.jpg)
បុរសកូរ៉េខាងជើងចំនួន ១៦ នាក់ដែលត្រូវបានកំណត់ឲ្យចាកចេញពីប្រទេសកម្ពុជា។ រូបថត សហការី
ភ្នំពេញៈ បុរសជនជាតិកូរ៉េខាងជើងចំនួន ១៦ នាក់ ត្រូវបានកំណត់ឲ្យចាកចេញពីប្រទេសកម្ពុជានៅត្រឹមថ្ងៃទី ១០ ខែ មករា ឆ្នាំ ២០២០ បន្ទាប់ពីកម្លាំងសមត្ថកិច្ចបានផាកពិន័យពួកគេពីបទប្រើប្រាស់ទិដ្ឋាការមិនចំគោលដៅ ក្រោយពីរកឃើញថា ជនជាតិកូរ៉េទាំងនេះកំពុងធ្វើការជាអ្នកបច្ចេកទេស ដែលវិធានការនេះក៏ជាផ្នែកមួយដែលកម្ពុជាត្រូវអនុវត្តទៅតាមបម្រាមរបស់អង្គការសហប្រជាជាតិដែលដាក់ទណ្ឌកម្មលើកូរ៉េខាងជើងផងដែរ។
លោកឧត្តមសេនីយ៍ត្រី ជា គឹមសាន្ត ស្នងការរងខេត្តសៀមរាបបានថ្លែងកាលពីថ្ងៃចន្ទថា នាវេលាម៉ោង ១៥ និង ៣០ នាទីថ្ងៃទី ៣ ខែ មករា ឆ្នាំ ២០២០ កម្លាំងអធិការដ្ឋាននគរបាលក្រុងសៀមរាប ប៉ុស្តិ៍នគរបាលរដ្ឋបាលសង្កាត់ស្វាយដង្គំសហការជាមួយលោក ស្រេង វុទ្ធា ព្រះរាជអាជ្ញារងអមសាលាដំបូងខេត្តសៀមរាបបានចុះត្រួតពិនិត្យរដ្ឋបាលនៅសង្កាត់ ស្វាយដង្គំ ដោយបានរកឃើញបុរសជនជាតិកូរ៉េខាងជើងចំនួន ១៦ នាក់ កំពុងស្នាក់នៅបម្រើការងារ ជាអ្នកបច្ចេកទេសដំឡើងកម្មវិធីកុំព្យូទ័រតាមអនឡាញ។
លោកបានបញ្ជាក់ថា៖ «មានគោលការណ៍នាយឧត្តមសេនីយ៍ អគ្គនាយកអន្តោប្រវេសន៍ធ្វើការផាកពិន័យទៅលើពួកគាត់ដោយសារពួកគាត់ប្រើប្រាស់ទិដ្ឋាការខុសគោលដៅ ដោយពួកគាត់បានប្រើប្រាស់ទិដ្ឋាការចូលមកជាទេសចរតែគាត់ចូលមកធ្វើការងារ និងគ្មានបណ្ណការងារហើយយើងបានធ្វើកិច្ចសន្យាឲ្យគាត់ត្រឡប់ទៅប្រទេសគាត់វិញក្នុងរយៈពេលមិនលើសពី ៧ ថ្ងៃ»។
លោកបន្ថែមថា ជនជាតិកូរ៉េខាងជើងទាំង ១៦ នាក់ បានមកស្នាក់នៅក្នុងប្រទេសកម្ពុជាចាប់តាំងពីខែកញ្ញា ឆ្នាំ ២០១៩ និងចាប់ផ្តើមធ្វើការជាអ្នកសរសេរកម្មវិធីកុំព្យូទ័រ តាមអនឡាញហើយករណីនេះគឺជាលើកទី ២ ហើយដោយកន្លងមកអាជ្ញាធរបានបិទភោជនីយដ្ឋាន ១ កន្លែង និងសារមន្ទីរប៉ាណូរ៉ាម៉ារបស់កូរ៉េខាងជើងនៅក្បែរប្រាសាទអង្គរវត្តដែលបានបើកកាលពីឆ្នាំ ២០១៥។
លោកបញ្ជាក់ថា៖ «កូរ៉េខាងជើងគាត់ត្រូវបានអង្គការសហប្រជាជាតិដាក់ទណ្ឌកម្មទី ១ គឺហាមប្រជាពលរដ្ឋកូរ៉េខាងជើង មិនឲ្យប្រកបអាជីវកម្ម និងការងារក្នុងប្រទេសដែលជាសមាជិកអង្គការសហប្រជាជាតិ ដូច្នេះហើយប្រទេសកម្ពុជាគឺជាសមាជិកអង្គការសហប្រជាជាតិមួយដែរ យើងត្រូវអនុវត្តទៅតាមអង្គការសហប្រជាជាតិ»។
លោក គៀតច័ន្ទថារិទ្ធ អគ្គនាយកអន្តោប្រវេសន៍បានបដិសេធធ្វើអត្ថាធិប្បាយពាក់ព័ន្ធនឹងករណីនេះខណៈលោក ឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ មិនអាចទាក់ទងបាន។
លោក កុយ គួង អ្នកនាំពាក្យក្រសួងការបរទេសក៏បានថ្លែងយ៉ាងខ្លីកាលពីថ្ងៃចន្ទដែរថា ប្រទេសកម្ពុជាគឺជាសមាជិកអង្គការសហប្រជាជាតិដែលត្រូវគោរពតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិទាក់ទងនឹងរឿងកូរ៉េខាងជើង។ យ៉ាងណាក្តីកាលពីពេលកន្លងមកលោក កុយ គួង ធ្លាប់បានថ្លែងប្រាប់កាសែតក្នុងស្រុកគឺនៅមុនពេលបិទអាជីវកម្ម និងសារមន្ទីរកូរ៉េខាងជើងថា មានជនជាតិកូរ៉េខាងជើងប្រមាណ ៣០០ នាក់កំពុងធ្វើការនៅកម្ពុជា។
កន្លងទៅថ្មីៗនេះភោជនីយដ្ឋានចំនួន ៤ របស់កូរ៉េខាងជើងនៅរាជធានីភ្នំពេញ ត្រូវបានបិទស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការ សហប្រជាជាតិ។
មាត្រា ៣៧២ នៃច្បាប់ការងារកម្ពុជាចែងថា ជនណាដែលទទួលឲ្យធ្វើការ ឬរក្សាទុកឲ្យធ្វើការនូវជនបរទេសដែលគ្មានសៀវភៅការងារ អនុញ្ញាតឲ្យប្រកបការងារមានប្រាក់ឈ្នួលក្នុងព្រះរាជាណាចក្រកម្ពុជាត្រូវទទួលទោសពិន័យពីហុកសិបមួយថ្ងៃទៅកៅសិបថ្ងៃនៃប្រាក់ឈ្នួលយោងប្រចាំថ្ងៃ ឬត្រូវផ្ដន្ទាទោសដាក់ពន្ធនាគារ ៦ ថ្ងៃទៅ ១ ខែ។ ក្នុងករណីមិនរាងចាលត្រូវដាក់ពន្ធនាគារពី ១ ខែទៅ ៣ ខែ៕
