ភ្នំពេញៈ បុគ្គលិក ១០ នាក់ នៃអង្គការការពារ និងអភិរក្សសត្វ ព្រៃឈើ ជលផលកម្ពុជាត្រូវបានឃាត់ខ្លួនលើសំណុំរឿងដើរគំរាមកំហែង និងប្រើប្រាស់ស្លាករថយន្ត ខ.ម របស់ក្រសួងការពារជាតិ ហើយជនសង្ស័យទាំងនោះត្រូវបានបញ្ជូនទៅសាលាដំបូងខេត្តព្រះសីហនុកាលពីម្សិលមិញ។
អាវុធហត្ថស្រុកព្រៃនប់នៃខេត្តព្រះសីហនុបានឃាត់ខ្លួនជនសង្ស័យទាំង ១០ នាក់នោះ កាលពីថ្ងៃទី ១៨ កុម្ភៈ ព្រោះពួកគេប្រើស្លាកលេខរថយន្ត ខ.ម និងដើរគំរាមកំហែងអ្នកភូមិ។
លោក សេក សូនី នាយការិយាល័យព្រហ្មទណ្ឌនៃបញ្ជាការដ្ឋានកងរាជអាវុធហត្ថខេត្តព្រះសីហនុបានឲ្យដឹងកាលពីម្សិលមិញថា ជនសង្ស័យទាំង ១០ នាក់ ត្រូវបានបញ្ជូនដល់សាលាដំបូងខេត្តព្រះសីហនុរួចរាល់ហើយ។
លោក សូនី ថ្លែងថា សមត្ថកិច្ចរបស់លោកបានកសាងសំណុំរឿងបញ្ជូនជនសង្ស័យជាបុគ្គលិក អង្គការអភិរក្សជលផល បរិស្ថាន សត្វព្រៃ និងព្រៃឈើ ប្រទេសកម្ពុជាចំនួន ១០ នាក់ ទៅសាលាដំបូងខេត្តព្រះសីហនុនៅរសៀលថ្ងៃទី ២០ កុម្ភៈ។
លោក សូនី ថ្លែងថា៖ «ព័ត៌មានលម្អិតស្តីពីមូលហេតុនៃការប្រព្រឹត្តខុសច្បាប់របស់ពួកគេយ៉ាងណានោះខ្ញុំមិនអាចផ្តល់ជូនបានទេ ព្រោះមានតែខាងតុលាការទេ។ ពួកគាត់ជាបុគ្គលិកអង្គការក្រៅរដ្ឋាភិបាលហើយពាក់ព័ន្ធបញ្ហានេះតុលាការនឹងសាកសួរពួកគាត់លម្អិតទៀត។ ចំណែកខាងខ្ញុំបានតែត្រឹមកសាងសំណុំរឿងទេ»។
ជុំវិញការឃាត់ខ្លួននេះដែរពីម្សិលមិញលោក ឃាង ភារម្យ អ្នកនាំពាក្យនៃរដ្ឋបាលខេត្ត ព្រះសីហនុ ប្រាប់ភ្នំពេញប៉ុស្តិ៍ថា សមត្ថកិច្ចកងរាជអាវុធហត្ថខេត្តព្រះសីហនុកំពុងដំណើរការនីតិវិធីហើយ ហើយបុគ្គលិកអង្គការទាំងនោះត្រូវបានកសាងសំណុំរឿងបញ្ជូនទៅតុលាការ។
លោក ភារម្យ ថ្លែងថា៖ «បញ្ហានេះកំពុងស្ថិតនៅក្នុងនីតិវិធីរបស់តុលាការ។ ដូច្នេះលោកមិនអាចបកស្រាយអ្វីបានទេ»។ ចំពោះសំណួរសួរថាអង្គការមួយនេះមានការទទួលស្គាល់ពីក្រសួងមហាផ្ទៃយ៉ាងណានោះលោកទុកឲ្យខាងតុលាការធ្វើការងារនេះសិន។ ព្រោះអាជ្ញាធរខេត្តមិនមែនជាអ្នកសួរចម្លើយទេ មានតែតុលាការទេដែលជាអ្នកសួរចម្លើយ។ វានៅក្នុងនីតិវិធីនៃតុលាការកំពុងស៊ើបសួរអ៊ីចឹងទុកឲ្យតុលាការធ្វើការសិន»។
