.jpg)
យិន ម៉ាណា ពេលនាំមកសាកសួរនៅការិយាល័យនគរបាលចរាចរណ៍ភ្នំពេញ ក្រោយបង្កហេតុ។ សហការី
ភ្នំពេញៈ ជនបង្កគ្រោះថ្នាក់ចរាចរណ៍បណ្ដាលឱ្យនិស្សិតស្រីម្នាក់ស្លាប់កាលពីខែមីនា ឈ្មោះ យិន ឃុនម៉ី ហៅ យិន ម៉ាណា ត្រូវបានដោះលែងពីពន្ធនាគារកាលពីល្ងាចថ្ងៃចន្ទ ក្រោយពីតុលាការរាជធានីភ្នំពេញប្រកាសសាលក្រមកាលពីថ្ងៃទី ១៧ ខែ ឧសភា ដោយសម្រេចឱ្យជាប់ពន្ធនាគារ ១ ឆ្នាំ។
បើទោះបីជា តុលាការសម្រេចឱ្យជាប់ពន្ធនាគារ ១ ឆ្នាំ ក៏ដោយ ប៉ុន្តែអនុវត្តទោសក្នុងពន្ធនាគារតែ ២ ខែប៉ុណ្ណោះ។ យុវតី យិន ម៉ាណា ត្រូវបានតុលាការអនុវត្តទោសឃុំខ្លួនកាលថ្ងៃទី ២៩ ខែមីនាមក។ ដូច្នេះ បើគិតមកដល់ថ្ងៃពុធ ទី ២៩ ខែឧសភានេះ នាងបានជាប់ពន្ធនាគាររយៈពេល ២ ខែល្មម ប៉ុន្ដែនាងត្រូវបានដោះលែងចេញពីពន្ធនាគារតាំងពីថ្ងៃចន្ទ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារ មិនធ្វើអត្ថាធិប្បាយច្រើនទេ ចំពោះការដោះលែងនេះ ដោយលោកគ្រាន់តែបញ្ជាក់ប្រាប់ភ្នំពេញប៉ុស្ដិ៍ ពីម្សិលមិញថា៖ «កញ្ញាម៉ាណាត្រូវបានដោះលែងចេញពីពន្ធនាគារយើងហើយកាលពីល្ងាចថ្ងៃទី ២៧»។
លោក សុខ អួង មេធាវីការពារក្ដីឱ្យជនរងគ្រោះ ឌុំ រីដា បានប្រាប់ ឱ្យដឹងដែរថា ក្នុងនាមលោកជាមេធាវីការពារក្ដីឱ្យជនរងគ្រោះលោកគោរពតាមឆន្ទៈរបស់ ជនរងគ្រោះ។
លោកបានបញ្ជាក់ថា៖ «ក្នុងរឿងនេះកូនក្ដីខ្ញុំបានដាក់ពាក្យបណ្ដឹងកាលពីថ្ងៃទី ២៩ ខែ មីនា ហើយ យិន ម៉ាណា ក៏ត្រូវបានតុលាការបញ្ជាឱ្យឃុំខ្លួនក្នុងថ្ងៃទី ២៩ ខែមីនាដែរ»។
លោកបានបន្ថែមថា៖ «បន្ទាប់មកមានការចរចាគ្នា កូនក្ដីខ្ញុំក៏បានទទួលសំណងរដ្ឋប្បវេណីហើយគាត់ក៏បានដកពាក្យបណ្ដឹងនៅថ្ងៃទី ៣ ខែ មេសា។ មានន័យថា គាត់ឈប់ទាមទារសំណងរដ្ឋប្បវេណីទៀតហើយ។ ចំពោះបណ្ដឹងអាជ្ញា គឺស្ថាប័នតុលាការលោកជាអ្នកសម្រេច»។
លោក សុខ អួង បានលើកឡើងទៀតថា រហូតមកដល់ថ្ងៃទី ១៧ ខែឧសភានេះ តុលាការបានសម្រេចប្រកាសសាលក្រមផ្ដន្ទាទោស យិន ម៉ាណា ១ ឆ្នាំ ព្យួរសាកល្បង ៣ ឆ្នាំ អនុវត្ដពន្ធនាគារ ២ ខែ និងហាមឃាត់មិនឱ្យកាន់ចង្កូតយានយន្ដ។
ទោះយ៉ាងណា លោក សុខ អួង មិនបកស្រាយអំពីការព្យួរសាកល្បង ៣ ឆ្នាំនោះទេ ដោយលោករុញឲ្យសួរ ទៅតុលាការដែលជាអ្នកសម្រេច។ ប៉ុន្តែអ្នកអ្នកនាំពាក្យសាលាដំបូងរាជធានីភ្នំុពេញ លោក លី សុផានណា មិនអាចទាក់ទងសុំការបញ្ជាក់បានទេ ពីម្សិលមិញ។
