ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈគ្រោងចំណាយទឹកប្រាក់សរុបជិត ៥០០ លានដុល្លារ សម្រាប់ផែនការអភិវឌ្ឍន៍គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈរយៈពេល ៥ ឆ្នាំ (២០២១-២០២៥) ដោយផ្ដោតលើយុទ្ធសាស្ត្រចំនួន ៤។ នេះបើយោងតាមលោក អ៊ិត សំហេង រដ្ឋមន្ត្រីក្រសួងការងារ ដែលបានបង្ហោះសារនៅលើហ្វេសប៊ុកកាលពីថ្ងៃទី ៣០ ខែធ្នូ។
លោក អ៊ិត សំហេង ថ្លែងថា ផែនការមេរយៈពេល ៥ ឆ្នាំនេះផ្ដោតលើយុទ្ធសាស្ត្រចំនួន ៤ រួមមាន ការកសាង និងកែលម្អហេដ្ឋារចនាសម្ព័ន្ធរូបវន្តរបស់គ្រឹះស្ថានការបំពាក់ឧបករណ៍បរិក្ខារ និងសម្ភារបណ្តុះបណ្តាល ការពង្រឹងសមត្ថភាពអ្នកដឹកនាំគ្រប់គ្រងមន្ត្រីរាជការ និងគ្រូបច្ចេកទេស និងការបង្កើនបរិមាណ និងគុណភាពជំនាញបច្ចេកទេស និងវិជ្ជាជីវៈ។
ផែនការរយៈពេល ៥ ឆ្នាំនេះនឹងចំណាយថវិកាសរុបចំនួន ៤៩៣,១០ លានដុលា្លរ ដោយចំណាយ ១០២,៣ លានដុល្លារ លើការសាងសង់អគារសិក្សាចំនួន ៦២ អគារ មានបន្ទប់សិក្សាចំនួន ១ ១១៦ បន្ទប់ និងចំណាយថវិកា ៥៤,៦ លានដុល្លារ សម្រាប់សាងសង់អគារអន្តេវាសិកដ្ឋានចំនួន ២៨ អគារ។
ក្រៅពីនេះ ការចំណាយនឹងធ្វើលើការសាងសង់រោងជាងចំនួន ២៤៨ កន្លែង (៤៩,៦ លានដុល្លារ) ការបំពាក់ឧបករណ៍ បរិក្ខារ និងសម្ភារបណ្តុះបណ្តាល (១៨៦ លានដុល្លារ) ការពង្រឹងសមត្ថភាពអ្នកដឹកនាំគ្រប់គ្រងមន្ត្រីរាជការ និង គ្រូបច្ចេកទេស (២,២៥ លានដុល្លារ) និងការបណ្តុះបណ្តាលសិស្សនិស្សិតចំនួន ៣៩២ ៥០០ នាក់ (៩៣,១ លានដុល្លារ)។
លោក អ៊ិត សំហេង បានថ្លែងក្នុងអារម្ភកថានៃការធ្វើផែនការមេថា ការរៀបចំផែនការមេនេះធ្វើឡើងដើម្បីឆ្លើយតបនឹងបញ្ហាខ្វះខាតដែលក្រសួងកំពុងជួបប្រទះ។ លោកថ្លែងដូច្នេះថា៖ «ផែនការមេនេះនឹងប្រែក្លាយមុខមាត់នៃគ្រឹះស្ថានអប់រំបណ្ដុះបណ្ដាលវិជ្ជាជីវៈសាធារណៈក្រោមឱវាទក្រសួងឲ្យកាន់តែមានភាពទាក់ទាញក្នុងចំណោមយុវជន ក៏ដូចជាសាធារណជនក្នុងការចាប់យកជំនាញដើម្បីទទួលបានការងារសមរម្យ និងផលិតភាពខ្ពស់ឆ្លើយតបនឹងចក្ខុវិស័យរបស់រាជរដ្ឋាភិបាលកម្ពុជា»។
បច្ចុប្បន្ននេះគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈមានចំនួន ១០៨ កន្លែងដែលក្នុងនោះមាន ៣៨ ជាគ្រឹះស្ថានសាធារណៈ ៤៥ ជាគ្រឹះស្ថានឯកជន និង ២៥ ជាអង្គការ ឬសមាគម។ ក្នុងរយៈពេល ៥ ឆ្នាំចាប់ពីឆ្នាំ ២០១៥ ដល់ឆ្នាំ ២០១៩ គ្រឹះស្ថានទាំងនេះបានបណ្ដុះបណ្ដាលសិក្ខាកាម និងនិស្សិតចំនួន ២៣៨ ៣០៩ នាក់។