ទោះយ៉ាងណាពីម្សិលមិញ ភ្នំពេញប៉ុស្តិ៍បានទូរស័ព្ទទាក់ទងទៅបុរសម្នាក់ដែលគាត់សុំមិនបញ្ចេញឈ្មោះ និងបានអះអាងថាជាអតីតបុគ្គលិករបស់អង្គការអភិរក្សជលផល បរិស្ថាន សត្វព្រៃ និងព្រៃឈើ ប្រទេសកម្ពុជា នោះបានប្រាប់ថា ប្រធានអង្គការអភិរក្សជលផល បរិស្ថាន សត្វព្រៃ និង ព្រៃឈើ ប្រទេសកម្ពុជានេះឈ្មោះ ស៊ុន សាមាឃ និងមានការទទួលស្គាល់ត្រឹមត្រូវពីក្រសួងមហាផ្ទៃហើយអង្គការក៏តែងតែធ្វើរបាយការណ៍រាយការណ៍ទៅក្រសួងមហាផ្ទៃជាប្រចាំឆ្នាំដែរ។ ប៉ុន្តែទើបតែចូលឆ្នាំ ២០២០ នេះទេទើបអង្គការឈប់ធ្វើសកម្មភាពព្រោះបាត់ប្រធានរបស់អង្គការមិនដឹងទៅណា ហើយបុគ្គលិកដែលមានប្រមាណជា ១០ នាក់នោះ ក៏គ្មានអ្នកចេញកាតសម្គាល់ខ្លួនឲ្យក៏នាំគ្នារំសាយអស់ទៅ។
លោកប្រាប់ថា៖ «ខ្ញុំជាអ្នកយករបាយការណ៍ឡើងទៅក្រសួងមហាផ្ទៃផ្ទាល់ តែខ្ញុំមិនដឹងថា អង្គការទទួលជំនួយពីណាទេ»។
បុរសរូបនោះបញ្ជាក់ថាអង្គការខាងលើបានរំសាយឈប់តាំងពីខែមករា ឆ្នាំ ២០១៩ មក។ ចំពោះទីស្នាក់ការរបស់អង្គការមាននៅខេត្ត ព្រះវិហារ ខេត្ត ក្រចេះ ខេត្ត រតនគិរី និងនៅខេត្តមណ្ឌលគិរី ក៏មានដែរ តែចំពោះខេត្តព្រះសីហនុលោកមិនដឹងថា មានស្នាក់ការឬអត់ទេ។
ជុំវិញការឃាត់ខ្លួនបុគ្គលិកអង្គការអភិរក្សជលផល បរិស្ថាន សត្វព្រៃ និងព្រៃឈើ ប្រទេសកម្ពុជានេះពីម្សិលមិញភ្នំពេញប៉ុស្តិ៍បានទូរស័ព្ទទៅលោក ម៉ែន វណ្ណា មេបញ្ជាការរង កងកម្លាំងមូលដ្ឋានអាវុធហត្ថស្រុកព្រៃនប់ ដែលជាអ្នកដឹកនាំប្រតិបត្តិការឃាត់ខ្លួនមនុស្សទាំង ១០ នាក់នោះដែរតែលោកត្រឹមទទួលទូរស័ព្ទហើយឆ្លើយថាកំពុងជាប់ប្រជុំ។
តែបើតាមកំណត់ហេតុរបស់កងរាជអាវុធហត្ថខេត្តព្រះសីហនុបានបញ្ជាក់ថា ការឃាត់ខ្លួនមនុស្ស ១០ នាក់នោះធ្វើឡើងកាលពីវេលាម៉ោង ៤ និង ៥០ នាទីរសៀលថ្ងៃទី ១៨ ខែ កុម្ភៈ ឆ្នាំ ២០២០ បន្ទាប់ពីប្រជាពលរដ្ឋរាយការណ៍ប្រាប់សមត្ថកិច្ចករណីប្រើប្រាស់រថយន្តផ្ទាល់ខ្លួនពាក់ស្លាកលេខ ខ.ម នឹងប្រើប្រាស់តួនាទីជាអង្គការអភិរក្សជលផល បរិស្ថាន សត្វព្រៃ និងព្រៃឈើ ប្រទេសកម្ពុជាធ្វើការគំរាមកំហែងប្រជាពលរដ្ឋនៅចំណុច ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។
ចំពោះវត្ថុតាងចាប់យករួមមាន រថយន្ត ១ គ្រឿង ពាក់ស្លាកលេខ ខ.ម 2-1973 ម៉ាកម៉ាស្តាពណ៌ត្រេអ៊ី៕