.jpg)
លោក ផាន អូន ក្នុងពេលប្រជុំតាមអនឡាញកាលពីថ្ងៃ ១៧ ឧសភា។ រូបថត អគ្គនាយកដ្ឋាន ក.ប.ប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មណែនាំមន្ដ្រីរបស់ខ្លួននៅរាជធានី-ខេត្ដ ឱ្យផ្សព្វផ្សាយពីនីតិវិធីប្រតិបត្តិស្តង់ដា (SOP) សម្រាប់ត្រួតពិនិត្យទំនិញតាមទីផ្សារ ពិសេសម្ហូបអាហារចាំបាច់ដែលមានប្រភពពីក្រៅប្រទេសដែលមានហានិភ័យ បង្កគ្រោះដល់សុខភាពពលរដ្ឋ។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប កាលពីថ្ងៃទី ១៧ ខែឧសភា បានដឹកនាំកិច្ចប្រជុំតាមប្រព័ន្ធអនឡាញ (Zoom) ជាមួយនឹងមន្ដ្រី ក.ប.ប រាជធានី-ខេត្ដ ដើម្បីពិនិត្យ និងពិភាក្សាលើការពង្រឹងសមត្ថភាពមន្ត្រីអនុវត្តច្បាប់ និងបន្តការអប់រំផ្សព្វផ្សាយ និងលើកកម្ពស់ការយល់ដឹងដល់ពលរដ្ឋដែលជាអ្នកប្រើប្រាស់ និងធុរជនឱ្យបានយល់ដឹងពីខ្លឹមសារច្បាប់ និងលិខិតបទដ្ឋានគតិយុត្តនានា។
លោកបានថ្លែងថា៖ «ក្នុងកិច្ចប្រជុំយើងបានណែនាំដល់មន្ដ្រី «ក.ប.ប» រាជធានី-ខេត្ដ អំពីដំណើរការនៃការរៀបចំនីតិវិធីប្រតិបត្តិស្តង់ដា (SOP) សម្រាប់ត្រួតពិនិត្យទំនិញនៅលើទីផ្សារ និងនីតិវិធីប្រតិបត្តិស្តង់ដាសម្រាប់ត្រួតពិនិត្យទំនិញម្ហូបអាហារចាំបាច់មួយចំនួនដែលមានប្រភពនាំចូលពីក្រៅប្រទេស ដូចជា បន្លែ ត្រី សាច់ និងគ្រឿងឧបភោគបរិភោគដែលមានហានិភ័យក្នុងការបង្កគ្រោះថ្នាក់ដល់ប្រជាពលរដ្ឋ»។
បើតាមលោក ផាន អូន ការរៀបចំនីតិវិធីស្ដង់ដានេះគឺដើម្បីជាមូលដ្ឋានសម្រាប់មន្ត្រីនៅតាមបណ្តាសាខា ក.ប.ប រាជធានី-ខេត្ត ឃ្លាំពិនិត្យនៅទីផ្សារជាប្រចាំ ការកំណត់អត្តសញ្ញាណស៊ើបអង្កេតលើទីផ្សារ ឃ្លាំងស្តុក តាមមធ្យោបាយដឹកជញ្ជូន និងការបន្តតាមដានត្រឡប់ ដើម្បីស្វែងរកប្រភពនៃការនាំចូលសម្រាប់ចាត់ការនីតិវិធីបន្តលើករណីដែលមានការស្នើសុំកិច្ចសហការពីអគ្គនាយកដ្ឋានគយ និងរដ្ឋាករកម្ពុជាជាយថាហេតុណាមួយក្នុងការត្រួតពិនិត្យទំនិញនាំចេញ នាំចូល។
លោកថ្លែងថា៖ «យើងបានត្រៀមរៀបចំនូវផ្ទាំងរូបភាព (Boucher Posters and Flyers) សម្រាប់ការអប់រំផ្សព្វផ្សាយ និងលើកកម្ពស់ការយល់ដឹងលើកម្មវិធីសំខាន់ៗចំនួន ៤ រួមមាន សុវត្ថិភាពម្ហូបអាហារ កិច្ចការការពារអ្នកប្រើប្រាស់ កិច្ចការប្រកួតប្រជែង និងកិច្ចការហាឡាល (អាហារសម្រាប់សាសនិកអ៊ិស្លាម) ដើម្បីឱ្យប្រជាពលរដ្ឋជាអ្នកប្រើប្រាស់ និងធុរជន ស្វែងយល់បន្ថែមពីខ្លឹមសារច្បាប់ និងលិខិតបទដ្ឋានគតិយុត្តអំពើបំពានច្បាប់ និងសិទ្ធិដែលត្រូវបានការពារដោយច្បាប់»។
