៅថា ប្លង់តុង៕
