ភ្នំពេញ៖ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មបានចុះបង្រ្កាបទីតាំងស្តុកទុកអាល់កុលក្លែងក្លាយ ឬមេតាណុលប្រមាណជាង ១២ តោន នៅរាជធានីភ្នំពេញ ហើយស្ថាប័ននេះអំពាវនាវដល់អ្នកប្រើប្រាស់ឱ្យមានការប្រុងប្រយ័ត្នមុនទិញអាល់កុលប្រើប្រាស់។
អគ្គនាយកដ្ឋាន ក.ប.ប បានឱ្យដឹងនៅថ្ងៃនេះថា ការចុះបង្ក្រាបទីតាំងអាល់កុលក្លែងក្លាយ គឺធ្វើឡើងនៅថ្ងៃទី ១៣ ខែឧសភា បន្ទាប់ពីមន្រ្តីជំនាញបានធ្វើការសិក្សាស្រាវជ្រាវយ៉ាងល្អិតល្អន់។
ក.ប.ប បន្តថា៖ «បន្ទាប់ពីបានស្រាវជ្រាវ ស៊ើបអង្កេតរកទីតាំងភូមិសាស្ត្រដែលកំពុងចរាចរ និងស្តុកទុកអាល់កុលក្លែងក្លាយបានច្បាស់លាស់នៅល្ងាចថ្ងៃទី ១៣ ខែឧសភានេះ មន្រ្តីអគ្គនាយកដ្ឋាន ក.ប.ប ដោយមានការឯកភាពពីលោកព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យ និងឃាត់ទុកបណ្តោះអាសន្នអាល់កុលក្លែងក្លាយ ឬមេតាណុលចំនួន ១២ ៣៦០ លីត្រ»។
ទីតាំងស្តុកទុកអាល់កុលក្លែងក្លាយនេះ ស្ថិតនៅក្នុងភូមិសាស្រ្តខណ្ឌបឹងកេងកង រាជធានីភ្នំពេញ។
ទន្ទឹមនេះដែរ អគ្គនាយកដ្ឋាន ក.ប.ប អំពាវនាវដល់អ្នកប្រើប្រាស់មានការប្រុងប្រយ័ត្នក៏ដូចជា អាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមកុំយកសារធាតុមេតាណុលបន្លំជាអាល់កុលលក់ជូនប្រជាពលរដ្ឋដោយចាត់ទុកថា សកម្មភាពនេះមិនត្រឹមតែមិនអាចទប់ស្កាត់ការចម្លងមេរោគ ឬបង្កផលប៉ះពាល់ដល់សុខភាពអ្នកប្រើប៉ុណ្ណោះទេ ថែមទាំងប្រឈមចំពោះមុខច្បាប់ដល់ខ្លួនថែមទៀតផង។
ក.ប.ប បញ្ជាក់ថា៖ «សូមបងប្អូនប្រជាពលរដ្ឋដែលជាអ្នកប្រើប្រាស់ទាំងអស់ប្រុងប្រយ័ត្នមុនទិញអាល់កុល ឬជែល យកមកប្រើប្រាស់ក្នុងគោលបំណងសម្លាប់មេរោគ សូមពិនិត្យ និងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់»។
សូមជម្រាបថា កាលពីថ្ងៃទី ១១ ខែ ឧសភា ឆ្នាំ ២០២១ មន្ត្រីអគ្គនាយកដ្ឋាន ក.ប.ប បាននាំយកអាល់កុលក្លែងក្លាយ ឬមេតាណុលប្រមាណជិត ១២ តោន ទៅបំផ្លាញចោលនៅទីលានចាក់សំរាមដែលស្ថិតនៅក្នុងខណ្ឌដង្កោ រាជធានីភ្នំពេញ។
អគ្គនាយកដ្ឋាន ក.ប.ប បានពន្យល់ថា មេតាណុល គឺសារធាតុគីមី ដែលគេច្រើនប្រើធ្វើជាសារធាតុសម្រាប់ប្រើប្រាស់ក្នុងវិស័យឧស្សាហកម្ម ឬសំណង់។
សារធាតុមេតាណុលមិនមានប្រសិទ្ធភាពក្នុងការសម្លាប់មេរោគកូវីដ ១៩ នោះទេ មិនតែប៉ុណ្ណោះការប្រើមេតាណុលសម្រាប់លាងដៃសម្រាប់សម្លាប់មេរោគកូវីដ ១៩ អាចនឹងបណ្តាលឱ្យប៉ះពាល់ដល់សុខភាពរបស់អ្នកប្រើ ដូចជាបណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬអាចបណ្តាលឱ្យស្លាប់បានប្រសិនបើយកទៅលាយជាមួយស្រាហើយបរិភោគលើសកម្រិត។
ម្យ៉ាងទៀតប្រសិនបើមានករណីសង្ស័យជាយថាហេតុពាក់ព័ន្ធនឹងគុណភាពអាល់កុល ឬមានព័ត៌មានពីការស្តុកទុកការចរាចរ ឬចែកចាយអាល់កុលក្លែងក្លាយសូមផ្តល់ព័ត៌មានមកអគ្គនាយកដ្ឋាន ក.ប.ប តាមរយៈលេខទូរស័ព្ទ 023 231 856/092 830 856 ផេកហ្វេសប៊ុកផ្លូវការរបស់អគ្គនាយកដ្ឋាន ក.ប.ប www.facebook.com/ccfkh/ ឬតាមរយៈគេហទំព័រ www.ccfdg.gov.kh/៕