លោកបន្តថា តាមរយៈផ្ទាំងរូបភាពផ្សព្វផ្សាយនេះ គឺមានសង្ខេបខ្លីៗងាយមើល និងយល់ ដើម្បីឱ្យការអនុវត្តច្បាប់របស់មន្ត្រីនៃអគ្គនាយកដ្ឋាន ក.ប.ប ប្រកបដោយភាពទន់ភ្លន់ តែម៉ឺងម៉ាត់។
អគ្គនាយកដ្ឋាន ក.ប.ប បានឱ្យដឹងដែរថា កន្លងមកមានការបោះពុម្ពផ្ទាំងរូបភាពស្វែងយល់អំពីការជ្រើសរើសម្ហូបអាហារដែលមានសុវត្ថិភាព ខិត្តប័ណ្ណអំពីការយល់ដឹងករណីពុលស្រា និងផលប៉ះពាល់សុខភាព។
ការបោះពុម្ពផ្ទាំងរូបភាពគឺសម្រាប់អប់រំផ្សព្វផ្សាយ និងលើកកម្ពស់ការយល់ដឹងជូនដល់ពលរដ្ឋជាអ្នកប្រើប្រាស់ដើម្បីជាមូលដ្ឋានចំណេះដឹងក្នុងការសម្រេចចិត្តជ្រើសរើសទំនិញដែលមានសុវត្ថិភាព និងគុណភាពយកមកប្រើប្រាស់ និងបរិភាគដើម្បីកាត់បន្ថយហានិភ័យនៃការបង្កគ្រោះថ្នាក់នានា។
ក្នុងនោះមានខិត្តប័ណ្ណស្វែងយល់អំពីអំពើមិនសុចរិតក្នុងធុរកិច្ចពាក់ព័ន្ធនឹងប្រេងឥន្ធនៈក៏ត្រូវបានអគ្គនាយកដ្ឋាន ក.ប.ប ផ្សព្វផ្សាយដល់ម្ចាស់ស្ថានីយ និងដេប៉ូប្រេងឥន្ធនៈនៅទូទាំងរាជធានី-ខេត្តផងដែរ ដើម្បីបានស្វែងយល់ច្បាស់លើអំពើល្មើស និងការពិន័យមុននឹងមន្ត្រីរបស់អគ្គនាយកដ្ឋាន ក.ប.ប ចាប់ផ្តើមអនុវត្តវិធានការច្បាប់។
លោក ផាន អូន បានឱ្យដឹងទៀតថា ក្រៅពីនេះ អគ្គនាយកដ្ឋាន ក.ប.ប ក៏បានដាក់ឱ្យប្រើប្រាស់នីតិវិធីប្រតិបត្តិស្តង់ដាសម្រាប់ត្រួតពិនិត្យផលិតផលប្រេងឥន្ធនៈ និងនីតិវិធីប្រតិបត្តិស្តង់ដា សម្រាប់ត្រួតពិនិត្យអំបិលអ៊ីយ៉ូត ក្នុងស្ថានភាពនៃការរីករាលដាលជំងឺកូវីដ ១៩ មិនទាន់មានការធូរស្បើយ។
លោកបន្តថា អគ្គនាយកដ្ឋាន ក.ប.ប បាន និងត្រៀមរៀបចំវគ្គបណ្តុះបណ្តាលនីតិវិធីទាំង ២ ខាងលើ ដល់មន្ត្រីរបស់សាខា ក.ប.ប រាជធានី ខេត្ត តាមប្រព័ន្ធ Online Zoom នាពេលឆាប់ៗខាងមុខនេះ សម្រាប់ជាមូលដ្ឋានដល់មន្ត្រីជំនាញក្នុងការយកទៅអនុវត្តប្រកបដោយប្រសិទ្ធភាព និងប្រសិទ្ធផល។
លោកបានបញ្ជាក់ថា៖ «មានមន្ត្រីអនុវត្តច្បាប់ និងមាននីតិសម្បទាជាមន្ត្រីនគរបាលយុត្តិធម៌ ដូច្នេះការពង្រឹងសមត្ថភាពរបស់មន្ត្រីក៏ជាកត្តាចាំបាច់ដែលថ្នាក់ដឹកនាំរបស់អគ្គនាយកដ្ឋានតែងតែយកចិត្តទុកដាក់ផងដែរ»៕
