ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្មអំពាវនាវដល់អាជីវករ ពាណិជ្ជករទូទាំងព្រះរាជាណាចក្រកម្ពុជា បញ្ឈប់ជាបន្ទាន់ការចរាចរ ចែកចាយ លក់សារធាតុមេតាណុលក្លែងបន្លំជា អេតាណុល (អាល់កុលក្លែងក្លាយ) សម្រាប់សម្លាប់មេរោគកូវីដ ១៩។
លោក ផាន អូន អគ្គនាយកនៃអគ្គនាយកដ្ឋាន «ក.ប.ប.» នៃក្រសួងពាណិជ្ជកម្មបានប្រាប់ ភ្នំពេញ ប៉ុស្ដិ៍ថា ដោយយោងលើសភាពការណ៍នៃការរីករាលដាលនៃជំងឺកូវីដ ១៩ «សហគមន៍ ២០ កុម្ភៈ» នៅមិនទាន់ធូរស្បើយ នាំឱ្យតម្រូវការនៃការប្រើប្រាស់អាល់កុល និងជែលសម្លាប់មេរោគ មានការកើនឡើងខ្ពស់ ជាហេតុនាំឱ្យមានបុគ្គលឆ្លៀតឱកាសមួយចំនួនតូច បានយកសារធាតុមេតាណុល (Methanol) មកក្លែងបន្លំជាអេតាណុល (Ethanol) សម្រាប់សម្លាប់មេរោគ ឬធ្វើជាសារធាតុផ្សំសម្រាប់ផលិតជែលសម្លាប់មេរោគ។
លោកបានថ្លែងថា កន្លងមកអគ្គនាយកដ្ឋាន ក.ប.ប. បានដាក់ចេញនូវគោលការណ៍ណែនាំដល់បណ្តាសាខា ក.ប.ប. រាជធានី ខេត្ត ឱ្យអនុវត្តសកម្មភាពឃ្លាំពិនិត្យជាប្រចាំនៅតាមបណ្តាគោលដៅរួមមាន ឱសថស្ថាន ផ្សារទំនើប ឃ្លាំងស្តុក និងមធ្យោបាយដឹកជញ្ជូនដែលសង្ស័យមានលក់ ស្តុកទុក ឬដឹកជញ្ជូន សារធាតុមេតាណុលក្នុងចេតនាធ្វើអាជីវកម្មទុច្ចរិត។
លោកបន្តថា៖ «ជាលទ្ធផល ត្រឹមតែរយៈពេល ៣ ថ្ងៃ ដើមខែមេសា ឆ្នាំ ២០២១ កន្លងទៅនេះ មន្រ្តីជំនាញអគ្គនាយកដ្ឋាន ក.ប.ប. បានស្រាវជ្រាវរកឃើញការចរាចរលក់សារធាតុមេតាណុល បន្លំជាអេតាណុល (អាល់កុល) ចំនួន ៣ ករណី ដែលមាននៅខេត្តរតនគិរី រឹបអូសបានមេតាណុលចំនួន ៥៥៦ លីត្រ ខេត្តបាត់ដំបង រឹបអូសបានមេតាណុលចំនួន ៨៤៦ លីត្រ និងនៅរាជធានីភ្នំពេញ រឹបអូសបានមេតាណុលចំនួន ៨ ២៩០ លីត្រ ដោយបាននិងកំពុងអនុវត្តនីតិវិធីបន្ត ក្រោមកិច្ចសម្របសម្រួលពីលោកព្រះរាជអាជ្ញារងអមសាលាដំបូងរាជធានី-ខេត្តផងដែរ»។
លោក ផាន អូន បញ្ជាក់ថា៖ «អគ្គនាយកដ្ឋាន ក.ប.ប. នឹងបន្តអនុវត្តការងារនេះដូចភ្លៀងរលឹម ដើម្បីការពារសុខុមាលភាពជូនប្រជាពលរដ្ឋដែលជាអ្នកប្រើប្រាស់»។
បើតាមលោក ផាន អូន សារធាតុមេតាណុល គឺជាអាល់កុលពុល គ្មានពណ៌ ដែលមានលក្ខណៈស្រដៀងគ្នាខ្លាំងទៅនឹងអាល់កុលធម្មតា (អេតាណុលអេទីលអាល់កុល) ហើយភាគច្រើនគេប្រើមេតាណុល សម្រាប់ធ្វើជាសារធាតុរំលាយ។
លោកបន្តថា យោងតាមសេចក្តីណែនាំរបស់អង្គការសុខភាពពិភពលោក សារធាតុមេតាណុលមិនត្រូវបានអនុញ្ញាតឱ្យប្រើប្រាស់ជាសារធាតុផ្សំសកម្មនៅក្នុងការផលិតសារធាតុលាងសម្អាតដៃឡើយ ដោយសារធាតុនេះ គឺជាសារធាតុពុល និងមិនមានសមត្ថភាពសម្លាប់មេរោគកូវីដ ១៩ នោះទេ។
ការប្រើប្រាស់សារធាតុមេតាណុលធ្វើជាសារធាតុសម្លាប់មេរោគ មិនត្រឹមតែមិនមានប្រសិទ្ធភាពប៉ុណ្ណោះទេ តែនឹងធ្វើឱ្យប៉ះពាល់ដល់សុខភាព រួមមានរលាកស្បែក រលាកភ្នែក ឈឺក្បាល វិលមុខ ងងុយដេក ច្របូកច្របល់ បាត់បង់ស្មារតី ក្អួត រំខានដល់ការរំលាយអាហារ ស្រវាំងភ្នែក និងអាចបណ្តាលឱ្យស្លាប់បានប្រសិនបើយកទៅលាយជាមួយស្រា ហើយបរិភោគលើសកម្រិត។
លោកបានថ្លែងថា៖ «ជាថ្មីម្តងទៀត អគ្គនាយកដ្ឋាន ក.ប.ប. សូមអំពាវនាវដល់សាធារណជនទាំងអស់ មុននឹងសម្រេចចិត្តជាវអាល់កុល ឬជែល យកមកប្រើប្រាស់ក្នុងគោលបំណងសម្លាប់មេរោគ សូមពិនិត្យ និងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់។ ជាមួយនោះផងដែរ សូមអំពាវនាវដល់អាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមប្រកបរបរអាជីវកម្មប្រកបដោយសុចរិត និងមានការទទួលខុសត្រូវ និងសូមគិតពីសុខុមាលភាពរបស់ប្រជាពលរដ្ឋខ្ពស់ជាងផលចំណេញរបស់ខ្លួន»។
លោកបញ្ជាក់ថា អគ្គនាយកដ្ឋាន ក.ប.ប. នឹងបន្តអនុវត្តនីតិវិធីចុះស៊ើបអង្កេត ត្រួតពិនិត្យ និងបង្ក្រាបរាល់សកម្មភាពក្លែងបន្លំខាងលើ ដោយអនុវត្តវិធានការណ៍ច្បាប់យ៉ាងម៉ឺងម៉ាត់បំផុត ដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ជំងឺកូវីដ ១៩ ក្នុងពេលដ៏ខ្លីខាងមុខ៕