ទាក់ទងជុំវិញការហាមឃាត់មិនឱ្យកាន់ចង្កូតយានយន្ដនេះលោកបានបញ្ជាក់ថា ការហាមឃាត់នេះមិនមានរយៈពេលទេ ក្នុងសាលក្រមបានប្រកាសហាមឃាត់តែម្ដង។
ជុំវិញសាលក្រមសម្រេច ក៏ដូចជាការដោះលែងជនបង្កគ្រោះថ្នាក់ចរាចរណ៍រហូតដល់បាត់បង់ជីវិតនេះ លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានលើកឡើងថា នៅក្នុងនីតិវិធីផ្លូវច្បាប់ចៅក្រមគឺមានសិទ្ធិក្នុងការសម្រេចទោសក្នុងរឿងនេះ។
លោកបន្ដថា៖ «រឿងនេះវាជាឆន្ទានុសិទ្ធិរបស់ចៅក្រម ប៉ុន្ដែអ្វីដែលជាបញ្ហាដែលគេមើលឃើញមកថា កម្ពុជាការអនុវត្ដទៅលើអ្នកដែលមានទឹកប្រាក់ មានឥទ្ធិពល អំណាច ជាដើមនេះ អាចធ្វើការដោះស្រាយបញ្ហាបាន។ ដោយគេមើលឃើញថា បើសិនអ្នកទាំងអស់នោះ ជាជនក្រីក្រពិបាកគេចផុតពីការអនុវត្ដច្បាប់ក្នុងករណីបែបនេះណាស់»។
ដោយចង់ឲ្យមានភាពស្មើគ្នានៅចំពោះមុខច្បាប់ លោក ស៊ឹង សែនករុណា ចង់បានការអនុវត្ដច្បាប់នៅប្រទេសកម្ពុជា ប្រកបដោយតម្លាភាពទាំងអ្នកមាន និងអ្នកក្រ ចៀសវាងការលម្អៀងនាំឱ្យអ្នកមានអំណាច មានប្រាក់មិនគោរពច្បាប់ នៅតែប្រព្រឹត្ដល្មើសផ្សេងៗជាដើម។
នៅពេលសួរថា តើសមាគម (អាដហុក) មានឯកសារអ្វីដែលបង្ហាញថា ការអនុវត្តច្បាប់នៅកម្ពុជាមិនតមា្លភាព ឬមិនស្មើភាពគ្នានោះ លោក ស៊ឹង សែនករុណា ប្រាប់ថា មេធាវីប្រចាំសមាគម អាដហុក មានឯកសារដែលបង្ហាញពីការអនុវត្តច្បាប់មិនមានលក្ខណៈស្មើភាពនេះ។ ប៉ុន្តែលោកមិនអាចផ្តល់ឲ្យនូវឯកសារទាំងនោះបានទេ ដោយសារពេលវេលាយប់ ម្យ៉ាងលោកកំពុងជាប់បំពេញបេសកកម្មនៅខេត្ត។
លោក លី សុផាន់ណា អ្នកនាំពាក្យសាលាដំបូងរាជធានីភ្នំពេញ បដិសេធធ្វើការបកស្រាយចំពោះការដោះលែងនេះ ដោយបញ្ជាក់ថា ជាប់ប្រជុំ ដោយឲ្យផ្ញើសំណួរតាមបណ្ដាញសារឆ្លើយឆ្លងវិញ។ ប៉ុន្ដែរហូតដល់ល្ងាចថ្ងៃអង្គារម្សិលមិញ ភ្នំពេញប៉ុស្ដិ៍នៅមិនទាន់ទទួលបានសារឆ្លើយតបនៅឡើយទេ។
គួរបញ្ជាក់ថា កាលពីថ្ងៃទី ២៦ មីនា ឆ្នាំ ២០១៩ កញ្ញា យិន ម៉ាណា បានបើករថយន្តម៉ាក Rang Rover ស្លាកលេខភ្នំពេញ 2AF-7777 យ៉ាងលឿន ទៅបុកនិស្សិតស្រីឈ្មោះ ឌុំ រីដា នៅលើផ្លូវលេខ ៣១៧ កែងនឹងផ្លូវលេខ ៥២៨ ក្នុងសង្កាត់បឹងកក់ទី ១ ខណ្ឌទួលគោក ខណៈជនរងគ្រោះកំពុងជិះម៉ូតូបណ្តាលឱ្យស្លាប់ភ្លាមៗនៅកន្លែងកើតហេតុ៕