បើតាមឯកសារផែនការមេដដែលក្នុង ១ ឆ្នាំៗមានតម្រូវការកម្លាំងពលកម្មចំនួន ៣១ ម៉ឺននាក់ ដែលក្នុងចំនួននេះ វិស័យសំណង់មានតម្រូវការ ៨ ម៉ឺននាក់កាត់ដេរចំនួន ៦ ម៉ឺននាក់ កម្មន្តសាលចំនួន ៦ ម៉ឺននាក់ សណ្ឋាគារភោជនីយដ្ឋាន ៤ ម៉ឺននាក់ ពាណិជ្ជកម្ម ៤ ម៉ឺននាក់ និងដឹកជញ្ជូន និងទំនាក់ទំនងចំនួន ៣ ម៉ឺននាក់។
លោក ហេង សួរ អ្នកនាំពាក្យក្រសួងការងារបានឲ្យដឹងពីថ្ងៃទី ៣០ ធ្នូ ថា ថវិកាដែលគ្រោងចំណាយជិត ៥០០ លាននេះគឺជាថវិការបស់រដ្ឋ និងដៃគូអភិវឌ្ឍន៍។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា យល់ឃើញថា ផែនការមេនេះជាផែនការល្អជាពិសេសការបណ្ដុះបណ្ដាលអ្នកជំនាញ ដោយសារតែប្រទេសមួយចំនួន អះអាងថា កម្ពុជាមិនសូវមានអ្នកជំនាញ។
លោកថា ជាក់ស្ដែងកម្ពុជា ពិតជាខ្វះអ្នកជំនាញស្ទើរតែគ្រប់វិស័យ។ លោកថ្លែងថា៖ «ជាទូទៅកម្ពុជាទទួលបានពីវិស័យទេសចរណ៍ច្រើនជាងគេរហូតដល់ ៦០ ម៉ឺននាក់។ ជាទូទៅក្នុងប្រទេសសេវាកម្មទេសចរណ៍មិនសូវមានអ្នកជំនាញច្រើនទេ ហើយបើយើងប្រៀបធៀបនឹងវិស័យផ្សេងទៀត វាក៏ខ្លាំងដែរ ដូច្នេះវាគួរតែជាអាទិភាពដែរ។ ទី២ វិស័យកសិកម្មក៏មិនសូវមានអ្នកជំនាញច្រើនដែរ។ ភាគច្រើនពួកគេធ្វើការទាំងលំបាកក្នុងការផលិតវត្ថុធាតុដើម និងការកែច្នៃផ្សេងៗ។ តាមពិតគ្រាន់តែការកែច្នៃកសិផលក៏មានប្រាក់ចំណូល និងបង្កើតកម្លាំងពលកម្មច្រើនដែរ»។
លោកបន្តថា៖ «អ្វីដែលគួរពង្រឹងផងដែរ គឺស្ទើរតែគ្រប់វិស័យក្នុងនោះវិស័យកាត់ដេរ ក៏មិនទាន់មានអ្នកជំនាញជាន់ខ្ពស់ហើយផ្នែកសំណង់ក៏យើងនៅរកជនជាតិវៀតណាម ជនជាតិចិនមកធ្វើការច្រើន»។
លោក អាត់ ធន់ ស្នើថា ក្រសួងការងារគួរតែជំរុញឲ្យម្ចាស់អាជីវកម្មចូលរួមក្នុងការបណ្ដុះបណ្ដាលចំណេះដឹងដល់បុគ្គលិករបស់ខ្លួនដូចដែលមានចែងក្នុងច្បាប់ការងារ។ លោកសង្កេតឃើញថា ក្រសួងហាក់ដូចជាឆកល្វែងចំណុចនេះ។ ប្រសិនបើក្រុមហ៊ុននានាបំពេញចន្លោះប្រហោងនេះបាន កម្លាំងការងារជំនាញនឹងមានរាប់លាននាក់។ ប៉ុន្តែបើក្រុមហ៊ុនមិនបានធ្វើចំណុចនេះ ហើយទុកឲ្យក្រសួងធ្វើការតែម្នាក់ឯង ការបណ្ដុះបណ្ដាលអ្នកជំនាញមិនអាចឆ្លើយតបនឹងតម្រូវការទីផ្សារបានទេហើយនឹងនៅតែបន្តខ្វះតទៅទៀត៕