The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ខិត​ជិត​ទៅ​លុប​បំបាត់​ការ​ស្លាប់​ដោយ​ជំងឺ​គ្រុន​ចាញ់

កម្ពុជា​ខិត​ជិត​ទៅ​លុប​បំបាត់​ការ​ស្លាប់​ដោយ​ជំងឺ​គ្រុន​ចាញ់

កម្ពុជា​ខិត​ជិត​ទៅ​លុប​បំបាត់​ការ​ស្លាប់​ដោយ​ជំងឺ​គ្រុន​ចាញ់

ភ្នំពេញៈ កម្ពុជា​កំពុង​ខិត​ជិត​ទៅ​សម្រេច​បាន​នូវ​គោលដៅ​លុប​បំបាត់​នូវ​ចំនួន​មនុស្ស​ស្លាប់​ដោយ​សារ​ជំងឺ​គ្រុន​ចាញ់ នៅ​ត្រឹម ឆ្នាំ​២០១៥ ខណៈ​ដែល​ករណី​ស្លាប់​បាត់​បង់​ជីវិត​បាន​ធ្លាក់​ចុះ​ពី ៩៣ នាក់​នៅ​ក្នុង ឆ្នាំ​២០១១ មក​ត្រឹម ១២ នាក់ កាល​ពី​ឆ្នាំ​មុន។ នេះ​បើ​យោង​តាម​ទិន្នន័យ​ថ្មី​ពី​របាយ​ការណ៍​អង្គការ​សុខភាព​ពិភពលោក បាន​ឲ្យ​ដឹង។

ករណី​ថ្មីៗ កាល​ពី​ឆ្នាំ​មុន ក៏​បាន​ធ្លាក់​ចុះ​មក​ត្រឹម ២១៣០៩ ផង​ដែរ។ អង្គការ​សុខភាព​ពិភពលោក ក៏​បាន​កំណត់​ថា មួយ​ផ្នែក​ធំ​នៃ​ជោគជ័យ​របស់​កម្ពុជា​ក្នុង​ការ​ប្រយុទ្ធ​ប្រឆាំង​ជំងឺ​គ្រុន​ចាញ់ ដែល​ជា​ជំងឺ​កំពុង​បន្ត​មាន​អត្រា​ឆ្លង​ខ្ពស់​ដល់​ប្រជាជន​ចំនួន ៤៤ ភាគរយ​នោះ គឺ​ដោយ​សារ​តែ​ការ​ចែក​ចាយ​ប្រកប​ដោយ​ប្រសិទ្ធ​ភាព​នូវ​មុង​ជ្រលក់​ថ្នាំ។

របាយ​ការណ៍​ជំងឺ​គ្រុន​ចាញ់​ពិភពលោក ឆ្នាំ​២០១៤ ដែល​បាន​ចេញ​ផ្សាយ​កាល​ពី​ថ្ងៃ​អង្គារ បាន​ឲ្យ​ដឹង​ថា ឥឡូវ​នេះ មូលនិធិ​ជំងឺ​គ្រុន​ចាញ់​ភាគ​ច្រើន​នៅ​កម្ពុជា គឺ​សម្រាប់​ការ​ចែក​មុង ដែល​បាន​ផ្គត់​ផ្គង់​ដល់​ប្រជាជន​ចំនួន ៩០ ភាគរយ។ យោង​តាម​របាយ​ការណ៍​បាន​ឲ្យ​ដឹង​បន្ថែម​ទៀត​ថា ប៉ុន្តែ លទ្ធផល​នៅ​មិន​ទាន់​រឹង​មាំ​ទេ។

មូលនិធិ​ជំងឺ​គ្រុន​ចាញ់​កម្ពុជា​បាន​ឡើង​ដល់​ប្រហែល ៤០ លាន​ដុល្លារ នៅ ឆ្នាំ​២០១១ ប៉ុន្តែ យុទ្ធសាស្ត្រ​បែង​ចែក​មូលនិធិ​ថ្មី​ដែល​បង្កើត​ឡើង​ដោយ​អង្គការ​មូលនិធិ​ពិភពលោក បាន​ធ្វើ​ឲ្យ​ចំនួន​សរុប​នេះ​ធ្លាក់​ចុះ​មក​ត្រឹម ១៥ លាន​ដុល្លារ។

លោក​ស្រី Sonny Krishnan មន្ត្រី​ទំនាក់​ទំនង​នៅ​អង្គការ​សុខភាព​ពិភពលោក​កម្ពុជា បាន​ថ្លែង​ថា៖ «របៀប​វារៈ​ជំងឺ​គ្រុន​ចាញ់​ទាំង​មូល កំពុង​ផ្លាស់​ប្តូរ ដោយ​មាន​គោលដៅ​លុប​បំបាត់​ទាំង​ស្រុង​នៅ​មហា​អនុ​តំបន់​ទន្លេ​មេគង្គ។ ប្រសិន​បើ​មិន​បន្ត​ផ្តល់​មូលនិធិ​ទេ អ្វី​ដែល​អាច​កើត​ឡើង​គឺ​ជំងឺ​គ្រុន​ចាញ់​អាច​វិល​ត្រឡប់​មក​វិញ ហើយ​កាន់​តែ​រីក​ធំ និង​ពិបាក​ដោះស្រាយ​បញ្ហា»៕

អត្ថបទគួរចាប់អារម្មណ៍