ភ្នំពេញៈ អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ (ក.ជ.ក.) តាមរយៈការគាំទ្រពីអង្គការភ្លែនអន្តរជាតិកម្ពុជា និងអង្គការឆាលហ្វាន់ បានដាក់ឲ្យប្រើប្រាស់ «គោលនយោបាយជាតិស្តីពីប្រព័ន្ធកិច្ចការពារកុមារ» ដើម្បីប្រមូលផ្តុំការវិនិយោគទៅលើកុមារទាំងស្មារតី និងធនធានឱ្យមានលក្ខណៈជាប្រព័ន្ធគ្រប់ជ្រុងជ្រោយជាងមុន ដែលនឹងក្លាយជាធនធានមនុស្សអាចរួមចំណែកក្នុងការអភិវឌ្ឍប្រទេសជាតិ។
ការប្រារព្ធដាក់ឲ្យប្រើប្រាស់គោលនយោបាយនេះធ្វើឡើងពីម្សិលមិញក្រោមអធិបតីភាពលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធាន ក.ជ.ក. រួមនឹងមន្ដ្រីមកពីក្រសួង អង្គការ ស្ថាប័នពាក់ព័ន្ធថ្នាក់ជាតិ និងថ្នាក់ក្រោមជាតិ វិស័យឯកជន និងកុមារសរុបប្រមាណ ១៩០ នាក់ នៅទីស្ដីការក្រសួងសង្គមកិច្ច។
លោក វង សូត ថ្លែងក្នុងពិធីនេះថា គោលនយោបាយជាតិស្តីពីប្រព័ន្ធកិច្ចការពារកុមារជាយុទ្ធសាស្ត្របង្ហាញអំពីការប្តេជ្ញាចិត្តរបស់រាជរដ្ឋាភិបាលកម្ពុជាដែលធ្លាប់អនុវត្តកន្លងមក និងចាំបាច់ត្រូវធ្វើការពង្រឹង និងពង្រីកបន្ថែមទៀត និងជាគោលនយោបាយជាតិដែលត្រូវបានរៀបចំឡើងជាលើកដំបូងសម្រាប់រយៈពេល ១០ ឆ្នាំ (២០១៩-២០២៨)។
លោកថា៖ «គោលនយោបាយជាតិនេះអាចប្រមូលផ្តុំការវិនិយោគទៅលើកុមារទាំងស្មារតី និងធនធានឱ្យមានលក្ខណៈជាប្រព័ន្ធគ្រប់ជ្រុងជ្រោយជាងមុន ដើម្បីឱ្យកុមារគ្រប់រូបមានឱកាសស្មើៗគ្នា និងក្លាយជាធនធានមនុស្សដែលអាចរួមចំណែកក្នុងការអភិវឌ្ឍប្រទេសជាតិយើង»។
លោកស្រី ញ៉េប សុភាព អគ្គលេខាធិការនៃ ក.ជ.ក. លើកឡើងថា គោលនយោបាយជាតិនេះ គឺជាគោលនយោបាយមួយដែលបានបង្ហាញយ៉ាងច្បាស់ពីឆន្ទៈរបស់រាជរដ្ឋាភិបាលក្នុងការលើកកម្ពស់សិទ្ធិ និងការការពារកុមារ។
លោកស្រីថ្លែងថា៖ «គោលនយោបាយនេះបានបង្ហាញនូវការដោះស្រាយបញ្ហាកុមារនៅកម្ពុជាក្នុងនាមជាប្រទេសហត្ថលេខីនៃអនុសញ្ញាស្តីពីសិទ្ធិកុមារ ជាពិសេសគោលនយោបាយនេះជាស្នាដៃតាក់តែងចងក្រងរួមគ្នាដោយក្រុមការងារអន្តរក្រសួងនៃគណៈកម្មការការពារកុមារថ្នាក់ជាតិ»។
សេចក្ដីប្រកាសពត៌មានរួមស្ដីពីគោលនយោបាយជាតិស្តីពីប្រព័ន្ធ កិច្ចការពារកុមារនេះបានបង្ហាញថា ប្រព័ន្ធកិច្ចការពារកុមារគឺជាការប្តេជ្ញាចិត្តខិតខំជាក់ស្តែងរបស់រាជរដ្ឋាភិបាលកម្ពុជាទៅលើការអនុវត្តកិច្ចការពារកុមារ ដែលមានលក្ខណៈជាប្រព័ន្ធនៅកម្ពុជា។
សេចក្ដីប្រកាសរួមនេះថា ប្រព័ន្ធកិច្ចការពារកុមារ គឺជាបណ្តុំនៃវិធានបង្កើតឡើងក្នុងគោលបំណងជំរុញ និងលើកកម្ពស់ការការពារកុមារពីការរំលោភបំពាន និងការកេងប្រវ័ញ្ចគ្រប់រូបភាព។ វិធានទាំងនេះរួមមាន១. ក្របខ័ណ្ឌច្បាប់ និងគោលនយោបាយ ២. ការផ្តល់ជំនួយ និងសេវា ៣. ធនធានមនុស្ស និងហិរញ្ញវត្ថុ និង ៤. ការផ្លាស់ប្តូរឥរិយាបថសង្គមក្នុងការប្រព្រឹត្តទៅលើកុមារ។ វិធានទាំងនេះត្រូវឱ្យមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសវិស័យសុខុមាលភាពសង្គម អប់រំសុខភាព សន្តិសុខ និងយុត្តិធម៌ក្នុងការគាំទ្រដល់ការបង្ការទប់ស្កាត់ និងឆ្លើយតប ដើម្បីការពារកុមារពីហានិភ័យផ្សេងៗ។
លោកស្រី Gwynneth Wong នាយិកាប្រចាំប្រទេសនៃអង្គការភ្លែនអន្តរជាតិកម្ពុជា និងលោក Prashant Verma នាយកប្រចាំប្រទេសនៃអង្គការឆាលហ្វាន់ កម្ពុជាបានថ្លែងថា ដើម្បីឈានមកដល់ថ្ងៃនេះ ដំណើរការនៃការផ្តួចផ្តើមគំនិត និងចងក្រងគោលនយោបាយជាតិស្តីពីប្រព័ន្ធកិច្ចការពារកុមារនេះបានចាប់ផ្តើមតាំងពី ៣ ឆ្នាំមុនពោលគឺក្នុងឆ្នាំ ២០១៧។
ក្នុងសេចក្តីថ្លែងការណ៍រួម នាយិកាអង្គការភ្លែន និងនាយកអង្គការឆាលហ្វាន់បានបញ្ជាក់ថា៖ «អង្គការភ្លែនអន្តរជាតិកម្ពុជា អង្គការឆាលហ្វាន់ និងដៃគូទាំងអស់ពិតជាមានសេចក្តីសោមនស្សរីករាយដែលបានចូលរួមគាំទ្រក្នុងដំណើរការនៃការចងក្រងគោលនយោបាយជាតិដ៏មានសារៈសំខាន់នេះ ក៏ដូចជាបានចូលរួមផ្សព្វផ្សាយ និងដាក់ឱ្យប្រើប្រាស់ដើម្បីធានាឱ្យកុមារគ្រប់រូបទទួលបាននូវសិទ្ធិស្មើៗគ្នាដើម្បីសមធម៌ និងយុត្តិធម៌សង្គម»៕