.jpg)
កណ្ដុរហិតមីនរបស់អង្គភាពស៊ីម៉ាក់ និងអង្គការAPOPO បែលហ្ស៊ិកឈ្មោះ ម៉ាហ្គាវ៉ា បានទទួលមេដាយមាសការងារពីអង្គការសប្បុរសធម៌សត្វព្រៃនៃប្រទេសអង់គ្លេស (PDSA)។ រូបថត ហ្វេសប៊ុក Heng Ratana
ភ្នំពេញ: កណ្តុរហិតមីនរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) និងអង្គការ APOPO នៃប្រទេសបែលហ្ស៊ិកឈ្មោះ ម៉ាហ្គាវ៉ា (Magawa) បានទទួលមេដាយមាសពីអង្គការសប្បុរសធម៌សត្វព្រៃ (PDSA) នៃប្រទេសអង់គ្លេស បន្ទាប់ពីបានសាងស្នាដៃរុករកគ្រាប់មីន និងគ្រាប់យុទ្ធភណ្ឌមិនទាន់ផ្ទុះសរុប ៦៧ គ្រាប់នៅខេត្តសៀមរាប និងព្រះវិហារ។
លោក ហេង រតនា អគ្គនាយក CMAC ពីម្សិលមិញបានបដិសេធធ្វើអត្ថាធិប្បាយជុំវិញករណីនេះ ប៉ុន្ដែលោកបង្ហោះលើហ្វេសប៊ុកថា ម៉ាហ្គាវ៉ា មានស្នាដៃរុករកឃើញគ្រាប់មីនចំនួន ៣៩ គ្រាប់ និងគ្រាប់យុទ្ធភណ្ឌមិនទាន់ផ្ទុះចំនួន ២៨ គ្រាប់នៅទិសខេត្តសៀមរាប និងខេត្តព្រះវិហារ។ នេះជាមេដាយមាសលើកដំបូងដែលគេផ្តល់ឱ្យសត្វដែលលះបង់ខ្ពស់ដើម្បីភារកិច្ច។
លោក រតនា បញ្ជាក់ថា៖ «សូមជម្រាបថា កម្ពុជាមិនមែនត្រឹមតែល្បីល្បាញក្នុងការប្រើប្រាស់សត្វកណ្តុរសម្រាប់វិស័យដោះមីនទេ សត្វសុនខ (ឆ្កែ) ហិតមីន ក៏កម្ពុជាជាប្រទេសឈានមុខគេលើពិភពលោកផងដែរ»។
លោក Michael Heiman នាយកគ្រប់គ្រងកម្មវិធីនៃអង្គការ APOPO ប្រចាំកម្ពុជាថ្លែងពីម្សិលមិញថា ម៉ាហ្គាវ៉ា គឺជាកណ្ដុរមួយក្នុងចំណោមកណ្តុរហិតរាវមីនទាំង ៤៣ ក្បាលរបស់ APOPO ក្នុងប្រទេសកម្ពុជាដោយស្វែងរកគ្រាប់មីនក្នុងភាពជាដៃគូជាមួយ CMAC។
ម៉ាហ្គាវ៉ា បានមកដល់កម្ពុជាកាលពីឆ្នាំ ២០១៦ មកពីប្រទេសតង់ហ្សានី ហើយចាប់តាំងពីពេលនោះមកវាបានធ្វើការនៅខេត្តសៀមរាប ឧត្តរមានជ័យ និងព្រះវិហារ។ វានឹងមានអាយុ ៦ ឆ្នាំបើគិតត្រឹមខែវិច្ឆិកា។ វាជាសត្វឧស្សាហ៍ព្យាយាម និងជាសត្វកណ្តុរដែលមានការប្តេជ្ញាចិត្តខ្ពស់។
ម៉ាហ្គាវ៉ា គឺជាសត្វកណ្តុរយក្សអាហ្វ្រិកដែលចាប់កំណើតនៅរដ្ឋតង់ហ្សានី (Tanzania) ក្នុងខែវិច្ឆិកាឆ្នាំ ២០១៤ ហើយវាត្រូវបានក្រុមអ្នកជំនាញបណ្តុះបណ្តាលសត្វកណ្តុរ APOPO នៅតង់ហ្សានី បង្រៀនពីរបៀបហិតរកក្លិននៃគ្រឿងផ្ទុះដោយប្រើច្រមុះរបស់វា។
លោក Jonh Smith នាយកអង្គការ PDSA បានថ្លែងក្នុងវីដេអូខ្លីមួយថា រហូតមកដល់ពេលនេះ ម៉ាហ្គាវ៉ា បានរកឃើញគ្រាប់មីន និងគ្រាប់យុទ្ធភណ្ឌមិនទាន់ផ្ទុះចំនួន ៦៧ គ្រាប់ដែលធ្វើឱ្យវាក្លាយជា HeroRAT ដែលទទួលបានជោគជ័យបំផុតក្នុងកម្មវិធីសប្បុរសធម៌ និងជាបេក្ខជនដែលស័ក្តិសមជាងគេសម្រាប់មេដាយមាសរបស់ PDSA។
លោកថា ក្នុងអំឡុងពេលអាជីពរបស់វា ម៉ាហ្គាវ៉ា បានជួយបោសសម្អាតដីជាង ១៤១ ០០០ ម៉ែត្រការ៉េ (ស្មើនឹងទីលានបាល់ទាត់ចំនួន ២០ ហិកតា) ដែលជាផ្នែកមួយធ្វើឱ្យមានសុវត្ថិភាពដល់ប្រជាជនក្នុងតំបន់៕
វីដេអូ៖
