The Phnom Penh Post Search

Search form

Logo of Phnom Penh Post newspaper Phnom Penh Post - កង​រក្សា​សន្តិភាព​កម្ពុជា​ម្នាក់​ស្លាប់ ៣ នាក់​បាត់​ខ្លួន ក្រោយ​វាយ​ប្រហារ​ដោយ​ពួក​ឧទ្ទាម




កង​រក្សា​សន្តិភាព​កម្ពុជា​ម្នាក់​ស្លាប់ ៣ នាក់​បាត់​ខ្លួន ក្រោយ​វាយ​ប្រហារ​ដោយ​ពួក​ឧទ្ទាម

Content image - Phnom Penh Post
កងរក្សាសន្តិភាពកម្ពុជា ទទួលពរ​ពី​ព្រះ​សង្ឃ​កម្ពុជា​មុន​ចេញ​ទៅ​បំពេញ​បេសសកម្ម​នា​ពេល​កន្លង​មក។ ហេង ជីវ័ន

កង​រក្សា​សន្តិភាព​កម្ពុជា​ម្នាក់​ស្លាប់ ៣ នាក់​បាត់​ខ្លួន ក្រោយ​វាយ​ប្រហារ​ដោយ​ពួក​ឧទ្ទាម

ភ្នំពេញៈ កង​រក្សា​សន្តិភាព​កម្ពុជា​ម្នាក់ ត្រូវ​បាន​សម្លាប់​នៅ​ក្នុង​ប្រទេស សាធារណៈ​រដ្ឋ​អាហ្វ្រិក​កណ្តាល ដែល​ត្រូវ​បាន​រាយការណ៍​ថា ធ្វើ​ឡើង​ដោយ​ក្រុម​ពួក​ឧទ្ទាម។ នេះ​បើ​យោង​តាម​ការ​ប្រកាស​ឲ្យ​ដឹង​ពី​លោក​នាយក​រដ្ឋ​មន្ត្រី ហ៊ុន សែន កាល​ពី​ព្រឹក​ថ្ងៃ​អង្គារ​នេះ។

លោក​នាយករដ្ឋមន្ត្រី បាន​យក​ឳកាស​ថ្លែង​សុន្ទរកថា​នា​ព្រឹក​មិញ​នេះ ចូល​រួម​មរណៈ​ទុក្ខ ដល់​ក្រុម​គ្រួសារ​ជន​រង​គ្រោះ ឈ្មោះ អ៊ឹម សំ មាន​ស្រុក​កំណើត​នៅ​ខេត្ត សៀមរាប គឺជា​អ្នក​បើក​រថយន្ត ត្រូវ​បាន​ពួក​ឧទ្ទាម​ធ្វើ​ការ​វាយ​ប្រហារ និង​សម្លាប់​កាល​ពី​ម៉ោង ៨ យប់​ម្សិលមិញ។

កង​ទ័ព​មួក​ខៀវ​កម្ពុជា​ទាំង ៤ ​នាក់ ត្រូវ​បាន​រង​ការ​វាយ​ប្រហារ ដោយ​ក្រុម​ឧទ្ទាម​ជ្រុល​និយម​ ដោយ​ម្នាក់​មាន​របួស​ធ្ងន់​ដល់​ស្លាប់ និង ៣ នាក់​ទៀត​កំពុង​បាត់​ខ្លួន។

លោក​នាយក​រដ្ឋ​មន្ត្រី ហ៊ុន សែន បាន​ថ្លែង​ថា «ឥឡូវនេះ​បង​ប្អូន​យើង​ ក៏​បាន​ធ្វើ​ប្រតិបត្តិការ​ រុក​រក​ទាហាន​បាត់ខ្លួន​ទាំង​បី​នាក់​នេះ ប៉ុន្តែ​ឥឡូវ​បញ្ហា​ចំណោទ ថា​តើ​បងប្អូន​រត់​គេច​ខ្លួន​ពី​ការ​វាយ​ប្រហារ​ ឬ​ក៏​ត្រូវ​បាន​ចាប់​ជា​ឈ្លើយ​សឹក ឬ​ជា​ចំណាប់​ខ្មាំង»។

សាធារណៈរដ្ឋ​អាហ្វ្រិក​កណ្តាល​ដែល​សម្បូរ​ដោយ​ធនធាន កំពុង​ញាំញី​ដោយ​ការ​វាយ​ប្រហារ​ដោយ​ក្រុម​ពួក​ឧទ្ទាម​ជ្រុល​និយម ប្រដាប់​ដោយ​អាវុធ ពីរ​ក្រុម ដោយ​ម្ខាង​ជា​ពួក​ម៉ូស្លីម ស៊ី​ឡេកា និង​ក្រុម​ប្រឆាំង Balaka ដែល​ភាគ​ច្រើន​ជា​អ្នក​កាន់​សាសនា​គ្រឹះ។

