ភ្នំពេញៈ កប៉ាល់ទីពីរឈ្មោះ Ocean Beauty ដែលកំណត់អត្តសញ្ញាណដោយអង្គការមាតាធម្មជាតិ និងបានបង្ហោះឃ្លីបវីដេអូដែលថា នៅមានការលួចនាំខ្សាច់ចេញ ខណៈកំពុងមានបម្រាមនោះ ត្រូវគេរំពឹងថានឹងទៅដល់កោះតៃវ៉ាន់នៅថ្ងៃនេះ ដោយមានផ្ទុកខ្សាច់ប្រភេទស៊ីលីកា(ខ្សាច់ស)ដែលមិនស្ថិតក្នុងបម្រាម។
ទោះជាយ៉ាងណា ក្រសួងរ៉ែនិងថាមពល ពីម្សិលមិញមិនបានបញ្ជាក់ពីការយល់ព្រមឲ្យនាំចេញនេះឬក៏អត់នោះទេ។
លោក Max Liu មន្ត្រីនៅនាយកដ្ឋានអាជីវកម្ម Mingtai Navigation Co. Ltd មានមូលដ្ឋាននៅកោះតៃវ៉ាន់ដែលជាម្ចាស់កប៉ាល់នេះបានថ្លែងថាវាបាននៅកម្ពុជា ចាប់ពីថ្ងៃទី ២៦ ខែ មេសា ដល់ថ្ងៃ ២ ឧសភា ហើយបានដឹកខ្សាច់ស៊ីលីកា ៣៥ ០០០ តោននិងត្រូវគេរំពឹងថានឹងទៅដល់កំពង់ផែ Taicang ក្នុងថ្ងៃនេះ។ ប៉ុន្តែ លោកមិនបានដឹងថា តើខ្សាច់ទាំងនេះបានមកណាឲ្យប្រាកដទេ។
លោកថា ក្រុមហ៊ុនដឹកជញ្ជូននោះឈ្មោះ Global Trend Inc មិនមែនជាផ្នែកនៃក្រុមហ៊ុនពីរដែលទទួលបានអាជ្ញាប័ណ្ណរុករករ៉ែនិងនាំចេញខ្សាច់ស៊ីលីកាពីកម្ពុជាទេ។ ក្រុមហ៊ុនដែលបានអាជ្ញាប័ណ្ឌគឺក្រុមហ៊ុន ម៉ុង ឫទ្ធីគ្រុប និងក្រុមហ៊ុន Silica Services Cambodge។
លោក Liu ថ្លែងថា កប៉ាល់ Ocean Beauty ដែលប្រើទង់ជាតិ ប៉ាណាម៉ា ក៏មានវត្តមាននៅកម្ពុជាដែរ កាលពីខែមីនា ហើយវាបាននាំចេញខ្សាច់ចំណុះប្រហែលគ្នានៅពេលនោះ។
លោកឌឹត ទីណា អ្នកនាំពាក្យក្រសួង រ៉ែ និង ថាមពល មិនបានឆ្លើយសំណួរទាក់ទងនឹងកប៉ាល់ Ocean beauty ទេ ប៉ុន្តែ បានថ្លែងថា៖ «ករណីលើកមុនបង្កឡើងដោយអង្គការមាតាធម្មជាតិទាក់ទងនឹងកប៉ាល់ Deryoung Sunflower។ មិនមែនបន្ទោសទេ ប៉ុន្តែជារឿងអាស្រូវរបស់អង្គការមាតាធម្មជាតិខ្លួនឯង»។
លោកបានសរសេរក្នុងអ៊ីមែលថា៖ «ការចោទប្រកាន់មិនពិតមកលើក្រសួងគួរត្រូវបានចៀសវាង ប្រសិនបើពួកគេ[បានដឹង]ពីភាពខុសគ្នារវាងប្រភេទខ្សាច់ស៊ីលីកានិងខ្សាច់ធម្មតា»។
ក្រសួងគ្រាន់តែបានស៊ើបអង្កេតកប៉ាល់ Deryoung Sunflower ដែលឃើញបង្ហាញខ្លួនក្នុងវីដេអូដែលកំពុងផ្ទុកខ្សាច់សក្បុសប៉ុណ្ណោះ។ ក្រសួងបានរកឃើញថាកប៉ាល់នោះដឹកខ្សាច់ស៊ីលីកា និងថា វាមានលិខិតអនុញ្ញាតនាំចេញត្រឹមត្រូវ ខណៈក្រុមមន្ត្រីតៃវ៉ាន់ក៏បានបញ្ជាក់ដែរថាកប៉ាល់នោះមានផ្ទុកខ្សាច់ស៊ីលីកា៕ NS
