ភ្នំពេញ: អគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ. អ.ច.) នៅថ្ងៃសុក្រនេះនឹងប្រកាសឲ្យប្រើប្រាស់ជាផ្លូវការនូវរបាយការណ៍ចំនួន ២ ជាលើកដំបូងទាក់ទងនឹងការប្រែប្រួលអាកាសធាតុ និងហានិភ័យវិនិយោគក្នុងវិស័យថាមពលកកើតឡើងវិញដែលអាចនឹងធ្វើឲ្យប៉ះពាល់ដល់វិស័យសេដ្ឋកិច្ចកម្ពុជា ខណៈដែលកម្ពុជាកំពុងរងគ្រោះបំផុតដោយសារការប្រែប្រួលអាកាសធាតុ។
តាមសេចក្ដីជូនដំណឹងរបស់ ក.ជ.អ.ច បានឲ្យដឹងពីម្សិលមិញថា របាយការណ៍បានធ្វើឡើងដោយអគ្គលេខាធិការដ្ឋាន ក.ជ.អ.ច សហការជាមួយក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន និងក្រសួងរ៉ែ និងថាមពលដោយមានការគាំទ្រពីកម្មវិធីសម្ព័ន្ធភាពប្រែប្រួលអាកាសធាតុកម្ពុជា ដំណាក់កាលទី ៣ (ccCA-3) និងកម្មវិធីអភិវឌ្ឍន៍សហប្រជាជាតិ (UNDP) ដែលនឹងប្រកាសនៅថ្ងៃសុក្រនេះនៅសណ្ឋាគារ សូហ្វីតែល ភូគីត្រា រាជធានីភ្នំពេញ។
សេចក្ដីជូនដំណឹងបន្តថារបាយការណ៍ទាំង ២ នេះរួមមាន ទី១- ដំណោះស្រាយផលប៉ះពាល់ពីការប្រែប្រួលអាកាសធាតុលើកំណើនសេដ្ឋកិច្ចក្នុងប្រទេស កម្ពុជា និងទី២- ការកាត់បន្ថយហានិភ័យវិនិយោគក្នុងវិស័យថាមពលកកើតឡើងវិញនៅប្រទេស កម្ពុជា។
«របាយការណ៍ទាំង ២ នេះធ្វើឡើងក្នុងគោលដៅចូលរួមកាត់បន្ថយហានិភ័យ និងជួយសម្របសម្រួលនូវបរិយាកាសអំណោយផលសម្រាប់វិនិយោគិន វិស័យឯកជន ដែលមានបំណងវិនិយោគលើវិធានការផ្សុំាទៅនឹងការប្រែប្រួលអាកាសធាតុ និងលើថាមពលពន្លឺព្រះអាទិត្យនៅកម្ពុជា»។
តាមរបាយការណ៍សង្ខេបនៃដំណោះស្រាយផលប៉ះពាល់ពីការប្រែប្រួលអាកាសធាតុលើកំណើនសេដ្ឋកិច្ចក្នុងប្រទេសកម្ពុជាដែលគ្រោងនឹងប្រកាសនៅថ្ងៃនេះលើកឡើងថា កម្ពុជាបានដើរតួនាទីនាំមុខលើឆាកអន្តរជាតិក្នុងការឆ្លើយតបនឹងការប្រែប្រួលអាកាសធាតុ ដោយសារកម្ពុជាស្ថិតក្នុងចំណោមបណ្តាប្រទេសដំបូងដែលអនុវត្តកម្មវិធីត្រួតពិនិត្យស្ថាប័ន និងចំណាយសាធារណៈចំពោះការប្រែប្រួលអាកាសធាតុ (CPEIR) រួមនឹងកម្មវិធីជាច្រើនទៀតដែលទាក់ទងនឹងការទប់ស្កាត់ការប្រែប្រួលអាកាសធាតុ។
សេចក្តីសង្ខេបបញ្ជាក់ថា៖ «ការឆ្លើយតបរបស់រដ្ឋាភិបាលចំពោះការប្រែប្រួលអាកាសធាតុគឺជាផែនការយុទ្ធសាស្ត្រឆ្លើយតបនឹងការប្រែប្រួលអាកាសធាតុកម្ពុជា (CCCSP) និងផែនការសកម្មភាពប្រែប្រួលអាកាសធាតុ (CCAP) តាមវិស័យដែលផែនការទាំង ២ នេះធ្វើឡើងក្នុងឆ្នាំ ២០១៣ និងការចូលរួមចំណែកថ្នាក់ជាតិ (NDC) ក្នុងការអនុវត្តកិច្ចព្រមព្រៀងទីក្រុងប៉ារីសស្ដីពីការប្រែប្រួលអាកាសធាតុក្នុងឆ្នាំ ២០១៥។ ផែនការទាំងនេះកំណត់អាទិភាពជាច្រើនដែលផ្ដោតលើវិស័យមួយផ្នែកធំដែលប៉ះពាល់ដោយសារការប្រែប្រួលអាកាសធាតុ»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងពីម្សិលមិញថា របាយការណ៍ទាំង ២ នេះបានដាក់ជូនរាជរដ្ឋាភិបាលកម្ពុជា និងដៃគូអភិវឌ្ឍន៍នូវអនុសាសន៍គោលនយោបាយសម្រាប់គាំទ្រការវិនិយោគលើការផ្សុំាទៅនឹងការប្រែប្រួលអាកាសធាតុដែលអាចកាត់បន្ថយផលប៉ះពាល់អវិជ្ជមានលើសេដ្ឋកិច្ចកម្ពុជា។
ស្របពេលជាមួយគ្នានេះលោកបន្តថា របាយការណ៍ DREI បានបង្ហាញពីបណ្តាវិធានការដែលមានប្រសិទ្ធភាពចំណាយសម្រាប់ជំរុញឱកាសវិនិយោគ ក្នុងអនុវិស័យថាមពលពន្លឺព្រះអាទិត្យទាំង ៤ រួមមាន ទី១- ថាមពលពន្លឺព្រះអាទិត្យខ្នាតធំ ទី២- ថាមពលពន្លឺព្រះអាទិត្យបំពាក់នៅលើដំបូល ទី៣- ប្រព័ន្ធបណ្តាញខ្នាតតូចថាមពលពន្លឺព្រះអាទិត្យ និងអាគុយ និងទី៤- ប្រព័ន្ធពន្លឺព្រះអាទិត្យដែលបំពាក់តាមផ្ទះ។
លោកបញ្ជាក់ថា៖ «របាយការណ៍នេះក៏បានរកឃើញផងដែរថាការវិនិយោគលើថាមពលពន្លឺព្រះអាទិត្យត្រឹមតែជាង ៧០០ MW អាចកាត់បន្ថយការបញ្ចេញឧស្ម័នកាបូនិកប្រមាណ ៨,៧ លានតោន ដោយផ្ទាល់ត្រឹមឆ្នាំ ២០៤៥»។
របាយការណ៍សង្ខេបនៃដំណោះស្រាយផលប៉ះពាល់ពីការប្រែប្រួលអាកាសធាតុលើកំណើនសេដ្ឋកិច្ចក្នុងប្រទេសកម្ពុជានេះក៏បានលើកឡើងដែរថា ការកើនឡើងកម្តៅសីតុណ្ហភាពនៅលើពិភពលោកនឹងកាត់បន្ថយផលិតភាពលើវិស័យកសិកម្ម ជលផល និងរុក្ខាប្រមាញ់ ព្រមទាំងកាត់បន្ថយផលិតភាពកម្លាំងពលកម្មលើវិស័យជាច្រើនថែមទៀត។
បន្ថែមពីនេះសេចក្តីសង្ខេបដដែលបន្តថា ការប្រែប្រួលរបត់ និងកម្ពស់ទឹកភ្លៀងនឹងបណ្តាលឲ្យកើតមានគ្រោះទឹកជំនន់ គ្រោះរាំងស្ងួត និងខ្យល់ព្យុះកាន់តែច្រើនដែលនឹងកាត់បន្ថយនូវផលិតភាពធនធាន ជាពិសេសលើវិស័យកសិកម្ម និងជលផលហើយនឹងបង្កើនការខូចខាតដោយសារតែព្រឹត្តិការណ៍អាកាសធាតុធ្ងន់ធ្ងរដែលប៉ះពាល់ដល់ផ្លូវថ្នល់ប្រភពផ្គត់ផ្គង់ទឹក និងហេដ្ឋារចនាសម្ព័ន្ធដទៃផ្សេងទៀត។
ប្រសិនបើគ្មានការប្រែប្រួលអាកាសធាតុ ម៉ូដែល CEGIM ព្យាករថា GDP ពិតនឹងកើនឡើងក្នុងអត្រាជាមធ្យម ៦,៩ ភាគរយ ក្នុង ១ ឆ្នាំ ពីឆ្នាំ ២០១៧ ដល់ ២០៥០ ដែលធ្វើឲ្យកម្ពុជាសម្រេចបានឋានៈជាប្រទេសចំណូលមធ្យមខាងលើ (UMIC) នៅឆ្នាំ ២០៣៥ ប៉ុន្តែការប្រែប្រួលអាកាសធាតុនឹងកាត់បន្ថយអត្រាកំណើន GDP របស់កម្ពុជាបើគ្មានវិធានការទប់ស្កាត់៕