លោក ផល សាម៉ន អគ្គនាយករ​ង​នៃ​​មណ្ឌល​ជាតិ​​សម្រាប់​​កង​កម្លាំង​រក្សា​សន្តិភាព និង​បោស​សម្អាត​មីន និង​គ្រាប់​​មិន​ទាន់​ផ្ទុះ​ បាន​បញ្ជាក់​ដូច​ការ​លើក​ឡើង​របស់​លោក​នាយក​រដ្ឋ​មន្ត្រី ប៉ុន្តែ​លោក​មិន​ទាន់​អាច​បញ្ជាក់​ថា តើ​ក្រុម​ណា​មួយ​ជា​អ្នក​ធ្វើ នៅ​ឡើយ​ទេ។

លោក សាម៉ន ប្រាប់​តាម​របាយ​ការណ៍​ដែល​ទទួល​បានពីជំរុំ UN នៅ​អាហ្វ្រិក​កណ្តាល ថា ការ​វាយ​ប្រហារ​នេះ ធ្វើ​ឡើង​ដើម្បី​ទាមទារ​ឲ្យ​មាន​ការ​ដោះ​លែង​អ្នក​ជាប់​ពន្ធនាគារ​នៅ [អាហ្វ្រិក​កណ្តាល]។

លោក​បន្ត​ថា ទាហាន​រក្សា​សន្តិភាព​របស់​កម្ពុជា​នេះ គ្មាន​អាវុធ​នៅ​ក្នុង​ដៃ និង​ស្ថិត​នៅ​ចម្ងាយ​ប្រមាណ ១០០​គីឡូ​ម៉ែត្រ ពី​ជំរុំ​របស់​អង្គការ​សហប្រជាជាតិ​នៅ​ក្នុង​ប្រទេស អាហ្វ្រិក​កណ្តាល ជាមួយ​នឹង​ក្រុម​រក្សា​សន្តិភាព​ជនជាតិ​ម៉ារ៉ុក។

ទាហាន​កម្ពុជា ១២ នាក់ បាន​កំពុង​ធ្វើ​ដំណើរ​ពី​កន្លែង​ការងារ ដែល​រួម​មាន​កង​វិស្វរកម្ម និង​កង​ដោះ​មីន នៅ​ពេល​ពួកគេ ត្រូវ​បាន​វាយ​ប្រហារ​ដោយ​ក្រុម​ឧទ្ទាម។

លោក ផល សាម៉ន បន្ថែម​ថា ជន​ជាតិ​ម៉ារ៉ុក​ម្នាក់ ក៏​កំពុង​បាត់​ខ្លួន និង ​៥ នាក់​ទៀត​រង​របួស​ធ្ងន់​និង​ស្រាល​ផង​ដែរ ខណៈ​ឧទ្ធម្ភាគចក្រ​របស់ UN កំពុង​តាម​ស្វែង​រក​កង​រក្សាសន្តិភាព​ដែល​កំពុង​បាត់​ខ្លួន​នោះ។

លោក​នាយក​រដ្ឋ​មន្ត្រី ហ៊ុន សែន បាន​ទាម​ទារ​ឲ្យ​អង្គការ​សហប្រជាជាតិ ត្រូវ​យក​ចិត្ត​ដាក់ និង​ទទួល​ខុស​ត្រូវ​ខ្ពស់​ចំពោះ​កង​រក្សាសន្តិភាព​របស់​កម្ពុជា។

លោក​ថ្លែង​ថា « ខ្ញុំ​អំពាវនាវ​ដល់​ យូអិន យក​ការ​ទទួល​ខុស​ត្រូវ​ខ្ពស់​មួយ​ ដើម្បី​ធានា​អយុ​ជីវិត​ទហាន​របស់​កម្ពុជា..។... ខ្ញុំ​អំពាវនាវ ឯកឧត្តម ទៀ បាញ់ ប្រាក់​សុខុន តាម​ដាន​ឲ្យ​ជាប់។ បើ​ករណី​នេះ​ជា​ការ​ចាប់​ជំរិត ការ​ដោះដូរ តើ​ត្រូវ​សម្រេច​យ៉ាង​ណា​អំពី​បញ្ហា​នេះ​ សូម​ឲ្យ​ UN ធ្វើ​ការ​ប្រុង​ប្រយ័ត្ន និង​ខិតខំ​រាយការណ៍​ឲ្យ​ខ្ញុំ​ឆាប់​រហ័ស​បំផុត​តាម​តែ​អាច​ធ្វើ​បាន»។

សូម​បញ្ជាក់​ថា កង​រក្សា​សន្តិភាព​កម្ពុជា​ចំនួន ២១៦ នាក់​កំពុង​បំពេញ​បេសសកម្ម នៅ​ក្នុង​ប្រទេស​អាហ្វ្រិក​កណ្តាល​នេះ។

សូមរង់ចាំអានព័ត៌មានពិស្តារ...

អត្ថបទគួរចាប់អារម្មណ៍