ភ្នំពេញៈ ក្រសួងយុតិ្តធម៌កម្ពុជាកំពុងសិក្សា និងប្រមូលព័ត៌មានលម្អិត ដើម្បីជួយដល់ស្ត្រីខ្មែរម្នាក់ក្នុងការប្ដឹងជំទាស់សេចក្ដីសម្រេចរបស់តុលាការដំបូងខេត្តតៃនិញប្រទេសវៀតណាម ដែលកាត់ទោសប្រហារជីវិតនាងពីបទជួញដូរគ្រឿងញៀនឆ្លងដែន។ នេះបើតាមអ្នកនាំពាក្យក្រសួងយុត្តិធម៌បញ្ជាក់ពីម្សិលមិញ។
លោក ជិន ម៉ាលីន អ្នកនាំពាក្យក្រសួងយុត្តិធម៌នៃប្រទេសកម្ពុជា ថ្លែងថា សំណុំរឿងរបស់ស្ត្រីខ្មែរខាងលើមិនទាន់បញ្ចប់នៅត្រឹមនេះឡើយ។ សំណុំរឿងនេះនឹងត្រូវបន្តទៅដំណាក់កាលជម្រះក្ដីនៅថ្នាក់ឧទ្ធរណ៍ជាបន្តទៀត។
លោក ម៉ាលីន ថ្លែងថា៖ «នៅពេលនេះក្រសួងកំពុងតែសិក្សាប្រមូលព័ត៌មានលម្អិតជាមួយក្រសួងការបរទេសលើករណីស្ត្រីរូបនេះ ដើម្បីកំណត់វិធានការផ្លូវច្បាប់ណាមួយដែលយើងអាចប្រើសម្រាប់ជួយដល់គាត់បាន»។
បើតាមលោក ជិន ម៉ាលីន មួយផ្នែកនៃសំណុំរឿងរបស់ស្ត្រីខ្មែររូបនេះអាចប្រើយន្តការផ្នែកច្បាប់ ដែលមានស្រាប់រវាងកម្ពុជា និងវៀតណាម គឺកិច្ចព្រមព្រៀងធ្វើបត្យាប័ន និងផ្ទេរទណ្ឌិត។ ចំពោះការធ្វើបត្យាប័នសំដៅដល់ការប្រព្រឹត្តបទល្មើសនៅកម្ពុជាហើយរត់ទៅវៀតណាម នោះកម្ពុជានឹងស្នើសុំយកមកផ្ដន្ទាទោស និងដំណើរការក្ដីនៅកម្ពុជា។
ការផ្ទេរទណ្ឌិតសំដៅដល់ការប្រព្រឹត្តបទល្មើសនៅវៀតណាម ហើយទទួលបានការកាត់ទោសរួចរាល់កម្ពុជាអាចស្នើសុំផ្ទេរទណ្ឌិតមកអនុវត្តទោសនៅកម្ពុជា។ ដូច្នេះសំណុំរឿងស្ត្រីខ្មែររូបនេះអាចស្ថិតក្នុងកិច្ចព្រមព្រៀងស្តីពីការផ្ទេរទណ្ឌិត។
លោក ម៉ាលីន បញ្ជាក់ថា៖ «ករណីនេះវាកំពុងស្ថិតនៅក្នុងការសិក្សា និងប្រមូលព័ត៌មានលម្អិតនៅឡើយ មិនទាន់កំណត់ថានឹងត្រូវប្រើច្បាប់ណាមួយនៅឡើយទេ»។
តុលាការខេត្តតៃនិញវៀតណាមកាលពីថ្ងៃទី ៣១ កក្កដា បានកាត់ទោសប្រហារជីវិតស្ត្រីខ្មែរម្នាក់ឈ្មោះ មៀច ស្រីនាង អាយុ ២៧ ឆ្នាំ មានលំនៅក្នុងរាជធានីភ្នំពេញពីបទជួញដូរគ្រឿងញៀនឆ្លងដែនប្រភេទមេតំហ្វេតាមីនចំនួន ៥ កញ្ចប់ទម្ងន់ជិត ៥ គីឡូក្រាមពីកម្ពុជា ចូលវៀតណាមតាមច្រកព្រំដែនអន្តរជាតិម៉ុកបៃនៃខេត្តតៃនិញកាលពីខែធ្នូ ឆ្នាំ ២០១៩។ នេះបើតាមការចុះផ្សាយរបស់សារព័ត៌មានវៀតណាម VNA។
លោក កុយ គួង អ្នកនាំពាក្យក្រសួងការបរទេសកម្ពុជាប្រាប់ភ្នំពេញប៉ុស្តិ៍ថា អគ្គកុងស៊ុលកម្ពុជាប្រចាំប្រទេសវៀតណាម ប្រឹងប្រែងជួយតាមផ្លូវច្បាប់ស្វែងរកយុត្តិធម៌សម្រាប់ស្ត្រីខ្មែរនោះតាំងពីថ្ងៃដំបូងដែលនាងត្រូវបានចាប់ខ្លួននិងបានចូលស្ដាប់ការជំនុំជម្រះសំណុំរឿងរបស់នាងក្នុងតុលាការខេត្តតៃនិញ កាលពីថ្ងៃទី ៣១ កក្កដា ផងដែរ។
លោកថ្លែងថា៖ «តុលាការដំបូងខេត្តតៃនិញរបស់វៀតណាមបានទុករយៈពេល ១៥ ថ្ងៃឲ្យស្ត្រីខ្មែររូបនោះប្ដឹងឧទ្ធរណ៍។ ក្នុងរយៈពេលនេះ ក្រសួងការបរទេសយើងតាមរយៈអគ្គកុងស៊ុលប្រចាំប្រទេសវៀតណាមកំពុងរិះរកមធ្យោបាយតាមផ្លូវច្បាប់ ដើម្បីជួយស្វែងរកយុត្តិធម៌ជូនស្ត្រីរូបនោះផងដែរ»៕