.jpg)
គ្រឿងចក្រកម្ទេចផលិតផលក្លែងក្លាយនាពេលកន្លងមក។ ហេង ជីវ័ន
ភ្នំពេញៈ ឱសថខុសច្បាប់ និងផលិតផលក្លែងក្លាយទូទៅសរុប ៥៤០,៧ តោន នឹងត្រូវក្រសួងមហាផ្ទៃ និងក្រសួងយុត្តិធម៌ដុតបំផ្លាញចោលនៅព្រឹកថ្ងៃទី ៥ វិច្ឆិកា បន្ទាប់ពីសមត្ថកិច្ចនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បង្ក្រាបបានជាបន្តបន្ទាប់។
សេចក្ដីប្រកាសព័ត៌មានរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) នៃក្រសួងមហាផ្ទៃចុះថ្ងៃទី ៣ វិច្ឆិកា ឱ្យដឹងថា លោក កើត រិទ្ធ រដ្ឋមន្ត្រីក្រសួងយុត្តិធម៌នឹងអញ្ជើញដុតកម្ទេចឱសថខុសច្បាប់ចំនួន ៧,៧ តោន និងផលិតផលក្លែងក្លាយ ៥៣៣ តោន សរុបចំនួន ៥៤០,៧ តោន ដែលកម្លាំងសមត្ថកិច្ចចម្រុះនៃគណៈកម្មាធិការបានបង្ក្រាប និងរឹបអូសនាពេលកន្លងមក។
បើតាមសេចក្ដីប្រកាសព័ត៌មានដដែលកម្មវិធីនេះនឹងមានការចូលរួមពីសំណាក់ថ្នាក់ដឹកនាំក្រសួង ស្ថាប័នពាក់ព័ន្ធ អង្គទូតនានា អាជ្ញាធរដែនដី និងវិស័យឯកជនជាច្រើនរូប។ ការកម្ទេចចោលឱសថខុសច្បាប់ និងផលិតផលក្លែងក្លាយនេះត្រូវបានអនុវត្តតាមការបង្គាប់របស់តុលាការ ដែលនឹងប្រារព្ធពិធីនៅថ្ងៃទី ៥ ខែវិច្ឆិកា នៅម៉ោង ៨:៣០ នាទីព្រឹកនៅសង្កាត់ដង្កោ ខណ្ឌដង្កោ រាជធានីភ្នំពេញ។
លោក តាន់ សុខវិជ្ជា ប្រធានលេខាធិការដ្ឋាននៃ គ.ប.ផ.ក. ថ្លែងថា ផលិតផល ទាំងនេះត្រូវបានកម្លាំងសមត្ថកិច្ចចម្រុះនៃគណៈកម្មាធិការ បង្ក្រាប និងរឹបអូសនាពេលកន្លងមក។ លោកថ្លែងថា៖ «យើងបានជូនដំណឹងរួចរាល់ហើយ អ៊ីចឹងព័ត៌មានលម្អិតសូមមើលក្នុងសេចក្ដីជូនដំណឹងនោះទៅ។ ផលិតផលនេះគឺយើងបានបង្ក្រាបជាបន្តបន្ទាប់ ប៉ុន្ដែខ្ញុំមិនអាចបញ្ជាក់ប្រាប់ពីពេលវេលាច្បាស់លាស់ថាតើបង្ក្រាបចាប់ពីពេលណាមកទេ ពោលគឺយើងបង្ក្រាបជាហូរហែមក»។
ប្រធានសមាគមសហព័ន្ធវិនិយោគិនកម្ពុជាលោក ឡី សុភាព និងជាប្រធានសមាគមអ្នកលក់ឱសថកម្ពុជា គាំទ្រចំណាត់ការនេះព្រោះជាការបង្ហាញពីការអនុវត្តច្បាប់របស់អាជ្ញាធរពាក់ព័ន្ធក្នុងការប្រយុទ្ធប្រឆាំងផលិតផលក្លែងក្លាយ។
លោកថា បើអាជីវករ រកស៊ីមិនស្មោះត្រង់ កេងបន្លំគុណភាព បរិមាណ និងតម្លៃហួសហេតុអាចនឹងធ្វើឱ្យអ្នកប្រើប្រាស់ ឬអ្នកទទួលសេវា រងគ្រោះធ្ងន់ធ្ងរបំផុត។
លោក សុភាព ថា៖ «ខ្ញុំគិតថា អាជីវករ ឬអ្នកដែលនាំចូលទំនិញនានានៅលើទីផ្សារ គួរតែនាំគ្នារៀនសូត្រពីច្បាប់ និងក្រមសីលធម៌ឱ្យបានច្រើន ដើម្បីពួកគាត់មានចំណេះដឹង និងយល់ដឹងពីផលប៉ះពាល់នៃការលក់ដូរទំនិញមិនស្របច្បាប់ទំនិញខូចគុណភាពនានាទៅឱ្យអ្នកប្រើប្រាស់»៕
